ଭଦ୍ରକ ୦୭।୧୧: ରାତିରେ ଚୋରି ହେଉଥିଲା ଗୋରୁ । ଖବର ପାଇ ଗୋରୁ ବୋଝେଇ ସ୍କର୍ପିଓ ଗାଡ଼ି ଘେରିଲେ ଗ୍ରାମବାସୀ। ହୋ ହାଲ୍ଲା ହେବାରୁ ଗାଡି ଛାଡି ଚମ୍ପଟ ମାରିଲେ ଚୋର । ଭଦ୍ରକ ଜିଲ୍ଲା ଗଣ୍ଡଗରା ଠାରେ ଏଭଳି ଘଟଣା ଘଟିଛି।
ଖବର ଅନୁଯାୟୀ, ଭଦ୍ରକ ଗଣ୍ଡଗରା ନିକଟରେ ଏକ ନାଲି ସ୍କର୍ପିଓ ଛିଡା ହୋଇଥିଲା । ବିଳମ୍ବିତ ରାତିରେ ଗୋରୁ ଚୋରି କରୁଥିବାର ସନ୍ଦେହ କରି ଗ୍ରାମବାସୀମାନେ ଘେରିଯାଇଥିଲେ। ଗ୍ରାମବାସୀମାନେ ଏକାଠି ହେବା ଦେଖି ଗୋରୁ ଚୋରମାନେ ଗାଡି ଛାଡି ଚମ୍ପଟ ମାରିଥିଲେ। ସେପଟେ ଘଟଣା ସଂପର୍କରେ କେନ୍ଦୁଆପଦା ଥାନାକୁ ଖବର ଦିଆଯାଇଥିଲା । ହେଲେ ଖବର ଲେଖା ହେବା ପର୍ଯ୍ୟନ୍ତ ପୋଲିସ ଟିମ୍ ପହଞ୍ଚିନଥିବା ସୂଚନା ମିଳିଛି ।
ତେବେ ଗାଁ ଲୋକଙ୍କ ମତରେ, ପୂର୍ବରୁ ଏହିପରି ଭାବେ ଅନେକ ଥର ଗୋରୁ ଚୋରି ଉଦ୍ୟମ କରି ଫେଲ୍ ହୋଇଛନ୍ତି ବେପାରୀ । ଗାଁରେ ଜଣେ ବ୍ୟକ୍ତି ସାମିଲ ଥିବା ଅଭିଯୋଗ କରିଛନ୍ତି ଗ୍ରାମବାସୀ ।
