ପାଟନା: ମାରାତ୍ମକ ପବଜୀ ଗେମ୍ ନିଶା ନେଇଗଲା ଜୀବନ । ଟ୍ରେନ୍ରେ କଟି ୩ ନାବାଳକଙ୍କ ମୃତ୍ୟୁ । ଏଭଳି ଏକ ହୃଦୟ ବିଦାରକ ଘଟଣା ଘଟିଛି ବିହାରର ବୈତିୟା ଜିଲ୍ଲାର ମୁଫାସିଲ ଥାନା ଅଞ୍ଚଳରେ । ନରକାଟିଆଗଞ୍ଜ-ମୁଜାଫରପୁର ରେଳ ବିଭାଗର ମନସା ଟୋଲାରେ ଥିବା ରୟାଲ ସ୍କୁଲ ନିକଟରେ ଏହି ଦୁର୍ଘଟଣା ଘଟିଛି । ପବଜୀ ଖେଳିବା ନିଶାରେ ୩ ନାବାଳକ ପାଖ ଟ୍ରେନ୍ ଲାଇନ୍କୁ ଚାଲିଗଲେ । ସେଠାରେ ସେମାନେ ଇୟରଫୋନ୍ ଲଗାଇ ଟ୍ରେନ୍ ଲାଇନ୍ରେ ଅନଲାଇନ୍ ଗେମ୍ ଖେଳୁଥିଲେ । ଏହି ସମୟରେ ଦ୍ରୁତ ଗତିରେ ଆସୁଥିବା ଏକ ଟ୍ରେନର ହର୍ନ ଶୁଣି ପାରି ନ ଥିଲେ। ଫଳରେ ଟ୍ରେନ୍ ତାଙ୍କ ଉପରେ ଚଢ଼ି ଯାଇଥିଲା ଓ ଘଟଣାସ୍ଥଳରେ ୩ ଜଣଙ୍କ ମୃତ୍ୟୁ ହୋଇଛି ।
ଖବର ପାଇ ସ୍ଥାନୀୟ ପୋଲିସ ଓ ରେଲୱେ ଅଧିକାରୀ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ପୋଷ୍ଟମର୍ଟମ ପାଇଁ ପଠାଇଛନ୍ତି । ସେପେଟେ ଏତେ ବଡ଼ ଅଘଟଣ କିପରି ଘଟିଲା, ତା’ର ତଦନ୍ତ କରୁଛି ପୋଲିସ ଟିମ୍ । ଅନ୍ୟପଟେ ପରିବାର ଲୋକେ ପହଞ୍ଚି ପିଲାମାନଙ୍କୁ ଚିହ୍ନଟ କରିଥିଲେ । କାନ୍ଦ ବୋବାଳିରେ ଫାଟି ପଡ଼ୁଛି ପୂରା ଅଞ୍ଚଳ ।
