ନୂଆଦିଲ୍ଲୀ: ଆମେରିକାରେ ପାଲେଷ୍ଟାଇନକୁ ସମର୍ଥନ କରିବା ଭାରତୀୟ ଛାତ୍ରୀଙ୍କୁ ମହଙ୍ଗା ପଡ଼ିଛି । ଅଧ୍ୟୟନ ଅଧାରୁ ଭାରତ ଫେରିଲେ ରଂଜାନୀ ଶ୍ରୀନିବାସନ । ଆମେରିକାର ଗୃହ ସୁରକ୍ଷା ବିଭାଗ କଲମ୍ବିଆ ବିଶ୍ବବିଦ୍ୟାଳୟର ଭାରତୀୟ ଛାତ୍ରୀଙ୍କ ଭିସାକୁ ରଦ୍ଦ କରିଦେଇଛି । ଏହା ପରେ ସେ ସ୍ବଦେଶ ଫେରି ଆସିଛନ୍ତି । ଶ୍ରୀନିବାସନଙ୍କ ଉପରେ ଆତଙ୍କବାଦୀ ସଂଗଠନ ହମାସକୁ ସମର୍ଥନ କରିବାର ଅଭିଯୋଗ ଲାଗିଛି । ପାଲେଷ୍ଟାଇନକୁ ସମର୍ଥନ କାର୍ଯ୍ୟକ୍ରମରେ ସେ ଭାଗ ନେଇଥିଲେ । ଯାହାଫଳରେ ତାଙ୍କୁ ଡୋନାଲ୍ଡ ଟ୍ରମ୍ପ ପ୍ରଶାସନ ଆତଙ୍କୀ ସମର୍ଥକ ଘୋଷଣା କରିଥିଲା । ଏହାପରେ ରଂଜାନୀଙ୍କ F- ୱାନ୍ ଷ୍ଟୁଡେଣ୍ଟ ଭିସା ବାତିଲ୍ କରିଥିଲା ଷ୍ଟେଟ ଡିପାର୍ଟମେଣ୍ଟ । F- ୱାନ୍ ଷ୍ଟୁଡେଣ୍ଟ ଭିସା ବାତିଲ୍ ହେବାରୁ ସେ ସ୍ବଦେଶ ଫେରିଆସିଛନ୍ତି ।
ସୂଚନା ଅନୁଯାୟୀ, ରଂଜାନୀ ଶ୍ରୀନିବାସନ ଭାରତୀୟ ନାଗରିକ । ସେ କଲମ୍ବିଆ ବିଶ୍ବବିଦ୍ୟାଳୟରେ ‘ଅର୍ବାନ ପ୍ଲାନିଂ’ରେ ପିଏଚଡି କରୁଥିଲେ । ସେ ଆମେରିକାକୁ ଏକ ଛାତ୍ର ଭିସାରେ ଯାଇ ସେଠାରେ ପାଠପଢ଼ୁଥିଲେ । ଏକ କାର୍ଯ୍ୟକ୍ରମରେ ସେ ହମାସକୁ ସମର୍ଥନ କରୁଥିବା ଅଭିଯୋଗ ଆସିବା ପରେ ଆମେରିକା ଗୃହ ସୁରକ୍ଷା ବିଭାଗ ତାଙ୍କ ବିରୋଧରେ ଯାଞ୍ଚ ଆରମ୍ଭ କରିଥିଲା । ଏଥିରେ ସେ ପାଲେଷ୍ଟାଇନକୁ ସମର୍ଥନ କରୁଥିବାର ପ୍ରମାଣ ମିଳିଥିଲା । ଆମେରିକାରେ ହମାସକୁ ଆତଙ୍କବାଦୀ ସଂଗଠନ ଘୋଷିତ କରାଯାଇଥିବାରୁ ଶ୍ରୀନିବାସନଙ୍କ ଭିସାକୁ ରଦ୍ଦ କରାଯାଇଛି ।...
