ପ୍ରୟାଗରାଜ ୨୯।୧: ମହାକୁମ୍ଭର ଦ୍ୱିତୀୟ ଅମୃତ ସ୍ନାନ ପର୍ବ ବୁଧବାର ସମ୍ପନ୍ନ ହୋଇଯାଇଛି। ମୌନୀ ଅମାବାସ୍ୟା ସ୍ନାନ ଅବସରରେ ଘଟିଥିବା ଦଳାଚକଟା ଯୋଗୁ ଆଖଡାମାନେ ସମ୍ବେଦନଶୀଳତାକୁ ଦେଖି ପ୍ରଥମେ ଶ୍ରଦ୍ଧାଳୁଙ୍କୁ ଅମୃତ ସ୍ନାନ ସୁଯୋଗ ଦେଇଛନ୍ତି ଓ ପରେ ନିଜେ ସାଂକେତିକ ଅମୃତ ସ୍ନାନ କରିଛନ୍ତି। ପ୍ରଶାସନ ପକ୍ଷରୁ ଦିଆଯାଇଥିବା ସୂଚନା ଅନୁସାରେ ମୌନୀ ଅମାବାସ୍ୟା ଅମୃତ ସ୍ନାନ ଯୋଗରେ ସନ୍ଧ୍ୟା ୬ଟା ସୁଦ୍ଧା କୋଟିକୋଟି ଲୋକେ ପୁଣ୍ୟ ବୁଡ ପକାଇଛନ୍ତି।
ମହାକୁମ୍ଭରେ ଘଟିଥିବା ଘଟଣାରେ ଆଖଡାର ସନ୍ଥମାନେ ସମ୍ବେଦନଶୀଳତା ପ୍ରଦର୍ଶନ କରିଛନ୍ତି। ମହାକୁମ୍ଭରେ ଏହା ପ୍ରଥମ ଥର ଯେବେ ସାଧୁ ଓ ନାଗାମାନେ ସଙ୍ଗମରେ ଐତିହାସିକ ପ୍ରଥମ ସ୍ନାନ ପ୍ରତିଜ୍ଞାର ପରମ୍ପରା ଭଙ୍ଗ କରିଛନ୍ତି। ପରିସ୍ଥିତିକୁ ଦେଖି ଆଖଡାମାନେ ସେମାନଙ୍କ ବ୍ରହ୍ମ ମୁହୂର୍ତ୍ତ ସ୍ନାନକୁ ସ୍ଥଗିତ କରିବା ସହ ଶ୍ରଦ୍ଧାଳୁଙ୍କୁ ପ୍ରଥମ ସ୍ନାନ ନିମନ୍ତେ ଅବସର ଦେଇଛନ୍ତି। ଅଖିଳ ଭାରତୀୟ ଆଖଡା ପରିଷଦର ଅଧ୍ୟକ୍ଷ ମହନ୍ତ ରବିନ୍ଦ୍ର ପୁରୀ କହିଛନ୍ତି ଯେ ସବୁ ଆଖଡା ସର୍ବସମ୍ମତ ନିଷ୍ପତ୍ତି ନେଇଛନ୍ତି ଯେ ପରିସ୍ଥିତିକୁ ଦେଖି ପ୍ରଥମେ ଶ୍ରଦ୍ଧାଳୁଙ୍କୁ ଅମୃତ ସ୍ନାନର ଅବସର ଦିଆଯିବ।
ପରେ ସ୍ଥିତି ସ୍ୱଭାବିକ ହେବା ପରେ ଆଖଡାମାନେ ସେମାନଙ୍କ ଭବ୍ୟ ଅମୃତ ସ୍ନାନ ପରମ୍ପରାକୁ ତ୍ୟାଗ କରି ନିରାଡମ୍ବର ଭାବେ ସାଂକେତିକ ସ୍ନାନ କରି ପରମ୍ପରା ନିର୍ବାହ କରିଛନ୍ତି। ପ୍ରୟାଗରାଜ ମହାକୁମ୍ଭରେ ମୌନୀ ଅମାବାସ୍ୟାର ଦ୍ୱିତୀୟ ଅମୃତ ସ୍ନାନରେ ଦେଶର ତିନି ପୀଠର ଶଙ୍କରାଚାର୍ଯ୍ୟମାନେ ମଧ୍ୟ ତ୍ରିବେଣୀ ସଙ୍ଗମରେ ବୁଡ ପକାଇଛନ୍ତି। ଏହି ଅବସରରେ ଶଙ୍କରାଚାର୍ଯ୍ୟମାନେ ଶ୍ରଦ୍ଧାଳୁଙ୍କୁ ସଞ୍ଜମତା ଅବଲମ୍ବନ କରିବାକୁ ନିବେଦନ କରିଛନ୍ତି।
ଶୃଙ୍ଗେରୀ ଶାରଦାପୀଠାଧିଶ୍ୱର ଜଗତଗୁରୁ ଶଙ୍କରାଚାର୍ଯ୍ୟ ସ୍ୱାମୀ ବିଧୁଶେଖର ଭାରତୀଜୀ, ଦ୍ୱାରକା ଶରଦାପୀଠାଧିଶ୍ୱର ଜଗତଗୁରୁ ଶଙ୍କରାଚାର୍ଯ୍ୟ ସ୍ୱାମୀ ସଦାନନ୍ଦ ସରସ୍ୱତୀଜୀ ଓ ଜ୍ୟୋତିଷ ପୀଠାଧିଶ୍ୱର ଶଙ୍କରାଚାର୍ଯ୍ୟ ସ୍ୱାମୀ ଅଭିମୁକ୍ତେଶ୍ୱରାନନ୍ଦ ସରସ୍ୱତୀ ମୌନୀ ଅମାବାସ୍ୟାର ଅମୃତ ସ୍ନାନ ପର୍ବ ଅବସରରେ ତ୍ରୀବେଣୀ ସଙ୍ଗମରେ ପବିତ୍ର ବୁଡ଼ ପକାଇଛନ୍ତି। ଏଥି ପାଇଁ ୩ ପୀଠର ଶଙ୍କରାଚାର୍ଯ୍ୟ ମୋଟର ବୋଟରେ ତ୍ରିବେଣୀ ସଙ୍ଗମ ପହଞ୍ଚିଥିଲେ। ଯେଉଁଠାରେ ସେମାନେ ପୂର୍ଣ୍ଣ ଧାର୍ମିକ ବିଧିବିଧାନରେ ବୁଡ ପକାଇଛନ୍ତି ଓ ଦେଶର କଲ୍ୟାଣ ନିମନ୍ତେ ଆଶିର୍ବାଦ ପ୍ରଦାନ କରିଛନ୍ତି।
