ଭୁବନେଶ୍ୱର ୦୧।୦୨ : ଏବେଠାରୁ ତାଉ ଦେଖାଇଲାଣି । ଜାନୁଆରୀ ଶେଷରୁ ରାଜ୍ୟରେ ଅସ୍ୱାଭାବିକ ଗରମ । ପାରଦ ୩୪ ଡିଗ୍ରୀ ସେଲସିୟସ୍ ପାର୍ । ଆଗକୁ ଛଟପଟ କରିଦେବ ଜନଜୀବନ । ସାରା ଓଡ଼ିଶା ଜଳିବ । ଗରମ ବାମ୍ଫରେ ଭାଜି ହେବ ଉପକୂଳ ଓଡ଼ିଶା । ଏଭଳି ପୂର୍ବାନୁମାନ କରିଛନ୍ତି ଆନ୍ତର୍ଜାତିକ ପାଣିପାଗ ବିଜ୍ଞାନ ସଂସ୍ଥା ।
ଜାନୁଆରୀ ତାଉ ସଙ୍କେତ ଦେଲାଣି- ଏ ବର୍ଷ ରାଜ୍ୟ ଜଳିବ ନିର୍ଘାତ ଖରାରେ । କଲମ୍ବିଆ ବିଶ୍ୱବିଦ୍ୟାଳୟ ଅଧୀନସ୍ଥ କ୍ଲାଇମେଟ ସ୍କୁଲ୍ର ଆକଳନ ଅନୁସାରେ ଚଳିତବର୍ଷ ଫେବ୍ରୁଆରୀ, ମାର୍ଚ୍ଚ, ଏପ୍ରିଲ ମାସରେ ଭାରତରେ ଭୀଷଣ ଗରମ ଅନୁଭୂତ ହେବ । ସମ୍ଭାବ୍ୟ ଚିତ୍ର ଦେଖାଉଛି, ଉତ୍ତର ଭାରତର କିଛି ଅଂଶ, ପଶ୍ଚିମ ଓ କେନ୍ଦ୍ରୀୟ ଭାରତର କିଛି ରାଜ୍ୟ ସହ ଓଡ଼ିଶାର ଉପକୂଳ ଅଞ୍ଚଳରେ ପ୍ରଚଣ୍ଡ ଗ୍ରୀଷ୍ମ ପ୍ରକୋପ ରହିବ । ଗତ ବର୍ଷ ତୁଳନାରେ ଏବର୍ଷ ଓଡ଼ିଶା ସମେତ ଦେଶରେ ଅଧିକ ଗରମ ଅନୁଭୂତ ହୋଇପାରେ ।
ଏପଟେ ଭାରତୀୟ ପାଣିପାଗ ବିଭାଗ (ଆଇଏମ୍ଡି)ର ଫେବୃଆରୀ ମାସ ପାଇଁ ପୂର୍ବାନୁମାନ ଜାରି କରିଛି । ଏହି ଆକଳନ ଅନୁସାରେ ଏଥର ଫେବ୍ରୁଆରୀରେ ଶୀତ ପ୍ରକୋପ ସମ୍ଭାବନା କମ୍ । ସାରା ଦେଶରେ ଉଭୟ ଦିନ ଓ ରାତି ତାପମାତ୍ରା ସ୍ୱାଭାବିକଠାରୁ ବେଶ୍ ଅଧିକ ରହିପାରେ । ଓଡ଼ିଶାରେ ବି ଶୀତ ରହିବନି । ଦିନ ଓ ରାତି ତାପମାତ୍ରା ସ୍ୱାଭାବିକଠାରୁ ଢେର ଅଧିକ ରହିବ । ମଝିରେ ମଝିରେ ବର୍ଷା ସମ୍ଭାବନା ବି ଦେଖାଯାଉନି ।
ସମ୍ଭାବ୍ୟ ଚିତ୍ର ଅନୁସାରେ ଓଡ଼ିଶାରେ ଫେବ୍ରୁଆରୀରେ ଖରା ପ୍ରକୋପ ଅଧିକ ରହିବ । ଛତିଶଗଡ଼ ସଂଲଗ୍ନ ଦକ୍ଷିଣ ଓଡ଼ିଶାରେ ବେଶି ଗରମ ରହିପାରେ । ବର୍ତ୍ତମାନ ରାଜ୍ୟରେ ଶୀତ ଗାଏବ । ଜାନୁଆରୀର ଶେଷ ଦିନରେ ରାଜ୍ୟରେ ଅସ୍ୱାଭାବିକ ଗରମ ହେଲାଣି । ଶୁକ୍ରବାର ୧୦ଟି ସ୍ଥାନରେ ଦିନ ତାପମାତ୍ରା ୩୩ ଡିଗ୍ରୀ ସେଲସିୟସ୍ ଡେଇଁଛ ଝାରସୁଗୁଡ଼ା ତାପମାତ୍ରା ୩୪.୫, ଭବାନୀପାଟଣା ୩୪, ପାରଳାଖେମୁଣ୍ଡିରେ ୩୪ ଡିଗ୍ରୀ ଛୁଇଁଛି ।
ଜାନୁଆରୀ ରେକର୍ଡ କହୁଛି, ଏହା ଝାରସୁଗୁଡ଼ା ପାଇଁ ଜାନୁଆରୀର ତୃତୀୟ ସର୍ବୋଚ୍ଚ ତାପମାତ୍ରା । ଭବାନୀପାଟଣା ପାଇଁ ଏହା ଜାନୁଆରୀର ଦ୍ୱିତୀୟ ସବାଧିକ ତାପମାତ୍ରା । ୧୯୭୩ ମସିହା ପରେ ଭବାନୀପାଟଣାରେ ଜାନୁଆରୀରେ ଏତେ ତାତି ଅନୁଭୂତ ହୋଇଛି। ଝାରସୁଗୁଡ଼ା ଓ ଭବାନୀପାଟଣାରେ ତାପମାତ୍ରା ସ୍ୱାଭାବିକଠାରୁ ୫ ଡିଗ୍ରୀ ଅଧିକ ରହିଛି ।
ବିଶେଷଜ୍ଞଙ୍କ ପୂର୍ବାନୁମାନ ହେଲା, ରାଜ୍ୟରେ ଏବେ ଖରା ବଢ଼ିବ । ବିଶେଷ କରି ଫେବ୍ରୁଆରୀ ୧, ୨, ୫ ଓ ୬ ତାରିଖରେ ଅଧିକ ପ୍ରକୋପ ରହିବ ଖରାର । ୩ ଓ ୪ରେ ତାପମାତ୍ରା ସାମାନ୍ୟ କମିପାରେ ।
ପାଣିପାଗ ବିଭାଗ ଅନୁସାରେ ରାତି ତାପମାତ୍ରାରେ ଏବେ କିଛି ପରିବର୍ତ୍ତନ ସମ୍ଭାବନା ନାହିଁ । କୁହୁଡ଼ି ପ୍ରକୋପ ଆହୁରି ୨ଦିନ ଲାଗି ରହିବ । ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, କେନ୍ଦୁଝର, ଅନୁଗୁଳ, ଢେଙ୍କାନାଳ ଓ ଗଞ୍ଜାମରେ ଘନ କୁହୁଡ଼ି ରହିବ ଶନିବାର ସକାଳେ । ଏସବୁ ଜିଲ୍ଲାର କିଛି ଅଞ୍ଚଳ ସମେତ ପୁରୀ, ଖୋର୍ଦ୍ଧା, କଳାହାଣ୍ଡି, କନ୍ଧମାଳ, ସୁନ୍ଦରଗଡ଼, ମୟୂରଭଞ୍ଜ, ନୟାଗଡ଼ ଓ କୋରାପୁଟର ସ୍ଥାନେ ସ୍ଥାନେ ମଧ୍ୟମ ଧରଣର କୁହୁଡ଼ି ହୋଇପାରେ । ୨ ତାରିଖ ସକାଳ ପର୍ଯ୍ୟନ୍ତ ରାଜ୍ୟରେ କୁହୁଡ଼ି ରହିବ । ତା’ପରେ କୁହୁଡ଼ି କମିବ । ୨୦୨୩ ପରେ ୨୦୨୪ରେ ବି ପ୍ରଚଣ୍ଡ ଗ୍ରୀଷ୍ମ ପ୍ରବାହରେ ସାରା ବିଶ୍ୱ ତାତିଥିଲା । ଓଡ଼ିଶା ବି ଜଳିଥିଲା ଭୟଙ୍କର ତାତିରେ। ଏ ବର୍ଷ ପୁଣି ଥରେ ଭୟାନକ ଗ୍ରୀଷ୍ମ ପ୍ରବାହ ଆଶଙ୍କା ଘାରିଲାଣି । ଚଳିତବର୍ଷ ଜାନୁଆରୀ ମାସ ବିଶ୍ୱ ପାଇଁ ସବୁଠାରୁ ଉତ୍ତପ୍ତ ଥିଲା।
ପାଣିପାଗ ବିଭାଗ ତଥ୍ୟ ଅନୁସାରେ ଶୁକ୍ରବାର ବଲାଙ୍ଗୀର ୩୩.୮, ସମ୍ବଲପୁର ୩୩.୬, ହୀରାକୁଦ ୩୩.୬, ଭଦ୍ରକ ୩୩.୬, ଅନୁଗୁଳ ୩୩.୧, ସୋନପୁର ୩୩.୧, ନୂଆପଡ଼ା ୩୩ ଡିଗ୍ରୀ ଥିଲା । ଭୁବନେଶ୍ୱର ତାପମାତ୍ରା ୩୨.୪ ଥିବା ବେଳେ ଜଗତସିଂହପୁର ଓ ନବରଙ୍ଗପୁର ୩୨.୫ ଡିଗ୍ରୀ ଥିଲା ।
