ଭୁବନେଶ୍ବର ୩୦।୧: ରାଜ୍ୟରେ ସ୍ବାଭାବିକ ଠାରୁ ୪ ରୁ ୬ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହୋଇଛି । ଆସନ୍ତା ୫ ଦିନ ପରେ ଆହୁରି ବଢିବ ତାପମାତ୍ରା । ଅଧିକାଂଶ ଜିଲ୍ଲାରେ ସ୍ବାଭାବିକ ଠାରୁ ୪ରୁ ୫ ଡିଗ୍ରୀ ପର୍ଯ୍ୟନ୍ତ ବଢିବ ତାତି । ବିଶେଷ କରି ଉପକୂଳ ଅପେକ୍ଷା ଆଭ୍ୟନ୍ତରୀଣ ଓଡିଶାରେ ବଢିବ ଦିନ ତାପମାତ୍ରା ବୋଲି ଆଞ୍ଚଳିକ ପାଣିପାଗ କେନ୍ଦ୍ର କହିଛି । ସେପଟେ ପାଣିପାଗ ବିଶେଷଜ୍ଞ କହିଛନ୍ତି ଗରମ ଅନୁଭବ ହେବା ସହ କୁହୁଡିର ପ୍ରଭାବ ମଧ୍ୟ ରହିବ ।
ଉପକୂଳ ଓଡିଶାରେ ଅହେତୁକ ବଢିବ ରାତିର ତାତି । ମେଘମୁକ୍ତ ଆକାଶ ପାଇଁ ବୃଦ୍ଧି ପାଇବ ତାପମାତ୍ରା । ସୂଚନା ଦେଲା ଭୁବନେଶ୍ଵର ପାଣିପାଗ କେନ୍ଦ୍ର । ଗୁରୁବାର ଦିନ ସାଢେ ୧ ଟା ସୁଦ୍ଧା ୩୧ ଡିଗ୍ରୀ ଅତିକ୍ରମ କରିଛି ଭୁବନେଶ୍ୱର ତାପମାତ୍ରା । ତେବେ ତାପମାତ୍ରା ବୃଦ୍ଧି ସହ ଘନ କୁହୁଡି ମଧ୍ୟ ପ୍ରଭାବ ରହିବ । ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ଘନ କୁହୁଡି ନେଇ ୧୦ ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି । କୋରାପୁଟ, କଳାହାଣ୍ଡି, କନ୍ଧମାଳ, ବୌଦ୍ଧ, ନୟାଗଡ଼, ଖୋର୍ଦ୍ଧା, ଅନୁଗୁଳ, ଢେଙ୍କାନାଳ, କଟକ ଏବଂ କେନ୍ଦୁଝରକୁ ସତର୍କତା ଜାରି କରିଛି ଆଞ୍ଚଣିକ ପାଣିପାଗ କେନ୍ଦ୍ର ।
ସେପଟେ ଆଞ୍ଚଳିକ ପାଣିପାଗ ବିଭାଗ ନିର୍ଦେଶକ ମନୋରମା ମହାନ୍ତି କହିଛନ୍ତି, ଫେବୃଆରୀ ୧ ତାରିଖରେ ୯ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । କଳାହାଣ୍ଡି, କନ୍ଧମାଳ, ବୌଦ୍ଧ, ଅନୁଗୁଳ, କେନ୍ଦୁଝର, ଯାଜପୁର, କେନ୍ଦ୍ରାପଡା, ଭଦ୍ରକ ଏବଂ ମୟୂରଭଞ୍ଜରେ ଘନ କୁହୁଡି ସତର୍କତା । ୨ ତାରିଖରେ ୫ ଜିଲ୍ଲାକୁ ସତର୍କତା ଜାରି କରାଯାଇଛି । ଏହିସବୁ ଜିଲ୍ଲାରେ ୫୦ ମିଟର ତଳକୁ ଖସିବ ଦୃଶ୍ୟମାନ ଦୂରତା ।
କିଛି ସ୍ଥାନରେ ଜିରୋ ଭିଜିବିଲିଟି ନେଇ ଆଲର୍ଟ ଜାରି । ଘାଟି ରାସ୍ତା ଏବଂ ଦୁର୍ଘଟଣା ପ୍ରବଣ ଅଞ୍ଚଳରେ ସତର୍କତାର ସହ ଗାଡି ଚାଳନା ପାଇଁ ପରାମର୍ଶ ଦେଇଛି ବିଭାଗ ।
ସେପଟେ ପାଣିପାଗ ବିଶେଷଜ୍ଞ କହିଛନ୍ତି, ତାପମାତ୍ରାରେ ବିଶେଷ ପରିବର୍ତ୍ତନ ରହିବନି । ବାୟୁମଣ୍ଡଳକୁ ପଶ୍ଚିମା ବାୟୁ ପ୍ରଭାବରେ ସାମାନ୍ୟ ବ୍ୟତିକ୍ରମ ରହୁଛି । ସମୁଦ୍ର ମଧ୍ୟରୁ ଆସୁଥିବା ପବନ ଫଳରେ କୁହୁଡି ହେଉଛି । ତେବେ କିଛି ଦିନ ପାଗ ଗରମ ରହିବା ସହ କିଛି ଦିନ କୋହଲା ମଧ୍ୟ ରହିବ । ୧ ତାରିଖ ଠାରୁ କୁହୁଡିର ପ୍ରଭାବ ଅଧିକ ରହିବ । ଜଳବାୟୁ ପରିବର୍ତ୍ତନର ପ୍ରଭାବ ସିଧାସଳଖ ଆମ ବାୟୁ ମଣ୍ଡଳ ଉପରେ ପଡ଼ୁଥିବା ବେଳେ ଫେବୃୟାରୀରେ ଅଧିକ ଗରମ ହେବା ନେଇ ଅନେକ ବିଶେଷଜ୍ଞ ମଧ୍ୟ ଚର୍ଚ୍ଚା କରୁଛନ୍ତି ।
You Can Read:
ଅଫିସ୍ ଭିତରେ ପସିଲେ, RIଙ୍କୁ ବନ୍ଧୁକ ଦେଖାଇ ସୁନା ଚେନ୍ ସହ ଟଙ୍କା ଲୁଟିଲେ
