ନୂଆଦିଲ୍ଲୀ: ୟୁଟ୍ୟୁବର ରଣବୀର ଆଲ୍ଲାହାବାଦିଆଙ୍କ ବିବାଦୀୟ ବୟାନ ସହିତ ଜଡିତ ସମସ୍ତ ମାମଲାର ମିଳିତ ଶୁଣାଣି ପାଇଁ ଆବେଦନକୁ ସୁପ୍ରିମକୋର୍ଟ ଖାରଜ କରିଦେଇଛନ୍ତି। ଏହି ମାମଲାର ଶୁଣାଣି ପ୍ରକ୍ରିୟା ଅନୁସାରେ କରାଯିବ ବୋଲି କହିଛନ୍ତି କୋର୍ଟ। ଦେଶର ବିଭିନ୍ନ ସହରରେ ରଣବୀର ଆଲ୍ଲାହାବାଦିଆଙ୍କ ବିରୋଧରେ ମାମଲା ରୁଜୁ ହୋଇଛି। ଏପରି ପରିସ୍ଥିତିରେ, ଶୁଣାଣିରେ ଯୋଗ ଦେବା ପାଇଁ ରଣବୀରଙ୍କୁ ବିଭିନ୍ନ କୋର୍ଟକୁ ଯିବାକୁ ପଡିବ। ଏହି କାରଣରୁ ସମସ୍ତ ମାମଲାକୁ ଏକତ୍ର କରିବା ଏବଂ କେବଳ ଗୋଟିଏ କୋର୍ଟ ସେଗୁଡ଼ିକର ଶୁଣାଣି କରିବା ନେଇ କୋର୍ଟ ଆବେଦନ କରିଥିଲେ।

ସୁପ୍ରିମକୋର୍ଟ ତୁରନ୍ତ ଶୁଣାଣିକୁ ମନା କରିବା ସହିତ ମୌଖିକ ଦାବି ଉପରେ ବିଚାର କରାଯିବା ନାହିଁ କହିଥିଲେ। ଜଷ୍ଟିସ୍ ସଞ୍ଜିବ ଖାନ୍ନା ଆଲ୍ଲାହାବାଦିଆଙ୍କ ଓକିଲଙ୍କୁ ପ୍ରଥମେ ରେଜିଷ୍ଟ୍ରିଙ୍କ ସହିତ ଯୋଗାଯୋଗ କରିବାକୁ କହିଥିଲେ। ପୂର୍ବତନ CJIଙ୍କ ପୁଅ ଆଡଭୋକେଟ୍ ଅଭିନବ ଚନ୍ଦ୍ରଚୂଡ଼ ସୁପ୍ରିମକୋର୍ଟରେ ରଣବୀର ଆଲ୍ଲାହାବାଦିଆଙ୍କ ଆବେଦନର ତୁରନ୍ତ ଶୁଣାଣି ପାଇଁ ଆବେଦନ କରିଥିଲେ। ଚନ୍ଦ୍ରଚୂଡ଼ କହିଛନ୍ତି ଯେ ଗୌହାଟୀ ପୋଲିସ ତଦନ୍ତ ଆରମ୍ଭ କରିଛି। ଏଫଆଇଆର ସ୍ଥଗିତ ରଖିବା ପ୍ରସଙ୍ଗରେ ତୁରନ୍ତ ଶୁଣାଣି ହେବା ଉଚିତ। ପ୍ରକ୍ରିୟା ଅନୁସାରେ ମାମଲାର ଶୁଣାଣି କରାଯିବ ବୋଲି ସିଜେଆଇ ସଞ୍ଜିବ ଖାନ୍ନା କହିଛନ୍ତି।

ରଣବୀର ଆଲ୍ଲାହାବାଦିଆଙ୍କ ଓକିଲ କହିଛନ୍ତି ଯେ ରଣବୀରଙ୍କ ବିରୋଧରେ ଅନେକ ରାଜ୍ୟରେ ଅନେକ ମାମଲା ରୁଜୁ ହୋଇଛି ଏବଂ ଗୌହାଟୀ ପୋଲିସ ତାଙ୍କୁ ଆଜି ପଚରାଉଚରା ପାଇଁ ଡକାଇଛି। ସିଜେଆଇ ସଞ୍ଜିବ ଖାନ୍ନା ରଣବୀରଙ୍କ ଓକିଲ ଅଭିନବ ଚନ୍ଦ୍ରଚୂଡ଼ଙ୍କୁ କହିଥିଲେ ଯେ ଏହି ମାମଲାକୁ ଖୁବ୍ ଶୀଘ୍ର ଶୁଣାଣି ପାଇଁ ତାଲିକାଭୁକ୍ତ କରାଯିବ। ରଣବୀରଙ୍କ ବିରୋଧରେ ବିଭିନ୍ନ ରାଜ୍ୟରେ ମାମଲା ରୁଜୁ ହୋଇଛି ଯେତେବେଳେ ତାଙ୍କର ବିବାଦୀୟ ବୟାନ ମୁମ୍ବାଇରେ ସୁଟିଂ ହୋଇଥିବା ଏବଂ ୟୁଟ୍ୟୁବରେ ରିଲିଜ୍ ହୋଇଥିବା ଏକ ଶୋ’ରେ ଆସିଥିଲା।

ମଙ୍ଗଳବାର ଜାତୀୟ ମହିଳା କମିଶନ (NCW) କମେଡି ଶୋ' 'ଇଣ୍ଡିଆଜ୍ ଗଟ୍ ଲାଟେଣ୍ଟ୍'ରେ ଦିଆଯାଇଥିବା ଆପତ୍ତିଜନକ ମନ୍ତବ୍ୟ ଉପରେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ରଣବୀର ଆଲ୍ଲାହାବାଡ଼ିଆ ଏବଂ ଅନ୍ୟମାନଙ୍କୁ ଫେବୃଆରୀ ୧୭ରେ ହାଜର ହେବାକୁ ନିର୍ଦ୍ଦେଶ ଦେଇଛନ୍ତି। ଆହ୍ଲାବାଦିଆ, ସମୟ ରୈନା, ଅପୂର୍ବ ମାଖିଜା, ଜସପ୍ରୀତ ସିଂହ ଏବଂ ଆଶିଷ ଚାଞ୍ଚଲାନିଙ୍କ ଭଳି କଣ୍ଟେଣ୍ଟ୍‌ ନିର୍ମାତାଙ୍କ ଦ୍ୱାରା କରାଯାଇଥିବା ଅଶ୍ଳୀଳ ଏବଂ ଆପତ୍ତିଜନକ ମନ୍ତବ୍ୟକୁ କମିଶନ ଗମ୍ଭୀରତାର ସହ ନେଇଛି।