ଚଣ୍ଡିଖୋଲ ୨୦।୧୧ : ଯାଜପୁର ଜିଲ୍ଲା ବଡ଼ଚଣା ବ୍ଲକ ସିହା ପଞ୍ଚାୟତରେ ନିର୍ମାଣଧୀନ ଉତ୍କଳ ବିଶ୍ୱବିଦ୍ୟାଳୟର ଗ୍ରାମୀଣ କ୍ୟାମ୍ପସ କାର୍ଯ୍ୟକୁ ବନ୍ଦ କରିଛନ୍ତି ସ୍ଥାନୀୟ ମୁଷ୍ଟିମେୟ ଲୋକେ । ସିହା ଠାରେ ନିର୍ମାଣଧୀନ ଅବସ୍ଥାରେ ରହିଛି ଉତ୍କଳ ବିଶ୍ୱବିଦ୍ୟାଳୟର ଗ୍ରାମୀଣ କ୍ୟାମ୍ପସ କାର୍ଯ୍ୟ । ଖୁବଶୀଘ୍ର କାର୍ଯ୍ୟ ଶେଷ ହେଲେ ଛାତ୍ରଛାତ୍ରୀମାନେ ଧନ୍ଦାମୂଳକ ଶିକ୍ଷାର ସୁଯୋଗ ପାଇପାରିବେ । ହେଲେ ଚାଲିଥିବା ଉନ୍ନତିମୂଳକ କାର୍ଯ୍ୟକୁ ସ୍ଥାନୀୟ ଅଞ୍ଚଳର କିଛି ମୁଷ୍ଟିମେୟ ଲୋକ ବାରମ୍ବାର କ୍ୟାମ୍ପସ କାମକୁ ବନ୍ଦ କରୁଛନ୍ତି । ଯାହାକୁ ନେଇ ଚିନ୍ତାରେ ପଡିଛନ୍ତି କାର୍ଯ୍ୟ କରୁଥିବା ଠିକାସଂସ୍ଥା ଓ ଶ୍ରମିକ । ବିଶେଷ କରି ଏହି କ୍ୟାମ୍ପସ କାର୍ଯ୍ୟରେ ଶତାଧିକ ଶ୍ରମିକମାନେ ନିୟୋଜିତ ହୋଇଛନ୍ତି । କାର୍ଯ୍ୟ ବନ୍ଦ ରହିବା ଫଳରେ ଶ୍ରମିକମାନେ ବେଶ୍‌ ପ୍ରଭାବିତ ହେଉଛନ୍ତି ।ତେବେ କାମ ବନ୍ଦ ରହୁଥିବାରୁ ଅନିଶ୍ଚିତତା ମଧ୍ୟରେ ବିଶ୍ୱବିଦ୍ୟାଳୟର ଗ୍ରାମୀଣ କ୍ୟାମ୍ପସ କାର୍ଯ୍ୟ । ତେଣୁ ଏ ସମସ୍ୟାର ସମାଧାନ ପାଇଁ ପ୍ରଶାସନ ନିକଟରେ ଠିକାସଂସ୍ଥା ଓ ଶ୍ରମିକମାନେ ଦାବି କରିଛନ୍ତି ।