ବଲିଉଡରେ ଦିନକୁ ଦିନ ବଢ଼ିଚାଲିଛି ପୌରାଣିକ କାହାଣୀ । ଡିସେମ୍ବର ମାସରେ ମୁକ୍ତି ପାଉଛି ଛତ୍ରପତି ଶିବାଜିଙ୍କ ପୁତ୍ର ଶମ୍ଭୁଜିଙ୍କ ଜୀବନୀଚିତ୍ର ‘ଛାଭା’ । ଫିଲ୍ମଟିରେ ମୁଖ୍ୟ ଚରିତ୍ରରେ ଅଭିନୟ କରିଛନ୍ତି ଭିକି କୌଶଲ। କେବଳ ଇତିହାସ ନିର୍ଭର ସିନେମା ନୁହେଁ, ଭିକି ଆଉ ଗୋଟିଏ ପିରିୟଡ୍ ଡ୍ରାମା ଫିଲ୍ମରେ ମଧ୍ୟ ଦେଖିବାକୁ ମିଳିବେ ବୋଲି ଜଣାପଡିଛି । ସେହି ଫିଲ୍ମରେ ଭିକି ଅବତାର ନିଶ୍ଚିତ ଭାବେ ଦର୍ଶକମାନଙ୍କୁ ଆକର୍ଷିତ କରିବ ବୋଲି ଏବେ ଠାରୁ ଚର୍ଚ୍ଚା ଆରମ୍ଭ ହୋଇଯାଇଛି । ଭିକି ଦର୍ଶକମାନଙ୍କୁ ‘ପର୍ଶୁରାମ’ ଚରିତ୍ରରେ ଦେଖିବାକୁ ମିଳିବେ ।
ଏହି ଫିଲ୍ମ ସମ୍ବନ୍ଧରେ ଏହାର ନିର୍ମାତାମାନେ ସୂଚନା ଦେଇଛନ୍ତି । ଫିଲ୍ମର ଶୀର୍ଷକ ‘ମହାବତାର’ । ଫିଲ୍ମଟିର ପ୍ରଯୋଜନା କରିଛନ୍ତି ଦୀନେଶ ବିଜନ୍ ଏବଂ ନିର୍ଦ୍ଦେଶନାରେ ଅଛନ୍ତି ‘ସ୍ତ୍ରୀ’ ଫେମ୍ ଅମର କୌଶିକ୍ । ଉଲ୍ଲେଖଯୋଗ୍ୟ, ହରର୍ କମେଡି ପରେ ପ୍ରଥମ ଥର ପାଇଁ ଅମର କୌଶିକ୍ କୌଣସି ପିରିୟଡ୍ ଡ୍ରାମା ନିର୍ଦ୍ଦେଶନା ଦେବାକୁ ଯାଉଛନ୍ତି । ଏହି ଫିଲ୍ମର ପୋଷ୍ଟରରେ ବିକ୍କିଙ୍କ ଯେଉଁ ଲୁକ୍ ପ୍ରକାଶ୍ୟକୁ ଆସିଛି, ତାହା ଆକର୍ଷଣୀୟ ବୋଲି କୁହାଯାଉଛି ।
ପେଶିବାହୁଲ୍ୟ ଚେହେରା ଏବଂ କଳାଧଳା ଦୀର୍ଘ କେଶରେ ଦେଖିବାକୁ ମିଳିଛନ୍ତି ଭିକି । ଏହା ସାଙ୍ଗରେ ଲମ୍ବା ଦାଢ଼ି । ଦୁଇ ଆଖିରେ କ୍ରୋଧର ଅଗ୍ନି । ଏହି ଚରିତ୍ର ପାଇଁ ଭିକି ବହୁତ ପରିଶ୍ରମ କରିଥିବା ନେଇ ଜଣାପଡିଛି। ଫିଲ୍ମର ପୋଷ୍ଟରରେ ଭିକିଙ୍କ ଲୁକ୍ ଦେଖି ବଲିଉଡର ଅନେକ ତାରକା ପ୍ରଶଂସା କରିଛନ୍ତି । ଆସନ୍ତା ବର୍ଷ ନଭେମ୍ବର ମାସରୁ ‘ମହାବତାର’ର ସୁଟିଂ ଆରମ୍ଭ ହେବ ।
