ଭୁବନେଶ୍ୱର ୧୨।୧୧ : ଭିନ୍ନ ଭିନ୍ନ ସ୍ଥାନରେ ଦୁଇଟି ଦୁର୍ଘଟଣା । ସୋମବାର ବିଳମ୍ବିତ ରାତିରେ ଭୁବନେଶ୍ୱରର ଦୁଇଟି ସ୍ଥାନରେ ଘଟିଛି ଦୁର୍ଘଟଣା । ଏହି ଦୁଇ ଦୁର୍ଘଟଣାରେ ଏକାଧିକ ଲୋକ ଆହତ ହୋଇଥିବା ଜଣାପଡିଛି । ସମସ୍ତ ଆହତଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି ।
ଖବର ଅନୁଯାୟୀ, ବିଳମ୍ବିତ ରାତିରେ ନୟାପଲ୍ଲୀ ଏକାମ୍ର ଭିଲା ଛକରେ ଏକ ଭୋଲବୋ କାରକୁ ପିଟିଥିଲା ସ୍ଵିଫ୍ଟ ଡିଜାର । ଯେଉଁଥିରେ ଦୁଇ ଜଣ ଯାତ୍ରୀ ଆହତ ହୋଇଥିଲେ । ଘଟଣାସ୍ଥଳରେ ସ୍ଥାନୀୟ ଲୋକେ ଦୁଇ ଜଣଙ୍କୁ ଉଦ୍ଧାର କରି ପିସିଆର ଡାକିଥିଲେ । ପୋଲିସ୍ ପହଞ୍ଚି ଆହତଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଛନ୍ତି । ତେବେ ଭୋଲବୋ କାରରେ ବସିଥିବା ଚାଳକ ଏବଂ ଅନ୍ୟ ଜଣେ ବ୍ୟକ୍ତିଙ୍କ ସମ୍ପୁର୍ଣ୍ଣ ଭାବେ ସୁସ୍ଥ ଅଛନ୍ତି।
ସେହିପରି ରାଜଧାନୀର ଆଉ ସ୍ଥାନରେ ଭୟଙ୍କର ଦୁର୍ଘଟଣା ଘଟିଛି । ସହିଦନଗର ଥାନା ସମ୍ମୁଖ ଦେଇଯାଇଥିବା ଜାତୀୟ ରାଜପଥର ଓଭରବ୍ରିଜ ଉପରେ ଟ୍ରକ ଧକ୍କାରେ ଜଣେ ଯୁବକ ୫୦ ମିଟର ପର୍ଯ୍ୟନ୍ତ ଘୋଷାଡି ହୋଇ ଗୁରୁତର ହୋଇଥିଲେ । ଗୁରୁତର ଅବସ୍ଥାରେ ଛଟପଟ ହେଉଥିବାବେଳେ ସେହି ରାସ୍ତାରେ ଦେଇ ଯାଉଥିବା ବାଇକ୍ ଆରୋହୀ ଜଣଙ୍କ ଆମ୍ବୁଲାନ୍ସ ସହ ପୋଲିସଙ୍କୁ ଖବର ଦେଇଥିଲେ। ତୁରନ୍ତ ପୋଲିସ୍ ପହଞ୍ଚିବା ସହ ଆମ୍ବୁଲାନ୍ସ ପହଞ୍ଚି ଗୁରୁତର ଯୁବକଙ୍କୁ କ୍ୟାପିଟାଲ ହସ୍ପିଟାଲକୁ ନେଇଛନ୍ତି । ତାଙ୍କର ଅବସ୍ଥା ସଙ୍କଟାପନ୍ନ ରହିଥିବା ଜଣାପଡିଛି ।
