ନୂଆଦିଲ୍ଲୀ: କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟା ବୁଧବାର ବିଜେପି ବିରୋଧରେ ସଙ୍ଗୀନ ଅଭିଯୋଗ କରିଛନ୍ତି । କର୍ଣ୍ଣାଟକ ସିଏମ୍ ଅଭିଯୋଗ କରିଛନ୍ତି ଯେ ମୁଖ୍ୟ ବିରୋଧୀ ଦଳ ବିଜେପି ତାଙ୍କ ସରକାର ଭାଙ୍ଗିବା ପାଇଁ ୫୦ କଂଗ୍ରେସ ବିଧାୟକଙ୍କୁ ୫୦-୫୦ କୋଟି ଟଙ୍କା ଅଫର୍ କରୁଛି । କିନ୍ତୁ ଜଣେ ବି କଂଗ୍ରେସ ବିଧାୟକ ବିଜେପିର ଏହି ପ୍ରଲୋଭନରେ ଫସି ନାହାନ୍ତି । ମହୀଶୂର ଜିଲ୍ଲାର ଟି.ନରସିପୁରା ବିଧାନସଭା କ୍ଷେତ୍ରରେ ୪୭୦ କୋଟି ଟଙ୍କା ସରକାରୀ ପ୍ରକଳ୍ପ ଉଦଘାଟନ କରିବା ପରେ ସିଏମ୍ ସିଦ୍ଦରମୈୟା ଏହି ଅଭିଯୋଗ କରିଛନ୍ତି ।
କର୍ଣ୍ଣାଟକ ସିଏମ୍ ପ୍ରଶ୍ନ କରିଛନ୍ତି, ‘ସିଦ୍ଦରମୈୟ ସରକାରକୁ ଭାଙ୍ଗିବା ପାଇଁ ସେମାନେ (ବିଜେପି) ୫୦ ବିଧାୟକଙ୍କୁ ୫୦ କୋଟି ଟଙ୍କ ଲେଖାଏ ଅଫର୍ କରିଛି । ସେମାନଙ୍କ ପାଖରେ ଏତେ ଟଙ୍କା ଆସିଲା କେଉଁଠୁ ? ପୂର୍ବତନ ମୁଖ୍ୟମନ୍ତ୍ରି ବିଏସ୍ ୟେଦିୟୁରପ୍ପା, ବସଭରାଜ ବୋମ୍ମଇ, ବିରୋଧୀ ଦଳ ନେତା ଆର୍ ଅଶୋକ ନା ବିଜେପି ପ୍ରଦେଶ ଅଧ୍ୟକ୍ଷ ବିୱାଇ ବିଜୟେନ୍ଦ୍ର ଏହି ଟଙ୍କା ଛାପିଛନ୍ତି ?’ ସେ କହିଛନ୍ତି ଯେ ଏହି ସବୁ ଲାଞ୍ଚର ଟଙ୍କା ।
ମୁଖ୍ୟମନ୍ତ୍ରୀ ଅଭିଯୋଗ କରିଛନ୍ତି, 'ବିଜେପି ଲାଞ୍ଚ ନେଇ କୋଟି କୋଟି ଟଙ୍କା ରଖିଛି । ଏବେ ସେହି ଟଙ୍କା ବଳରେ ବିଧାୟକଙ୍କୁ କିଣିବାକୁ ଚାହୁଁଛି । ସେମାନେ ପ୍ରତ୍ୟେକ ବିଧାୟକଙ୍କୁ ୫୦ କୋଟି ଟଙ୍କାର ଅଫର୍ ଦେଇଛନ୍ତି । ଏବେ ସେମାନେ ଯେକୌଣସି ଉପାୟରେ ଏହି ସରକାରକୁ ହଟାଇବା ପାଇଁ ଅଭିଯାନ ଚଲାଇଛନ୍ତି । ଏଥିପାଇଁ ଏବେ ସେମାନେ ମିଛ ମାମଲା ରୁଜୁ କରୁଛନ୍ତି ।'
ତେବେ ଏହା ପ୍ରଥମ ଥର ନୁହେଁ, ଯେତେବେଳେ କଂଗ୍ରେସ ଏଭଳି ଅଭିଯୋଗ କରିଛି । ଗତ ମାସରେ ବି ସିଦ୍ଦରମୈୟା ଅଭିଯୋଗ କରି ରାଜ୍ୟରେ ଅପରେସନ କମଲ ପାଇଁ ପ୍ରସ୍ତୁତି ଚାଲିଥିବା କହିଥିଲେ । ସେତେବେଳେ କିନ୍ତୁ ସେ ବିଜେପିର ନାଁ ନେଇ ନଥିଲେ । ଉଲ୍ଲେଖଯୋଗ୍ୟ ଯେ ୨୦୧୯ରେ କଂଗ୍ରେସ-ଜେଡିଏସ ସରକାର ୧୭ ବିଧାୟକ ଦଳବଦଳ କରିବା କାରଣରୁ ୧୪ରେ ଭାଙ୍ଗି ଯାଇଥିଲା ।
