ନୂଆଦିଲ୍ଲୀ ୨୯।୧: ଭାରତରେ ୧୦ଗ୍ରାମ ପିଛା ସୁନାଦର ଏବେ ୮୩ ହଜାର ଟଙ୍କାକୁ ପହଞ୍ଚି ଯାଇଛି। ତେବେ ସୁନା ମୂଲ୍ୟରେ ୨୯ ଜାନୁୟାରୀ ବୁଧବାର ଲଗାତାର ତୃତୀୟ ଦିନ ହ୍ରାସ ଜାରି ରହିଛି। ଦୁଇଦିନ ପରେ ଦେଶର ବଜେଟ୍ ଆସିବ, ତେବେ ତା ପୂର୍ବରୁ ସୁନା ମୂଲ୍ୟରେ ହ୍ରାସ ଦେଖା ଯିବା କେଉଁ ସଂକେତ ଦେଉଛି ଆସନ୍ତୁ ଜାଣିବା।
ଦରହ୍ରାସ ଯୋଗୁ ୧୦ ଗ୍ରାମ ପିଛା ୨୪କ୍ୟାରେଟ ସୁନା ବୁଧବାର ବିଭିନ୍ନ ସହରରେ ୮୧,୯୦୦ ଟଙ୍କାରେ କାରବାର ହେଉଛି, ଯାହା ଦୀର୍ଘ ସମୟ ପରେ ୮୨ ହଜାର ଟଙ୍କାରୁ ତଳକୁ ଆସିଛି। ସୁନାଦର ଗତ ସପ୍ତାହରେ ସର୍ବକାଳୀନ ଉଚ୍ଚତମ ସ୍ତରକୁ ପହଞ୍ଚିଥିଲା, ତେବେ ଏହା ପରଠାରୁ ବଜାରରେ ସୁଧାର ଦେଖାଯାଉଛି। ଅଲଇଣ୍ଡିଆ ବୁଲିୟନ ଆଣ୍ଡ ଜ୍ୱେଲର୍ସ ଆସୋସିଏସନ (ଆଇବିଜେଏ)ଙ୍କ ଅନୁସାରେ ଜ୍ୱେଲର ଓ ରିଟେଲରଙ୍କ ଚାହିଦା ମାନ୍ଦା ରହିବାଯୋଗୁ ମଙ୍ଗଳବାର ଦିଲ୍ଲୀ ସ୍ୱର୍ଣ୍ଣାଳଙ୍କାର ବଜାରରେ ସୁନା ମୂଲ୍ୟରେ ୧୬୦ଟଙ୍କା ହ୍ରାସ ଦେଖାଯାଇଛି।
୯୯.୯ ପ୍ରତିଶତ ଶୁଦ୍ଧ ସୁନା ୧୦ ଗ୍ରାମ ପିଛା ଦରରେ ୧୬୦ ଟଙ୍କା ହ୍ରାସ ହୋଇ ୮୨,୮୪୦ ଟଙ୍କାକୁ ଖସିଛି। ତେବେ ସୋମବାର ଏହି ଦର ପ୍ରତି ୧୦ଗ୍ରାମ ୮୩ ହଜାର ଟଙ୍କା ଥିଲା। ତେବେ ଦୀର୍ଘ ସମୟ ହେଲା ସୁନା ଦର ୮୦ ହଜାର ଆଖପାଖରେ ରହିଛି। ଗତ ଜୁଲାଇରେ ଅର୍ଥମନ୍ତ୍ରୀ ୨୦୨୪-୨୫ ବର୍ଷ ନିମନ୍ତେ ପୂର୍ଣ୍ଣାଙ୍ଗ ବଜେଟ ଉପସ୍ଥାପନା କରିଥିଲେ। ଏହି ସମୟରେ ସେ ସୁନା ଆମଦାନୀ ଶୁଳ୍କରେ ହ୍ରାସ ଘୋଷଣା କରିଥିଲେ। ଏଣୁ ସୁନା ଦର ସେତେବେଳେ ୮୦ ଟଙ୍କା ସ୍ତରରୁ ତଳକୁ ଖସିଥିଲା।
ତେବେ ଆସନ୍ତା ଫେବୃଆରୀ ୧ ତାରିଖରେ ଉପସ୍ଥାପିତ ହେବାକୁ ଥିବା ବଜେଟ୍ ରେ ଅର୍ଥମନ୍ତ୍ରୀ ପୁଣି ସୁନା ଶସ୍ତା କରିବା ପାଇଁ କିଛି ପଦକ୍ଷେପ ନେବେକି ? ସେ ନେଇ ଏବେଠୁ ଅଙ୍କକଷା ଆରମ୍ଭ ହୋଇଗଲାଣି। ‘ମିଣ୍ଟ’ ଖବର ଅନୁସାରେ ଅର୍ଥମନ୍ତ୍ରୀ ଫେବୃଆରୀ ୧ରେ ଉପସ୍ଥାପନ ହେବାକୁ ଥିବା ବଜେଟରେ ସୁନା ଉପରେ କଷ୍ଟମ ଡ୍ୟୁଟି ବଢାଇ ପାରନ୍ତି ବୋଲି ଆକଳନ କରାଯାଇଛି।
ଯଦି ଅର୍ଥମନ୍ତ୍ରୀ ବଜେଟ୍ରେ ଏପରି କିଛି ପ୍ରାବଧାନ ରଖନ୍ତି ତେବେ ସୁନା ଆମଦାନୀ ଦେଶରେ ମହଙ୍ଗା ହୋଇଯିବ। ଫଳରେ ସୁନା ଦରରେ ସୁଧାର ବଦଳେ ଆହୁରି ମହଙ୍ଗା ହୋଇଯିବ। ଗତ ଜୁଲାଇରେ ଅର୍ଥମନ୍ତ୍ରୀ ହ୍ରାସ କରିଥିବା ଆମଦାନୀ ଶୁଳ୍କ ଯୋଗୁ ଟ୍ରେଡ ଡେଫିସିଟ୍ ଚିନ୍ତା ବଢେଇ ଦେଇଛି। ଏଣୁ ସରକାର ଆଗାମୀ ବଜେଟରେ ସୁନା ଉପରେ କଷ୍ଟମ ଡ୍ୟୁଟି ବଢାଇ ବ୍ୟବସାୟୀକ କ୍ଷତିକୁ ସୁଧାର କରିବାକୁ ଉଦ୍ୟମ କରିପାରନ୍ତି ବୋଲି ଅନୁମାନ କରାଯାଉଛି। ଏବେ ଭାରତରେ ସୁନା ଆମଦାନୀ ପାଇଁ ୬ ପ୍ରତିଶତ ଶୁଳ୍କ ଲାଗୁ ହେଉଛି। ଯାହା ପୂର୍ବରୁ ୧୫ ପ୍ରତିଶତ ଥିଲା।
ସୁନାର ବର୍ଦ୍ଧିତ ଦର ଗ୍ରାହକଙ୍କୁ ନିରୁତ୍ସାହିତ କରୁଛି। ଏହିକାରଣରୁ ଦେଶର ଜ୍ୱେଲରୀ ଓ ବୁଲିୟନ ଡିଲରମାନେ ଅର୍ଥମନ୍ତ୍ରୀ ସୁନା ଦର ହ୍ରାସ ଉପରେ ଫୋକସ କରନ୍ତୁ ବୋଲି ଚାହୁଁଛନ୍ତି। ଇକୋନମିକ ଟାଇମର ଏକ ରିପୋର୍ଟ ଅନୁସାରେ ସରକାର ଏଥି ପାଇଁ ଇଏମଆଇରେ ସୁନା କ୍ରୟ ନିମନ୍ତେ କୌଣସି ମେକାନିଜିମ ବାହାର କରିପାରନ୍ତି ବୋଲି ଆଶାବ୍ୟକ୍ତ କରିଛି।
