ଚେନ୍ନାଇ ୦୬/୪: ରବିବାର ରାମନବମୀ ଅବସରରେ ଉଦ୍ଘାଟିତ ହୋଇଛି ଭାରତର ପ୍ରଥମ ଭର୍ଟିକାଲ ଲିଫ୍ଟ ସି ବ୍ରିଜ। ତାମିଲନାଡୁ ଗସ୍ତ ଅବସରରେ ନୂଆ ପମ୍ବନ ବ୍ରିଜର ଲୋକାର୍ପଣ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ରାମେଶ୍ବରମ-ତାମ୍ବରମ ନୂଆ ଟ୍ରେନ ସେବାକୁ ପତକା ଦେଖାଇ ଶୁଭାରମ୍ଭ କରିବା ପରେ ପମ୍ବନରେ ଦୌଡିଛି ଟ୍ରେନ ।
ଏଥି ସହ ୮ହଜାର ୩ଶହ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ରେଳ ଓ ସଡକ ପ୍ରକଳ୍ପର ଶିଳାନ୍ୟାସ କରିଛନ୍ତି ପ୍ରଧାନମନ୍ତ୍ରୀ । ସେତୁର ଉଦ୍ଘାଟନ ପରେ ମୋଦି ରାମେଶ୍ବରମର ରାମନାଥ ସ୍ବାମୀ ମନ୍ଦିର ପରିଦର୍ଶନ କରି ପୂଜା କରିବାର କାର୍ଯ୍ୟକ୍ରମ ରହିଛି । ବ୍ରିଜରେ ଖର୍ଚ୍ଚ ହୋଇଛି ପ୍ରାୟ ୫ଶହ ୫୦ କୋଟି ଟଙ୍କା ।
ଦକ୍ଷିଣ ଭାରତକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଏହା ବଡ ଗିଫ୍ଟ ବୋଲି କୁହାଯାଉଛି ।। ଆରବ ସାଗର ଉପରେ ନିର୍ମିତ ହୋଇଛି ନୂତନ ରାମେଶ୍ବରମ-ପାମ୍ବନ ମଧ୍ୟରେ ରେଳ ସେତୁ । ୨.୦୮ କିଲୋମିଟର ଲମ୍ବା ଏହି ସେତୁ ତାମିଲନାଡୁର ରାମେଶ୍ବରମ ସହ ମଣ୍ଡପମକୁ ସଂଯୋଗ କରେ । ପ୍ରଧାନମନ୍ତ୍ରୀ ମୋଦି ୨୦୧୯ ନଭେମ୍ବର ମାସରେ ବ୍ରିଜର ଲୋକାର୍ପଣ କରିଥିଲେ । ଭବିଷ୍ୟତକୁ ଦୃଷ୍ଟିରେ ରଖି ଏହାକୁ ଡବଲ ଟ୍ରାକ ଓ ହାଇ ସ୍ପିଡ ଟ୍ରେନ ପାଇଁ କରାଯାଇଛି ଡିଜାଇନ ।
ଷ୍ଟେନଲେସ ଷ୍ଟିଲରେ ତିଆରି ଏହି ନୂଆ ସେତୁ ଉପରେ ପଲିସିଲୋକ୍ସେନର ଆବରଣ ଦିଆଯାଇଛି । ଯାହା କଳଙ୍କି ଓ ସମୁଦ୍ରର ଲୁଣିଆ ପାଣିରୁ ସେତୁକୁ ରକ୍ଷା କରିବ । ପୁରୁଣା ସେତୁରେ କଳଙ୍କି ଲାଗିବା ଯୋଗୁ ୨୦୨୨ରେ ବନ୍ଦ ହୋଇଯାଇଥିଲା । ଏହା ପରେ ରାମେଶ୍ବରମ ଓ ମଣ୍ଡପମ୍ ମଧ୍ୟରେ ରେଳ ଯୋଗାଯୋଗ ବିଚ୍ଛିନ୍ନ ହୋଇଥିଲା ।
