ଯାଜପୁର ୧୦।୧୨ : ଦୁଇ ଟ୍ରକ ମଧ୍ୟରେ ମୁହାଁମୁହିଁ ଧକ୍କା । ଏହି ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଆଉ ଜଣେ ଗୁରୁତର ହୋଇଛନ୍ତି । ଗୁରୁତର ଅବସ୍ଥାରେ ଗୁରୁତରଙ୍କୁ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ଯାଜପୁର ୧୬ ନମ୍ବର ଜାତୀୟ ରାଜପଥ ପାଣିକୋଇଲି ଥାନା ସାହାପୁର ବ୍ରିଜ୍ରେ ଘଟିଛି ଏହି ଦୁର୍ଘଟଣା ।
ଜାତୀୟ ରାଜପଥ ସାହାପୁର ନିକଟ ଖରସ୍ରୋତା ନଦୀ ବ୍ରିଜର ମରାମତି କାମ ଚାଲିଛି । ଏଥିପାଇଁ ବ୍ରିଜ୍ର ଗୋଟିଏ ପଟ ବନ୍ଦ ରଖାଯାଇଥିବା ବେଳେ ଆଉ ଗୋଟିଏ ପଟେ ଗାଡି ଚଳାଚଳା କରାଯାଉଛି । ମଙ୍ଗଳବାର ଦିନ ସକାଳ ସମୟରେ ଖରସ୍ରୋତା ନଦୀ ବ୍ରିଜ୍ ଉପରେ ଏକ ଫଳ ବୋଝେଇ ଟ୍ରକ ସହ ଅନ୍ୟ ଏକ ଟ୍ରକର ମୁହାଁମୁହିଁ ଧକ୍କା ହୋଇଥିଲା । ଯାହାଫଳରେ ଜଣେ ଟ୍ରକ ଚାଳକଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଚାଳକ ଚାପି ହୋଇ ରହିଥିଲେ ।
ସେପଟେ ଦୁର୍ଘଟଣା ସଂପର୍କରେ ଖବର ପାଇ ପୋଲିସ ଓ ଅଗ୍ନିଶମ ବାହିନୀ କର୍ମଚାରୀ ଘଟଣାସ୍ଥଳରେ ପହଞ୍ଚି ଗୁରୁତରଙ୍କୁ ଉଦ୍ଧାର କରିଥିଲେ । ଗୁରୁତର ଅବସ୍ଥାରେ ଡ୍ରାଇଭରଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ତେବେ ଦୁର୍ଘଟଣା ଲାଗି ଜାତୀୟ ରାଜପଥରେ ଗାଡି ଚଳାଚଳା ବନ୍ଦ ରହିଥିବା ବେଳେ ଉଭୟ ପଟେ ହଜାର ହଜାର ଗାଡି ଅଟକି ରହିଛି ।
