ନୂଆଦିଲ୍ଲୀ: ତେଲଙ୍ଗାନାରେ ନଭେମ୍ୱର ୩୦ରେ ବିଧାନସଭା ନିର୍ବାଚନ ପାଇଁ ମତଦାନ ହେବ । ଏହା ପୂର୍ବରୁ କେସିଆର ସରକାରକୁ ବଡ଼ ଝଟକା ଲାଗିଛି । କେସିଆର ସରକାରଙ୍କ ଦ୍ୱାରା ରୟତୁ ବନ୍ଧୁ ଯୋଜନା ଅଧିନରେ ଚାଷୀଙ୍କୁ ଦିଆଯାଉଥିବା ଆର୍ଥିକ ସହଯୋଗ ଉପରେ ରୋକ ଲଗାଇଛନ୍ତି । ନିର୍ବାଚନ ଆୟୋଗ ଆଦେଶ ଜାରି କରି ତତ୍କାଳ ଏହି ଯୋଜନା ଉପରେ ରୋକ ଲଗାଇବାକୁ ନିର୍ଦ୍ଦେଶ ଦେଇଛନ୍ତି । ଉଲ୍ଲେଖଯୋଗ୍ୟ ଯେ କିଛି ଦିନ ପୂର୍ବେ ନିର୍ବାଚନ ଆୟୋଗ ଯୋଜନା ଅଧିନରେ ଅର୍ଥ ରାଶି ଆବଣ୍ଟନକୁ ମଞ୍ଜୁରୀ ଦେଇଥିଲେ । କିନ୍ତୁ ବିଆରଏସ ନେତାଙ୍କ ଦ୍ୱାରା ନିର୍ବାଚନ ଆଚରଣ ସଂହିତା ଉଲ୍ଲଂଘନ କରାଯିବା ପରେ ଏହି ବଡ଼ ପଦକ୍ଷେପ ଗ୍ରହଣ କରାଯାଇଛି । ରାଜ୍ୟର ମନ୍ତ୍ରୀମାନେ ନିଜ ଭାଷଣରେ ଏହି ଯୋଜନାକୁ ନେଇ ଗୁଣଗାନ କରୁଥିଲେ ।
ପଢନ୍ତୁ: ମୁସଲିମଙ୍କ ପାଇଁ ଆଇଟି ପାର୍କ ଘୋଷଣା ଉପରେ କଂଗ୍ରେସ ନେତାଙ୍କ ଆପତ୍ତି, KCRଙ୍କୁ ଘେରିଲେ ଶିବକୁମାର
ନିର୍ବାଚନ ଆୟୋଗ କହିଛନ୍ତି, ଯେପର୍ଯ୍ୟନ୍ତ ଆଦର୍ଶ ଆଚରଣ ସଂହିତା ଲାଗୁ ହୋଇଛି ସେପର୍ଯ୍ୟନ୍ତ ଏହି ଯୋଜନା ଅଧିନରେ କୌଣସି ଟଙ୍କା ଜାରି କରାଯିବ ନାହିଁ । ଉଲ୍ଲେଖଯୋଗ୍ୟ ଯେ ନିର୍ବାଚନ ଆୟୋଗ କିଛି ସର୍ତ୍ତ ସହ ରବି ଫସଲ କିସ୍ତି ପାଇଁ ରାଜ୍ୟ ସରକାରଙ୍କୁ ଅନୁମତି ଦେଇଥିଲେ । ରାଜ୍ୟ ସରକାରଙ୍କୁ କୁହାଯାଇଥିଲା ଯେ ନିର୍ବାଚନ ପ୍ରଚାର ବେଳେ ଏହି ଯୋଜନାର ମହିମାମଣ୍ଡନ କରିବେ ନାହିଁ । କିନ୍ତୁ ରିପୋର୍ଟରେ କୁହାଯାଇଛି ଯେ ରାଜ୍ୟର ଅନେକ ମନ୍ତ୍ରୀ ରୟତୁ ବନ୍ଧୁ ଯୋଜନାର ଗୁଣଗାନ କରି ପ୍ରଚାର କରୁଥିଲେ । ସେମାନେ ସଭାମଞ୍ଚରୁ ଘୋଷଣା କରୁଥିଲେ ଯେ ଚାଷୀଙ୍କ ଆକାଉଣ୍ଟରେ ଟଙ୍କା ପହଞ୍ଚିବ ।
ରୟତୁ ବନ୍ଧୁ ଯୋଜନାକୁ ୨୦୧୮ ମସିହାରେ ବିଆରଏସ ସରକାରଙ୍କ ଦ୍ୱାରା ଆରମ୍ଭ କରାଯାଇଥିଲା । ଏହି ଯୋଜନାରେ ରାଜ୍ୟର ଚାଷୀଙ୍କୁ ଫସଲ ଲଗାଇବା ପାଇଁ ୫,୦୦୦ ଟଙ୍କା ପ୍ରତି ଏକର ଆର୍ଥିକ ସହଯୋଗ ଦିଆଯାଉଛି । ହିତାଧିକାରୀ ଚାଷୀଙ୍କୁ ବର୍ଷରେ ଦୁଇ ଥର ଅର୍ଥ ରାଶି ଦିଆଯାଇଥାଏ । ବର୍ତ୍ତମାନ ସୁଦ୍ଧା ବିଆରଏସ ସରକାର ଚାଷୀଙ୍କୁ ୧୦ ଥର ଫଣ୍ଡ ଜାରି କରିଛନ୍ତି । ୨୦୧୮ରେ ଏହି ଯୋଜନା ଆରମ୍ଭ ପରଠୁ ତେଲଙ୍ଗାନା ସରକାର ୬୫,୦୦୦ କୋଟିରୁ ଅଧିକ ଟଙ୍କା ଜାରି କରିସାରିଛନ୍ତି ।
Also Read: ‘ତେଲଙ୍ଗାନାକୁ ପ୍ରଥମ ଓବିସି ମୁଖ୍ୟମନ୍ତ୍ରୀ ଦେବ ବିଜେପି’, ନିର୍ବାଚନ ରାଲିରେ ପିଏମ୍ ମୋଦୀଙ୍କ ବଡ଼ ଘୋଷଣା
