ନୂଆଦିଲ୍ଲୀ: ଆପଣଙ୍କ ସହ ଏମିତି କେବେ ହେଇଛି କି ? କେହି ଜଣେ କଲ୍ କରି ନିଜକୁ ବ୍ୟାଙ୍କ ଅଫିସର କିମ୍ବା ପୁଲିସ ଅଫିସର ବୋଲି ପରିଚୟ ଦେଇଛି, ଆଉ ଆପଣଙ୍କ ବ୍ୟାଙ୍କିଙ୍ଗ୍ ଡିଟେଲ୍ସ ନେଇ ଟଙ୍କା ହଡ଼ପ କରିଛି। ସାଧାରଣ ଲୋକଙ୍କ ପକ୍ଷେ ଏସବୁ ଠକେଇ ଜାଣିବା କଷ୍ଟକର। ଖାସ୍ ଏଇଥିପାଇଁ ସାଇବର ଅପରାଧକୁ ରୋକିବାକୁ RBI ଏକ ନୂଆ ପଦକ୍ଷେପ ନେଇଛି। ଦୁଇଟି ନମ୍ବର ସିରିଜ୍ ଜାରି କରିଛି। ଫଳରେ ଆପଣ କଲ୍ଟି ଫେକ୍ ନା ସତ କଲ ଜାଣିପାରିବେ। କେମିତି ପଢ଼ନ୍ତୁ ପୂରା ରିପୋର୍ଟ।
ଯୁଗ ଯେତେ ଆଡ୍ଭାନ୍ସ ହେଉଛି ଠକେଇ ବି ସେତେ ଆଡଭାନ୍ସ ଦିଗରେ ବଢ଼ି ଚାଲିଛି। ଡିଜିଟାଲ୍ ଯୁଗରେ ଏବେ ସାଇବର ଠକଙ୍କ ପାର୍ଦୁଭାବ ଅନେକ ବଢି ଯାଇଛି। ଅନେକ ସମୟରେ ସାଇବର ଠକମାନେ ବ୍ୟାଙ୍କ ନାଁରେ କଲ୍ କରି ଲୋକଙ୍କୁ ଠକୁଛନ୍ତି। ଯାହା ଚିନ୍ତା କାରଣ ପାଲଟିଛି। ଅବଶ୍ୟ ଏନେଇ ବ୍ୟାପକ ପଦକ୍ଷେପ ମଧ୍ୟ ନିଆଯାଉଛି । ତଥାପି ସଂପୂର୍ଣ୍ଣ ଭାବରେ ରୋକ ଲଗାଯାଇ ପାରିନାହଁ। ହେଲେ ଏଥର RBI ଏକ ନୂଆ ଯୋଜନା କରିଛି। ଯାହାଦ୍ୱାରା ଏଭଳି ଠକାମୀକୁ ରୋକିହେବ। RBI ଦୁଇଟି ସ୍ତ୍ରତନ୍ତ୍ର ନମ୍ବର ଜାରି କରିଛି। ଯାହାଦ୍ୱାରା ବ୍ୟାଙ୍କ୍ ନାଁରେ ଆସୁଥିବା ଫ୍ରଡ୍ କଲ୍କୁ ଚିହ୍ନଟ କରାଯାଇପାରିବ।
ବ୍ୟାଙ୍କିଙ୍ଗ କଲ୍ ପାଇଁ ରିଜର୍ବ ବ୍ୟାଙ୍କ୍ ସ୍ୱତନ୍ତ୍ର ନମ୍ବର ସିରିଜ ଜାରି କରିଛି। ଆର୍ଥିକ ସଂସ୍ଥାଗୁଡ଼ିକ ସେମାନଙ୍କ ଗ୍ରାହକଙ୍କୁ କାରବାର ଏବଂ ମାର୍କେଟିଂ କଲ୍ କରିବାକୁ ହେଲେ ଏଣିକି ଏହି ସ୍ୱତନ୍ତ୍ର ନମ୍ବର ସିରିଜ୍ ବ୍ୟବହାର କରିବାକୁ ପଡ଼ିବ। ଆରବିଆଇର ବିଜ୍ଞପ୍ତି ଅନୁଯାୟୀ ବ୍ୟାଙ୍କଗୁଡ଼ିକ ବର୍ତ୍ତମାନ କାରବାର ସମ୍ବନ୍ଧରେ ଗ୍ରାହକଙ୍କୁ କଲ୍ କରିବାକୁ ହେଲେ, ସେମାନଙ୍କୁ ୧୬୦୦ ନମ୍ବର ସିରିଜ ନମ୍ବର ବ୍ୟବହାର କରିବାକୁ ପଡ଼ିବ। କୌଣସି ଏସଏମଏସ ପଠାଇଲେ ୧୪୦ ନମ୍ବର ସିରିଜ୍ ବ୍ୟବହାର କରିବା ବାଧ୍ୟତାମୂଳକ କରାଯାଇଛି।
ଉଦାହରଣ ସହ ଆଉ ଟିକେ ସରଳ ଭାଷାରେ ବୁଝନ୍ତୁ। ଯଦି ଆପଣ କୌଣସି ନେଣଦେଣ କରୁଛନ୍ତି, ଆଉ ଏଥିପାଇଁ ବ୍ୟାଙ୍କ୍ରୁ କଲ୍ ଆସିବାର ଅଛି, ତେବେ ବ୍ୟାଙ୍କ ଆପଣଙ୍କୁ ୧୬୦୦ ନମ୍ବର ସିରିଜ୍ରୁ ଆରମ୍ଭ ହେଉଥିବା ନମ୍ବରରୁ କଲ୍ ଆସିବ। ଯାହାଦ୍ୱାରା ଆପଣ ନିଶ୍ଚିତ ହୋଇପାରିବେ ଯେ, ଏହି କଲ୍ ବ୍ୟାଙ୍କରୁ ହିଁ ଆସିଛି। ସେହିଭଳି କୌଣସି ଏସଏମଏସ କରିବାକୁ ହେଲେ କିମ୍ବା ଏସଏମଏସ ଆସିବାର ଥିଲେ, ତାହା ୧୪୦ରୁ ଆରମ୍ଭ ହେଉଥିବା ନମ୍ବର ସିରିଜରୁ ଆସିବ। ଏହି ପଦକ୍ଷେପ ଦ୍ୱାରା ଠକେଇ ମାମଲାକୁ କମ୍ କରାଯାଇପାରିବ।
