ଝାରସୁଗୁଡ଼ା: ଓଡ଼ିଆ ଝିଅକୁ ପୋଷ୍ୟ ସନ୍ତାନ ଭାବେ ଗ୍ରହଣ କଲେ ଆମେରିକୀୟ ଦମ୍ପତି। ସନ୍ତାନ ଗ୍ରହଣ ପ୍ରକ୍ରିୟା ଚୂଡ଼ାନ୍ତ ହେବା ପରେ ଦମ୍ପତ୍ତି ସୁଦୂର ଆମେରିକାରୁ ଆସି ଝାରସୁଗୁଡ଼ାର ଜଣେ ବାର ବର୍ଷର କନ୍ୟାକୁ ଗ୍ରହଣ କରିଛନ୍ତି । ଝାରସୁଗୁଡ଼ା ଜିଲ୍ଲାପାଳ ଅବୋଲି ସୁନୀଲ ନରୱଣେଙ୍କ ଉପସ୍ଥିତିରେ ୧୨ ବର୍ଷର କନ୍ୟାକୁ ଗ୍ରହଣ କରିଛନ୍ତି ଦମ୍ପତ୍ତି। ଏନେଇ ଦମ୍ପତ୍ତି ଖୁସି ବ୍ୟକ୍ତ କରିବା ସହ ଜିଲ୍ଲାପାଳଙ୍କୁ କୃତଜ୍ଞତା ଜଣାଇଥିଲେ ।

ଏହି ଅବସରରେ ଜିଲ୍ଲା ଶିଶୁ ସୁରକ୍ଷା ୟୁନିଟ, ଜିଲ୍ଲା ଶିଶୁ ମଙ୍ଗଳ କମିଟି, ପୋଷ୍ୟ ସନ୍ତାନ ଗ୍ରହଣ କେନ୍ଦ୍ର ଓ ଶିଶୁ ଯତ୍ନ ଅନୁଷ୍ଠାନର କର୍ମକର୍ତ୍ତାଙ୍କୁ ଧନ୍ୟବାଦ ଅର୍ପଣ କରିଥିଲେ l ଜିଲ୍ଲା ଶିଶୁ ସୁରକ୍ଷା ଅଧିକାରୀ ସୁନନ୍ଦ ମହାରଣା ଏବଂ ଆମେରିକାସ୍ଥିତ ଫରେନ ଆଡପସନ ଏଜେନ୍ସି  ପକ୍ଷରୁ ଏମ୍ କୁମାର କାର୍ଯ୍ୟକ୍ରମ ସଂଯୋଜନା କରିଥିଲେ l 

ଏହା ବ୍ୟତୀତ ଶୁକ୍ରବାର ଜିଲ୍ଲାପାଳଙ୍କ ଦ୍ୱାରା ପାଞ୍ଚ ଶିଶୁଙ୍କର ଚୂଡ଼ାନ୍ତ ପୋଷ୍ୟ ସନ୍ତାନ କେସ୍ ଫଇସଲା ହୋଇଛି। ଗୁଜରାଟ ଓ  ପଶ୍ଚିମବଙ୍ଗର ଦମ୍ପତ୍ତିଙ୍କୁ ଜଣେ ଲେଖାଏଁ ଓ ମୁମ୍ବାଇର ଦମ୍ପତ୍ତିଙ୍କୁ ଦୁଇ ଜଣ ପୋଷ୍ୟ ଶିଶୁ କନ୍ୟା ହସ୍ତାନ୍ତର ପାଇଁ ଚୂଡ଼ାନ୍ତ ପ୍ରକ୍ରିୟା ସମ୍ପନ୍ନ କରାଯାଇଥିଲା । 

ଲଖନପୁର ବ୍ଲକର ଜଣେ ଦମ୍ପତ୍ତି ସେମାନଙ୍କର ନିକଟ ସମ୍ପର୍କୀୟଙ୍କ ପାଖରୁ ଜଣେ ପୋଷ୍ୟ ଶିଶୁ ପୁତ୍ର   ଗ୍ରହଣ ସଂକ୍ରାନ୍ତୀୟ କେସ ମଧ୍ୟ ଫଇସଲା କରାଯାଇଥିଲା। । ଶିଶୁ କଲ୍ୟାଣ ସମିତି ଅଧ୍ୟକ୍ଷ ଆଶିଷ କୁମାର ପଣ୍ଡା, ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ଅଜୟ ଜେନା, ସୁରକ୍ଷା ଅଧିକାରୀ ଚୁଡାମଣି ପଣ୍ଡା, ପରାମର୍ଶଦାତା ସମୀର ମିଶ୍ର ତଥା ଶିଶୁ ଯତ୍ନ ଅନୁଷ୍ଠାନର ସମ୍ପାଦକ ନିରାକାର କିସାନ, ମାନସ ମଲ୍ଲିକ, ପୋଷ୍ୟ ସନ୍ତାନ ଗ୍ରହଣ କେନ୍ଦ୍ରର ପ୍ରବୀଣ ବାଗ ପ୍ରମୁଖ କାର୍ଯ୍ୟକ୍ରମରେ  ଉପସ୍ଥିତ ଥିଲେ।