ବରଗଡ଼: ଧନୁଯାତ୍ରା ଦେଖିବାକୁ ଆସିଥିବା ଯୁବତୀ ମୁର୍ମୁଷୁ ଅବସ୍ଥାରେ ଉଦ୍ଧାର ଘଟଣା ତଦନ୍ତ ଚାଲିଛି। ଡାକ୍ତରୀ ରିପୋର୍ଟରେ ଯୁବତୀଙ୍କ ଦୁଷ୍କର୍ମ ହୋଇନଥିବା ଦର୍ଶାଯାଇଥିବାବେଳେ, ପରିବାର ଲୋକେ କିନ୍ତୁ ଧର୍ଷଣ ପରେ ହତ୍ୟା ପାଇଁ ଉଦ୍ୟମ କରାଯାଇଥିବା ଲିଖିତ ଅଭିଯୋଗ କରିଛନ୍ତି । ମାମଲାରେ ଏକ ସିସିଟିଭି ଫୁଟେଜକୁ ଆଧାର କରି ପୋଲିସ ତଦନ୍ତ କରୁଛି।
ହେଲେ ଏହାରି ମଧ୍ୟରେ ଘଟଣାକୁ ୫ ଦିନ ବିତି ଯାଇଥିବାବେଳେ ପୋଲିସର ଅସନ୍ତୋଷ ଜନକ କାର୍ଯ୍ୟାନୁଷ୍ଠାନ ସହ ପୀଡ଼ିତାଙ୍କ ଚିକିତ୍ସାରେ ଅବହେଳା ଅଭିଯୋଗ ଆଣି ମଙ୍ଗଳବାର ୧୨ ଘଣ୍ଟିଆ ବନ୍ଦ ଡାକରା ଦେଇଛି ବରଗଡ଼ ନାଗରିକ କମିଟି। ଅବଶ୍ୟ ଏହି ସମୟରେ ଜରୁରୀକାଳୀନ ସେବାକୁ ବାଦ ଦିଆଯାଇଛି। ଏହି ବୈଠକରେ ସାମିଲ ହୋଇଥିଲେ ବିଭିନ୍ନ ସମାଜ ସେବୀ ସଂଗଠନ ସହ କଂଗ୍ରେସ, ବିଜେଡ଼ି ଓ ଆପ ଦଳ ନେତୃ ବୃନ୍ଦ।
ସୂଚନାଥାଉକି, ଜାନୁଆରୀ ୧୨ ତାରିଖ ସନ୍ଧ୍ୟାରେ ଯୁବତୀ ଜଣକ ଧନୁଯାତ୍ରା ଦେଖିବାକୁ ଯାଇ ନିଖୋଜ ହୋଇଯାଇଥିଲେ। ପରେ ତାଙ୍କୁ ମୁମୂର୍ଷୁ ଅବସ୍ଥାରେ ଉଦ୍ଧାର କରାଯାଇଥିଲା। ଘଟଣାକୁ ୫ଦିନ ବିତିଯାଇଥିବାବେଳେ ଏପର୍ଯ୍ୟନ୍ତ ଅଭିଯୁକ୍ତମାନଙ୍କୁ ପୋଲିସ ଗିରଫ କରିବାରେ ସକ୍ଷମ ହୋଇପାରିନାହିଁ।
