ମୁମ୍ଵାଇ ୨୪।୦୪; ପହଲଗାମ୍ ଆତଙ୍କବାଦୀ ଆକ୍ରମଣ ପରେ ସୋସିଆଲ ମିଡିଆ ପ୍ଲାଟ୍ଫର୍ମରେ ଲୋକଙ୍କ କ୍ରୋଧ ସ୍ପଷ୍ଟ ଦେଖିବାକୁ ମିଳିଛି। ଅଧିକାଂଶ ଲୋକ ପାକିସ୍ତାନ ଓ ତା’ର ଆତଙ୍କବାଦୀ ସଙ୍ଗଠନଗୁଡ଼ିକୁ ଖୁବ୍ ଗାଳି କରୁଛନ୍ତି । ଏଥର ଆତଙ୍କବାଦୀଙ୍କୁ କଡ଼ା ଜବାବ ମିଳୁ ବୋଲି ଦେଶବାସୀ ସରକାରଙ୍କୁ ଅନୁରୋଧ କରୁଛନ୍ତି, ଯାହା ଦ୍ୱାରା ସେମାନେ ଭବିଷ୍ୟତରେ କେବେ ଏଭଳି ସାହସ କରିବେ ନାହିଁ । ଏହି ଆକ୍ରମଣକୁ ନେଇ ପାକିସ୍ତାନରୁ ଔପଚାରିକ ପ୍ରତିକ୍ରିୟା ବି ସାମ୍ନାକୁ ଆସିଛି ।
ପାକିସ୍ତାନର ରକ୍ଷା ମନ୍ତ୍ରୀ ଖ୍ୱାଜା ଆସିକ ବୟାନ ଦେଇ କହିଛନ୍ତି, ପହଲଗାମ ଆତଙ୍କୀ ହମ୍ଲାରେ ପାକିସ୍ତାନର କୌଣସି ସମ୍ପର୍କ ନାହିଁ । ପାକିସ୍ତାନ ସବୁ ପ୍ରକାର ଆତଙ୍କବାଦକୁ ନିନ୍ଦା କରୁଛି ବୋଲି ମଧ୍ୟ ସେ କହିଛନ୍ତି । ଅନ୍ୟପକ୍ଷେ, ଭାରତରେ ପାକିସ୍ତାନର ପୂର୍ବ ଉଚ୍ଚାୟୁକ୍ତ ଅବଦୁଲ ବାସିତ ସୋସିଆଲ ମିଡିଆ ପ୍ଲାଟ୍ଫର୍ମ ଏକ୍ସରେ ଲେଖିଛନ୍ତି, ମୋର ପୂରା ବିଶ୍ୱାସ ଯେ ପାକିସ୍ତାନ ଭାରତର ଯେକୌଣସି ଆକ୍ରମଣକୁ ବିଫଳ କରିବା ପାଇଁ ସମ୍ପୂର୍ଣ୍ଣ ରୂପେ ପ୍ରସ୍ତୁତ । ମୋର କୌଣସି ସନ୍ଦେହ ନାହିଁ ଯେ ଏ ଥର ପାକିସ୍ତାନର ଜବାବ ମୁହଁତୋଡ଼ ହେବ। ଏହି ଆକ୍ରମଣର ପ୍ରଭାବ ପାକ୍ ସୋସିଆଲ ମିଡିଆରେ ଦେଖିବାକୁ ମିଳୁଛି । ସୋସିଆଲ ମିଡିଆ ପ୍ଲାଟ୍ଫର୍ମ ଏକ୍ସରେ ପହଲଗାମ୍ ଟେରୋରିଷ୍ଟ୍ ଆଟାକ୍ ହାଶ୍ଟ୍ୟାଗ୍ ଟ୍ରେଣ୍ଡ୍ କରୁଛି । ଏଥିସହ ମୋଦି ହାଶ୍ଟ୍ୟାଗ୍ ମଧ୍ୟ ଟ୍ରେଣ୍ଡ୍ରେ।
ପାକିସ୍ତାନରେ ଏକ୍ସ ପ୍ଲାଟ୍ଫର୍ମରେ ଅନେକ ହାଶ୍ଟ୍ୟାଗ୍ ଓ କିୱାର୍ଡ ଚର୍ଚ୍ଚାରେ ଅଛି । ଏଥିସହ କାଶ୍ମୀର, ମୋଦି, ପୁଲୱାମା ଓ ଜମ୍ମୁ ଭଳି କିୱାର୍ଡ ମଧ୍ୟ ଟ୍ରେଣ୍ଡ୍ କରୁଛି । ପାକିସ୍ତାନରେ ଲୋକେ ଗୁଗଲ୍ରେ ଆକ୍ରମଣ ସମ୍ବନ୍ଧୀୟ କିୱାର୍ଡ ଯଥା- ପହଲଗାମ ଓ ପହଲଗାମ୍ ଆଟାକ୍କୁ ସର୍ଚ୍ଚ କରୁଛନ୍ତି । ଏଥିରୁ ପଡ଼ୋଶୀ ଦେଶରେ ଆକ୍ରମଣକୁ ନେଇ ହଲ୍ଚଲ ଓ ଚିନ୍ତା ସ୍ପଷ୍ଟ ବାରି ହେଉଛି।
