ନୀଳଗିରି ୧୭/୧୨: ବାଲେଶ୍ଵର ଜିଲ୍ଲା ନୀଳଗିରି- ସେରଗଡ଼-ଝରଣାଘାଟି ରାଜ୍ୟପଥରେ ଘଟିଛି ମର୍ମନ୍ତୁକ ସଡ଼କ ଦୁର୍ଘଟଣା । ଟ୍ୟାଙ୍କର ଧକ୍କାରେ ଯୁବକ ମୃତ । ସେପଟେ ଦୁର୍ଘଟଣା ପରେ କିଛି ସମୟ ପରେ ଘଟଣା ସ୍ଥଳରେ ଉତ୍ତେଜନା ପ୍ରକାଶ ପାଇଥିଲା । ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରିବା ପରେ ରାସ୍ତାରୋକ ହଟିଥିଲା ।
ସୂଚନା ଥାଉକି, ସୋର ଥାନା ଅଧିନ ଦହିସଡ଼ା ଗ୍ରାମର ସଞ୍ଜିବ ବେହେରା ବାଇକରେ ଉଦଳା ଆଡ଼କୁ ଯାଉଥିବା ବେଳେ ତିନିକୋଶିଆ ଜଙ୍ଗଲ ଭାଲୁକାଶୁଣି ଠାରେ ବିପରୀତ ଦିଗରୁ ଆସୁଥିବା ଏକ ତେଲ ଟ୍ୟାଙ୍କର ଧକ୍କା ଦେଇଥିଲା । ଘଟଣା ସ୍ଥଳରେ ସେ ଛଟପଟ ହୋଇ ମୃତ୍ୟୁବରଣ କରିଥିଲେ।
ଟ୍ୟାଙ୍କର ଫେରାର ହେଉଥିବା ବେଳେ ଅଞ୍ଚଳବାସୀ ଗୋଡ଼ାଇ ସେରଗଡ଼ ଅଞ୍ଚଳରେ ଧରି ପୋଲିସରେ ଜିମା ଦେଇଥିଲେ। ତେବେ ଡ୍ରାଇଭର ଓ ହେଲପର ଗାଡି ଛାଡି ଫେରାର ହୋଇଯାଇଥିଲେ । ଏହା ପରେ ଉତ୍ତ୍ୟକ୍ତ ଲୋକ ରାସ୍ତାରୋକ କରିଥିଲେ । ତେବେ ନୀଳଗିରି ପୋଲିସ ବୁଝାସୁଝା କରିବା ପରେ ରାସ୍ତାରୋକ ହଟିଥିଲା । ପୋଲିସ ତଦନ୍ତ କରି ମୃତଦେହକୁ ପୋଷ୍ଟ ମୋଟମ ପାଇଁ ପଠାଇଛି। ଦୁର୍ଘଟଣା ଘଟାଇଥିବା ଟ୍ୟାଙ୍କର ଜବତ ହୋଇଥିବା ଜଣାପଡିଛି।
