ନୂଆଦିଲ୍ଲୀ ୨୭।୦୩: ମୋଟାପଣକୁ ନେଇ ଚିନ୍ତିତ କି ? ଆଉ ନିଅନ୍ତୁନି ଟେନସନ୍ । ଚୁଟକିରେ ଦୂର ହେବ ଚିନ୍ତା । ଇଞ୍ଜେକସନ୍ରେ ହେବ ଓ୍ବେଟଲସ୍ । ଛୁମନ୍ତର ହେବ ମେଦବହୁଳତା ଓ ମଧୁମେହ । ଆସିଗଲା ଓଜନ କମାଇବାର ମହୌଷଧୀ ମୌନଜାରୋ । ଭାରତୀୟ ମାର୍କେଟରେ ହୋଇଛି ଲଞ୍ଚ ।
ମୋଟାପଣ । ପ୍ରାୟ ଅନେକଙ୍କର ବଡ ସମସ୍ୟା । ଏଥିପାଇଁ ଲୋକେ ଆପଣାଇଥାନ୍ତି ଅନେକ ଉପାୟ । ଲାଇଫଷ୍ଟାଇଲ୍ ବଦଳାଇବା ସହ ଫିଜିକାଲ୍ ଆକ୍ଟିଭିଟି କରିଥାନ୍ତି । କିନ୍ତୁ ଏବେ ମାର୍କେଟକୁ ଆସିଛି ମେଡିସିନ୍ । ଏହା ଓଜନ କମ୍ କରିବାରେ ହେବ ସହାୟକ । ପୂର୍ବରୁ ୟୁକେ, ୟୁରୋପ ପରି ଅନ୍ୟ ଦେଶରେ ଏହାକୁ କରାଯାଉଥିଲା ବ୍ୟବହାର । ଏବେ ଭାରତରେ ହୋଇଛି ଲଞ୍ଚ । ଏହାର ଲଞ୍ଚ ହେବା ପରେ ମୌନଜାରୋକୁ ନେଇ ଅନେକ ପ୍ରଶ୍ନ । ମୌନଜାରୋ କିପରି କାମ କରେ ? ଏହାର ଦାମ୍ କେତେ ? ମୌନଜାରୋକୁ କେମିତି କରିବେ ବ୍ୟବହାର ? ଏହାର ରହିଛି କି ସାଇଡ୍ଇଫେକ୍ଟ ?
ଭାରତରେ ଏଲି ଲିଲି ଦ୍ୱାରା ମୌନଜାରୋ ଲଞ୍ଚ ହୋଇଛି । ୩ଟି କ୍ଲିନିକାଲ ପରୀକ୍ଷଣରେ ମୌନଜାରୋ ଭଲ ପ୍ରଦର୍ଶନ କରିଛି। ମୌନଜାରୋକୁ ରାସାୟନିକ ଭାବରେ ଟିର୍ଜେପେଟାଇଡ୍ କୁହାଯାଏ। ମୌନଜାରୋ ଶରୀରରେ ବ୍ଲଡ୍ସୁଗରକୁ ଅଧିକ ପ୍ରଭାବଶାଳୀ କରିବା ସହିତ ଅଧିକ ଦକ୍ଷତାର ସହିତ କାମ କରିବାରେ ସାହାଯ୍ୟ କରେ ।
ଏହା ଭୋକ କମାଇଥାଏ ଏବଂ ପାଚନ ପ୍ରକ୍ରିୟାକୁ ଧୀର କରିଥାଏ । ଯାହା ବ୍ୟକ୍ତିକୁ ଅଧିକ ସମୟ ପର୍ଯ୍ୟନ୍ତ ପେଟପୂରିବା ପରି ଅନୁଭବ କରିବାରେ ସାହାଯ୍ୟ କରେ । ତେଣୁ ବ୍ୟକ୍ତି ଖାଦ୍ୟ କମ୍ ଖାଇଥାଏ। ଏହା ଏକ ଇଞ୍ଜେକ୍ସନ ଆକାରରେ ଆସିଥାଏ । ସପ୍ତାହରେ ଥରେ ନେବାକୁ ପଡିଥାଏ ଏହାର ଡୋଜ୍ । ତେବେ କେଉଁ ବ୍ୟକ୍ତିଙ୍କୁ କେତେ ପରିମାଣ ଦିଆଯିବ ତାହା ଡାକ୍ତର ନିଅନ୍ତି ନିଷ୍ପତ୍ତି ।
କ୍ଲିନିକାଲ୍ ପରୀକ୍ଷଣରୁ ଜଣାପଡିଛି, ୭୨ ସପ୍ତାହ ଧରି ଖାଦ୍ୟ, ବ୍ୟାୟାମ ସହିତ ମୌନଜାରୋ ନେଉଥିବା ବୟସ୍କମାନେ ସର୍ବାଧିକ ଡୋଜ୍ (୧୫ ମିଗ୍ରା)ରେ ହାରାହାରି ୨୧.୮ କିଲୋଗ୍ରାମ ଏବଂ ସର୍ବନିମ୍ନ ଡୋଡ୍ (୫ ମିଗ୍ରା)ରେ ହାରାହାରି ୧୫.୪ କିଲୋଗ୍ରାମ ଓଜନ ହ୍ରାସ କରିଛନ୍ତି । ମୌନଜାରୋ ଇଞ୍ଜେକ୍ସନ ସପ୍ତାହକୁ ଥରେ ନେବାକୁ ପଡିବ ଏବଂ ଡାକ୍ତରଙ୍କ ପରାମର୍ଶ ବିନା ଏହାକୁ ବ୍ୟବହାର ନକରିବାକୁ ପରାମର୍ଶ ଦିଆଯାଇଛି।
ଏବେ ପ୍ରଶ୍ନ ଆସୁଛି ମୌନଜାରୋର ଦାମ୍ କେତେ ? ଭାରତରେ ମୌନଜାରୋର ଦାମ୍ ୨.୫ ମିଲିଗ୍ରାମ ଶିଶି ପାଇଁ ଦେବାକୁ ପଡିବ ୩୫୦୦ ଟଙ୍କା । ଏହାବ୍ୟତୀତ ୫ ମିଲିଗ୍ରାମର ଶିଶି ପାଇଁ ଦେବାକୁ ପଡିବ ୪୩୭୫ ଟଙ୍କା । ମୌନଜାରୋ ଯଦି କାହାକୁ ପ୍ରତି ସପ୍ତାହରେ ଏହାର ପ୍ରାରମ୍ଭିକ ଡୋଜ୍ ୨.୫ ମିଗ୍ରା ଦିଆଯାଏ, ତେବେ ମାସିକ ଖର୍ଚ୍ଚ ୧୪ ହଜାର ଟଙ୍କା ହେବ। ଯଦି କାହାକୁ ୫ ମିଗ୍ରା ଡୋଜ୍ ଦିଆଯାଏ, ତେବେ ତାଙ୍କର ମାସିକ ଖର୍ଚ୍ଚ ପ୍ରାୟ ୧୭.୫୦୦ ଟଙ୍କା ହେବ।
ତେବେ ଏହାର କିଛି ପାର୍ଶ୍ୱ ପ୍ରତିକ୍ରିୟା ମଧ୍ୟ ରହିଛି । ଯେଉଁଥିରେ ହାଇପୋଗ୍ଲାଇସେମିଆ, ରକ୍ତରେ ଶର୍କରା ହ୍ରାସ, ଆଲର୍ଜି, ବୃକକ୍ ସମସ୍ୟା, ଗୁରୁତର ପେଟ ସମସ୍ୟା, ଆଖି ସମସ୍ୟା, ପିତ୍ତକୋଷ ସମସ୍ୟା ହୋଇପାରେ । ମୌନଜାରୋର ସବୁଠାରୁ ସାଧାରଣ ପାର୍ଶ୍ୱ ପ୍ରତିକ୍ରିୟା ମଧ୍ୟରେ ବାନ୍ତି, ଝାଡ଼ା, ଭୋକ ନ ଲାଗିବା, କୋଷ୍ଠକାଠିନ୍ୟ, ବଦହଜମୀ ଏବଂ ପେଟ ଯନ୍ତ୍ରଣା ହୋଇପାରେ। ମୌନଜାରୋ ଥାଇରଏଡ୍ କର୍କଟ ସମେତ ଥାଇରଏଡ୍ ଟ୍ୟୁମର ସୃଷ୍ଟି କରିପାରେ । ତେଣୁ ସମ୍ଭାବ୍ୟ ଲକ୍ଷଣଗୁଡ଼ିକ ପ୍ରତି ସତର୍କ ରୁହନ୍ତୁ । ଯେପରିକି ବେକରେ ଗଣ୍ଠି କିମ୍ବା ଫୁଲା, ଖାଦ୍ୟ ଗିଳିବାରେ କଷ୍ଟ କିମ୍ବା ନିଶ୍ୱାସ ନେବାରେ ଅସୁବିଧା ହେବାକୁ ଧ୍ୟାନ ଦେବାକୁ ପଡିବ ।
Mounjaro.lilly.com ର ଅଫିସିଆଲ୍ ୱେବସାଇଟରେ ଅନୁଯାୟୀ, ଯଦି ଆପଣ କିମ୍ବା ଆପଣଙ୍କ ପରିବାରର କାହାକୁ ଥାଇରଏଡ୍ କର୍କଟ ହୋଇଛି, ତେବେ ମୌନଜାରୋ ଭ୍ୟାକସିନ୍ଠାରୁ ଦୂରେଇ ରହିବା ଉଚିତ୍ । ଏହାବ୍ୟତୀତ ଯଦି କାହାକୁ ମୌନଜାରୋ କିମ୍ବା ମୌନଜାରୋର କୌଣସି ଉପାଦାନରେ ଆଲର୍ଜି ରହିଥାଏ ତେବେ ଏହାକୁ ବ୍ୟବହାର କରନ୍ତୁନି ।
