ଯାଜପୁର: ଯାଜପୁରରେ ଅଭାବନୀୟ ଘଟଣା। ପରିବାର ଲୋକଙ୍କୁ ନିଶା ଦେଇ ପ୍ରେମିକ ସହ ଫେରାର ମାରିଲା ପ୍ରେମିକା। ବଡ଼ କଥା ପ୍ରେମିକା ଜଣକ ନାବାଳିକା। କୁଆଖିଆ ଥାନା ଅଞ୍ଚଳ ନଠୁଆବର ଗାଁରେ ଘଟିଛି ଏହି ଘଟଣା। ବାପା, ମାଆ ସହ ୩ ଭାଇ ଭଉଣୀଙ୍କୁ ନିଶା ଦେଇ ନାବାଳିକା ଫେରାର ମାରିଥିବା ଜଣା ପଡିଛି। ବାପା ମାଆ ସମେତ ଅସୁସ୍ଥ ୫ ଜଣଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଘରୁ ସୁନା ଗହଣା ନେଇ ପ୍ରେମିକ ସହ ନାବାଳିକା ପଳାଇଥିବା ଅଭିଯୋଗ ହୋଇଛି। ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି।
ସୂଚନା ଅନୁଯାୟୀ, ପ୍ରେମିକର ପ୍ରରୋଚନାରେ ଯାଜପୁର ଜିଲ୍ଲା କୁଆଖିଆ ଥାନା ନଠୁଆବର ଗାଁର ବିଜୟ ସେଠୀଙ୍କ ୧୩ ବର୍ଷର ନାବାଳିକା ଝିଅ ଖାଦ୍ୟରେ ନିଶା ଔଷଧ ଦେଇ ଘରୁ ପଳାଇ ଯିବାକୁ ଉଦ୍ୟମ କରିଥିବା ଘଟଣା ସାମ୍ନାକୁ ଆସିଛି। ଫଳରେ ସେହି ନିଶା ଔଷଧ ମିଶା ଖାଦ୍ୟ ଖାଇ ପରିବାରର ୫ଜଣ ସଦସ୍ୟ ଗୁରୁତର ଅସୁସ୍ଥ ହୋଇ ଯାଜପୁର ଯଯାତି କେଶରୀ ମେଡ଼ିକାଲରେ ଚିକିତ୍ସିତ ହେଉଛନ୍ତି।
