ନୂଆଦିଲ୍ଲୀ: ଚେଜିଂରେ କୋହଲିଙ୍କ ବିରାଟ ରେକର୍ଡ । ଲକ୍ଷ୍ୟ ପିଛା କରି ଦିନିକିଆରେ ୮ ହଜାରରୁ ଅଧିକ ରନ୍ କରିବାରେ କୋହଲି ଦ୍ୱିତୀୟ ବ୍ୟାଟର ହୋଇଛନ୍ତି । ଏହାସହ ସେ ମହାନ କ୍ରିକେଟର ସଚିନ ତେନ୍ଦୁଲକରଙ୍କ କ୍ଲବରେ ସାମିଲ ହୋଇଛନ୍ତି । ଦୁବାଇରେ ଅଷ୍ଟ୍ରେଲିଆ ଓ ଭାରତ ମଧ୍ୟରେ ଖେଳାଯାଇଥିବା ଚାମ୍ପିଅନ୍ସ ଟ୍ରଫିର ପ୍ରଥମ ସେମିଫାଇନାଲରେ ସେ ଏହି କୀର୍ତ୍ତିମାନ ସ୍ଥାପନ କରିଛନ୍ତି । ଆଜିର ମ୍ୟାଚ୍ରେ ବିରାଟର ଅର୍ଦ୍ଧଶତକୀୟ ଇନିଂସ ଖେଳିବା ସହ ଦିନିକିଆରେ ରନ୍ ପିଛା କରି ୮ ହଜାରରୁ ଅଧିକ ରନ୍ କରିଛନ୍ତି । ଅଷ୍ଟ୍ରେଲିଆ ବିପକ୍ଷରେ ୨୧ ରନ୍ର ସ୍କୋର ଅତିକ୍ରମ କରି କୋହଲି ଏହି ମାଇଲଖୁଣ୍ଟ ଛୁଇଁଥିଲେ ।
ଅଷ୍ଟ୍ରେଲିଆ ବିପକ୍ଷରେ ଖେଳାଯାଇଥିବା ଏହି ମ୍ୟାଚ୍ରେ କୋହଲି ୫୩ ବଲ୍ରେ ୭୪ତମ ଅର୍ଦ୍ଧଶତକ ହାସଲ କରିଥିଲେ । ଅଷ୍ଟ୍ରେଲିଆ ବିପକ୍ଷରେ ୯୮ ବଲରୁ ୮୪ ରନ୍ କରି ଭାରତର ୩ ନମ୍ବର ବ୍ୟାଟର ବିରାଟ କୋହଲି ଅନେକ ରେକର୍ଡ ଭାଙ୍ଗିଛନ୍ତି । ଏହି ଇନିଂସ ବଳରେ ଭାରତ ଚାରି ୱିକେଟରେ ଅଷ୍ଟ୍ରେଲିଆକୁ ପରାସ୍ତ କରି ଟୁର୍ଣ୍ଣାମେଣ୍ଟର ଫାଇନାଲରେ ପ୍ରବେଶ କରିଛି ।
୩୬ ବର୍ଷୀୟ କୋହଲି ଏହି ମାଇଲଖୁଣ୍ଟ ହାସଲ କରିବା ପାଇଁ ୧୫୯ ଇନିଂସ ନେଇଥିଲେ । ରନ୍-ଚେଜରେ ବିରାଟ କୋହଲି ଦ୍ରୁତତମ ୮୦୦୦ ରନ୍ ପୂରଣ କରିଛନ୍ତି । ୨୩୨ ଇନିଂସରେ ୮୭୨୦ ରନ୍ ସହ ଚେଜିଂରେ ସର୍ବାଧିକ ରନ୍ କରିବାରେ ସଚିନ ତେନ୍ଦୁଲକର ପ୍ରଥମ ସ୍ଥାନରେ ଅଛନ୍ତି । ରୋହିତ ଶର୍ମା ୬୧୧୫ ରନ୍ ସହିତ ତାଲିକାର ତୃତୀୟ ସ୍ଥାନରେ ଅଛନ୍ତି । ବିରାଟ କୋହଲି ତାଙ୍କର ୫୧ଟି ଦିନିକିଆ ଶତକ ମଧ୍ୟରୁ ୨୮ଟି ଶତକ ରନ୍ ପିଛା କରି ହାସଲ କରିଛନ୍ତି ।
ଲକ୍ଷ୍ୟ ପିଛା କରି ଅଧିକ ରନ୍ କରିଥିବା ଖେଳାଳି
ସଚିନ ତେନ୍ଦୁଲକର (ଭାରତ) - ୮୭୨୦ ରନ୍
ବିରାଟ କୋହଲି (ଭାରତ) – ୮୦୬୩ ରନ୍
ରୋହିତ ଶର୍ମା (ଭାରତ) - ୬୧୧୫ ରନ୍
ସନଥ ଜୟସୁରିଆ (ଶ୍ରୀଲଙ୍କା) - ୫୭୪୨ ରନ୍
ଜ୍ୟାକ୍ କାଲିସ୍ (ଦକ୍ଷିଣ ଆଫ୍ରିକା) - ୫୫୭୫ ରନ୍
