ନୂଆଦିଲ୍ଲୀ ୧୬।୦୧: ବିରାଟ କୋହଲି । ନିଜ ଫର୍ମ ପାଇଁ ଯେତିକି ଚର୍ଚ୍ଚିତ ତାଠାରୁ ଅଧିକ ନିଜ ରେଷ୍ଟୁରାଣ୍ଟକୁ ନେଇ ରହିଛନ୍ତି ଆଲୋଚନାରେ । ବିରାଟଙ୍କ ରେଷ୍ଟୁରାଣ୍ଟ One8 Commune ବର୍ତ୍ତମାନ ନିଜର ମହଙ୍ଗା ମେନୁ ପାଇଁ ଖୁବ୍ ଖବରରେ ରହିଛି । କୋହଲି ୨୦୧୭ରେ One8 Commune ରେଷ୍ଟୁରାଣ୍ଟ ଚେନ୍ ଆରମ୍ଭ କରିଥିଲେ।
ଏହି ରେଷ୍ଟୁରାଣ୍ଟର ଆଉଟଲେଟ୍ ବର୍ତ୍ତମାନ ଦେଶର ଅନେକ ବଡ଼ ବଡ ସହରରେ ରହିଛି । ନିକଟରେ ଜଣେ ଛାତ୍ରୀ ବିରାଟ କୋହଲିଙ୍କ ହାଇଦ୍ରାବାଦର ରେଷ୍ଟୁରାଣ୍ଟରୁ ଏକ ମକା ଅର୍ଡର କରିଥିଲେ । ଆଉ ଏଥିପାଇଁ ତାଙ୍କୁ ୫୨୫ ଟଙ୍କା ଦେବାକୁ ପଡିଥିଲା । ସେବେଠାରୁ One8 କମ୍ୟୁନର ମେନୁ ଚର୍ଚ୍ଚାରେ ରହିଛି ।
କିନ୍ତୁ ଜାଣନ୍ତିକି One8 Commune ମେନୁରେ ସବୁଠାରୁ ମହଙ୍ଗା ଖାଦ୍ୟ କଣ ? ଆସନ୍ତୁ ଜାଣିବା... ଲ୍ୟାମ୍ବ ସାଙ୍କସ୍ ହେଉଛି ସବୁଠାରୁ ମହଙ୍ଗା ଖାଦ୍ୟ । ଏହି ଖାଦ୍ୟ ମେଣ୍ଢା ମାଂସରୁ ତିଆରି । ଲ୍ୟାମ୍ବ ସାଙ୍କସ୍ର ତିଆରି କରିବା ପାଇଁ ମେଣ୍ଢା ଗୋଡ଼କୁ କମ୍ ଆଞ୍ଚରେ ରନ୍ଧା ଯାଇଥାଏ ।
One8 Commune ରେଷ୍ଟୁରାଣ୍ଟରେ ଏହି ଖାଦ୍ୟର ମୂଲ୍ୟ ୨୩୧୮ ଟଙ୍କା । ତେବେ ବିରାଟ କୋହଲିଙ୍କ ରେଷ୍ଟୁରାଣ୍ଟର ଆଉଟଲେଟ୍ ହାଇଦ୍ରାବାଦ, ଦିଲ୍ଲୀ, ମୁମ୍ବାଇ, ବେଙ୍ଗାଲୁରୁ, ପୁଣେ ଏବଂ କୋଲକାତାରେ ରହିଛି। ରିପୋର୍ଟ ଅନୁସାରେ, ବିରାଟ କୋହଲି ଏବେ ଦୁବାଇରେ ଏହି ରେଷ୍ଟୁରାଣ୍ଟର ଆଉ ଏକ ଆଉଟଲେଟ୍ ଖୋଲିବାକୁ ପ୍ରସ୍ତୁତ ହେଉଛନ୍ତି।
