ନୂଆଦିଲ୍ଲୀ: ଖୁଚୁରା ଅର୍ଥବ୍ୟବସ୍ଥାର ମେରୁଦଣ୍ଡକୁ ଦୁର୍ବଳ କରୁଛି ବ୍ଲିଙ୍କିଟ୍, ଇନଷ୍ଟାମାର୍ଟ, ଜେପଟୋ, ସ୍ବିଗି ଏବଂ ଜମାଟୋ । ଫ୍ଲାଟ୍ ଫର୍ମଗୁଡ଼ିକର ଅନିୟନ୍ତ୍ରିତ ଅଭିବୃଦ୍ଧି କ୍ଷୁଦ୍ର ବ୍ୟବସାୟୀଙ୍କ ପାଇଁ ବିପଦ ସୃଷ୍ଟି କରିଛି । ଯାହାଫଳରେ କୋଟି କିରାଣା ଷ୍ଟୋରର ବ୍ୟବସାୟ ଏବେ ସଂକଟ । କ୍ୱିକ୍ କମର୍ସ ପ୍ଲାଟ୍ଫର୍ମଗୁଡ଼ିକ ଅନୁଚିତ ଉପାୟରେ ବ୍ୟବସାୟ କରୁଥିବା ନେଇ ବ୍ୟବସାୟୀ ସଂଘ କନ୍ଫେଡେରେଶନ୍ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ ଅଭିଯୋଗ କରିଛି । ବୁଧବାର ସଂଘ ପକ୍ଷରୁ ଏକ ଶ୍ୱେତପତ୍ର ଜାରି କରାଯାଇଛି ।
କମ୍ପାନିଗୁଡ଼ିକର କାର୍ଯ୍ୟପ୍ରଣାଳୀକୁ ନେଇ ଚିନ୍ତା ବ୍ୟକ୍ତ କରିଛି ସଂଘ । କ୍ୱିକ୍ କମର୍ସ ପ୍ଲାଟ୍ଫର୍ମଗୁଡ଼ିକର କାର୍ଯ୍ୟପ୍ରଣାଳୀ ଭାରତର ଖୁଚୁରା ଅର୍ଥବ୍ୟବସ୍ଥାର ମେରୁଦଣ୍ଡକୁ ଦୁର୍ବଳ କରିଦେଲାଣି । ତିନି କୋଟି କିରାଣା ଷ୍ଟୋର ଏବେ ସଂକଟରେ ରହିଛନ୍ତି । କ୍ଷୁଦ୍ର ବ୍ୟବସାୟୀମାନଙ୍କ ସ୍ୱାର୍ଥ ରକ୍ଷା ପାଇଁ ଏଥିରେ ନିୟାମକ ସଂସ୍ଥାଗୁଡ଼ିକର ହସ୍ତକ୍ଷେପ ଲୋଡ଼ିଛି ସଂଘ । ସିଏଆଇଟିର ରାଷ୍ଟ୍ରୀୟ ମହାସଚିବ ପ୍ରବୀଣ ଖଣ୍ଡେଲୱାଲ କହିଛନ୍ତି ଯେ, ଏହି ପ୍ଲାଟ୍ଫର୍ମଗୁଡ଼ିକ ଯୋଗାଣକାରୀଙ୍କ ଉପରେ ନିୟନ୍ତ୍ରଣ ହାସଲ କରିବା, ଇନ୍ଭେଣ୍ଟୋରି ଉପରେ ପ୍ରଭୂତ୍ୱ ଏବଂ ଅନୁଚିତ ମୂଲ୍ୟ ନିର୍ଦ୍ଧାରଣ ପାଇଁ ଏଫ୍ଡିଆଇ ବା ବିଦେଶୀ ପ୍ରତ୍ୟକ୍ଷ ପୁଞ୍ଜିନିବେଶ ଆଇନର ଦୁରୂପଯୋଗ କରୁଛନ୍ତି । ଏ ରଣନୀତି ଏକ ଅସମାନ ବଜାର ସୃଷ୍ଟି କରୁଛି, ଯେଉଁଠି ୩ କୋଟି କିରାଣା ଷ୍ଟୋର ତିଷ୍ଠିବା ପ୍ରାୟତଃ ଅସମ୍ଭବ ହୋଇଗଲାଣି । ଏହି ପ୍ଲାଟ୍ଫର୍ମଗୁଡ଼ିକ ଛୋଟ ଛୋଟ ଖୁଚୁରା ବିକ୍ରେତାଙ୍କୁ ବଜାରରୁ ତଡ଼ିବା ଭଳି କାର୍ଯ୍ୟ କରୁଛନ୍ତି । ଶ୍ୱେତପତ୍ରରେ କୁହାଯାଇଛି ଯେ, କ୍ୱିକ୍ କମର୍ସ କମ୍ପାନିଗୁଡ଼ିକ ଏଫ୍ଡିଆଇ ନୀତି ଏବଂ ଭାରତର ପ୍ରତିସ୍ଫର୍ଦ୍ଧା ଆଇନର ଉଲ୍ଲଂଘନ କରୁଛନ୍ତି । ଏସବୁ ଉଲ୍ଲଂଘନ ସହିତ ପାରଦର୍ଶିତାର ଅଭାବ କେବଳ କ୍ଷୁଦ୍ର ବ୍ୟବସାୟୀଙ୍କୁ କ୍ଷତି ପହଞ୍ଚାଉନାହିଁ, ବରଂ ସମ୍ପୂର୍ଣ୍ଣ ଖୁଚୁରା ଇକୋସିଷ୍ଟମ୍କୁ ବିକୃତ କରୁଛି । ସିଏଆଇଟି ଏହା ଉପରେ ନିୟାମକ ସଂସ୍ଥାଗୁଡ଼ିକର ହସ୍ତକ୍ଷେପ ଲୋଡ଼ିଛି, ଯାହାଦ୍ୱାରା କ୍ୱିକ୍ କମର୍ସ ପ୍ଲାଟ୍ଫର୍ମଗୁଡ଼ିକ ନିରପେକ୍ଷ ପ୍ରଥାଗୁଡ଼ିକର ପାଳନ କରିବେ ଏବଂ କ୍ଷୁଦ୍ର ବ୍ୟବସାୟୀମାନଙ୍କ ସ୍ୱାର୍ଥରକ୍ଷା ବି ହୋଇପାରିବ ।
ସିଏଆଇଟି ଅଭିଯୋଗ ଆଣିଛି ଯେ, କ୍ୱିକ୍ କମର୍ସ ପ୍ଲାଟ୍ଫର୍ମଗୁଡ଼ିକରେ ୫୪,୦୦୦ କୋଟି ଟଙ୍କାରୁ ଊର୍ଦ୍ଧ୍ୱ ଏଫ୍ଡିଆଇ ରହିଛି । ଏହି ନିବେଶର ଉପଯୋଗ ଭିତ୍ତିଭୂମି ନିର୍ମାଣରେ ବ୍ୟବହାର ହୋଇନାହିଁ କିମ୍ବା ଦୀର୍ଘକାଳୀନ ପରିସମ୍ପତ୍ତି ତିଆରିରେ ମଧ୍ୟ ଏହାର ଉପଯୋଗ ହୋଇନାହିଁ । ବଦଳରେ ଏହି ନିବେଶର ଉପଯୋଗ ପରିଚାଳନାଗତ କ୍ଷତି ଭରଣା, ଯୋଗାଣ ଶୃଙ୍ଖଳ ଉପରେ ନିୟନ୍ତ୍ରଣ ଏବଂ ନିର୍ଦ୍ଦିଷ୍ଟ ବିକ୍ରେତାଙ୍କ ଦ୍ୱାରା ଅନୁଚିତ ରିହାତି ଦେବା ପାଇଁ କରାଯାଉଛି । ଫଳରେ କ୍ୱିକ୍ କମର୍ସ କମ୍ପାନି ଉକ୍ତ ବଜାର ଅଂଶ ହାସଲ କରୁଛନ୍ତି । ଫଳରେ ବୃହତ୍ ଭାଗ ଖୁଚୁରା ବିକ୍ରେତାଙ୍କ ଅସ୍ଥିତ୍ୱ ଯିବାକୁ ବସିଲାଣି ।
