ନୂଆଦିଲ୍ଲୀ: ଦିଲ୍ଲୀ ପୁଲିସ ବିରୋଧରେ ଅଭିଯୋଗ ଆଣିଲା ଆମ ଆଦ୍ମୀ ପାର୍ଟି। ପାଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନଙ୍କ ସରକାରୀ ବାସଭବନରେ ଦିଲ୍ଲୀ ପୁଲିସ ଚଢ଼ାଉ କରିଥିବା ଗୁରୁବାର ଆମ ଆଦ୍ମୀ ପାର୍ଟି ଅଭିଯୋଗ କରିଛି। ରାଜଧାନୀ ଦିଲ୍ଲୀରେ ଥିବା ତାଙ୍କର କପୁରତାଲା ହାଉସରେ ପୁଲିସ ଚଢ଼ାଉ ହୋଇଥିବା ଆପ୍ କହିଛି।
ଅନ୍ୟପଟେ ଆପ୍ର ଅଭିଯୋଗକୁ କିନ୍ତୁ ଖଣ୍ଡନ କରିଛି ଦିଲ୍ଲୀ ପୁଲିସ। ଏଭଳି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ ବୋଲି ଦିଲ୍ଲୀ ପୁଲିସ ସ୍ପଷ୍ଟୀକରଣ ଦେଇଛି।
ଘଟଣାକୁ ନେଇ ଦିଲ୍ଲୀ ମୁଖ୍ୟମନ୍ତ୍ରୀ ଆତିଶୀ ଏକ୍ସରେ ପୋଷ୍ଟ କରି କ୍ଷୋଭ ପ୍ରକାଶ କରିଛନ୍ତି। ଦିଲ୍ଲୀ ପୋଲିସ ଜଣେ ନିର୍ବାଚିତ ମୁଖ୍ୟମନ୍ତ୍ରୀଙ୍କୁ ଅନ୍ୟାୟ ଭାବରେ ଟାର୍ଗେଟ କରୁଛି। ହେଲେ ବିଜେପି ବିରୋଧରେ ଥିବା ବେଆଇନ ଅଭିଯୋଗକୁ ଅଣଦେଖା କରାଯାଉଛି।
ଅତିଶୀ ଲେଖିଛନ୍ତି "ଦିଲ୍ଲୀ ପୋଲିସ ଭଗୱନ୍ତ ମାନଙ୍କ ଘର ଉପରେ ଚଢାଉ କରିବାକୁ ପହଞ୍ଚିଛି। ବିଜେପି ଲୋକମାନେ ଖୋଲାଖୋଲି ଭାବରେ ଦିନଦ୍ୱିପ୍ରହରରେ ଟଙ୍କା, ଜୋତା ଏବଂ ଚାଦର ବାଣ୍ଟୁଛନ୍ତି। କିନ୍ତୁ ଏହା ଅଣଦେଖା କରାଯାଉଛି। ହେଲେ ଜଣେ ନିର୍ବାଚିତ ମୁଖ୍ୟମନ୍ତ୍ରୀଙ୍କ ବାସଭବନ ଉପରେ ଚଢାଉ ଚାଲିଛି।" ଏଭଳି କାମ ପାଇଁ ଦିଲ୍ଲୀବାସୀ ବିଜେପିକୁ ଫେବ୍ରୁଆରୀ ୫ ତାରିଖରେ ଉଚିତ ଜବାବ ଦେବେ ବୋଲି ଅତିଶୀ କହିଛନ୍ତି।
ଅନ୍ୟପଟେ ଅଭିଯୋଗକୁ ଖଣ୍ଡନ କରି ଦିଲ୍ଲୀ ପୁଲିସ କହିଛି ଯେ ଭଗବନ୍ତ ମାନଙ୍କ ଘରେ କୌଣସି ଚଢାଉ କରାଯାଇ ନାହିଁ। ବରଂ, ସି-ଭିଜିଲ ପୋର୍ଟାଲ୍(C-Vigil portal) ମାଧ୍ୟମରେ ମିଳିଥିବା ଅଭିଯୋଗର ତଦନ୍ତ ପାଇଁ ରିଟର୍ଣ୍ଣିଂ ଅଫିସର (ଡିଏମ, ନୂଆଦିଲ୍ଲୀ)ଙ୍କ ନେତୃତ୍ୱରେ ଏକ ଦଳ କପୁରତାଲା ହାଉସରେ ପହଞ୍ଚିଛି ବୋଲି ଦିଲ୍ଲୀ ପୋଲିସର ଜଣେ ଅଧିକାରୀ କହିଛନ୍ତି।
ସୂଚନା ଥାଉକି ସି-ଭିଜିଲ୍ ପୋର୍ଟାଲ୍ ମାଧ୍ୟମରେ ଲୋକମାନେ ନିର୍ବାଚନ ଆଚରଣ ବିଧି ଉଲ୍ଲଂଘନ ସମ୍ପର୍କିତ ଅଭିଯୋଗ ଦାଖଲ କରିପାରିବେ, ଏହି ଘଟଣାରେ ଯାଞ୍ଚ କରାଯାଇ ୧୦୦ ଘଣ୍ଟା ମଧ୍ୟରେ ସମାଧାନ କରାଯାଏ।
ଏନେଇ ଦିଲ୍ଲୀ ପୁଲିସର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଆମେ କେବଳ ଏହି ଅଞ୍ଚଳର ରିଟର୍ଣ୍ଣିଂ ଅଫିସର ଦାୟିତ୍ୱ ତୁଲାଉଥିବା ନୂଆଦିଲ୍ଲୀର ଡିଏମଙ୍କୁ ସହଯୋଗ କରିବା ପାଇଁ ଉପସ୍ଥିତ ଥିଲୁ। ଏକ ଅଭିଯୋଗ ମିଳିବା ପରେ ଆମେ ସେଠାକୁ ଯାଇଥିଲୁ। ଦିଲ୍ଲୀ ପୋଲିସ ଦ୍ୱାରା କୌଣସି ଚଢାଉ କରାଯାଇ ନଥିଲା।
ଘଟଣାକୁ ନେଇ ଦିଲ୍ଲୀ ଡିଏମ୍ କହିଛନ୍ତି ଯେ ଟଙ୍କା ବଣ୍ଟନ ନେଇ ଅଭିଯୋଗ ମିଳିବା ପରେ ପୋଲିଂ ଅଧିକାରୀ ଏବଂ ଦିଲ୍ଲୀ ପୋଲିସର ଏକ ଦଳ କପୁରତାଲା ହାଉସରେ ପହଞ୍ଚିଥିଲା। ଏହାସତ୍ତ୍ୱେ ବି ସୁରକ୍ଷା କର୍ମୀମାନେ ତଦନ୍ତକାରୀ ଦଳକୁ ଘର ଭିତରେ ପ୍ରବେଶ କରିବାକୁ ଅନୁମତି ଦେଇ ନଥିଲେ।।
ସୂଚନା ଥାଉକି, ୭୦ ସଦସ୍ୟ ବିଶିଷ୍ଟ ଦିଲ୍ଲୀ ବିଧାନସଭା ନିର୍ବାଚନ ଫେବୃଆରୀ ୫ରେ ହେବାକୁ ଯାଉଛି। ଏଥିପାଇଁ ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ ଜାତୀୟ ରାଜଧାନୀରେ ଆମ ଆଦମୀ ପାର୍ଟି ପାଇଁ ପ୍ରଚାର କରୁଛନ୍ତି। ନିର୍ବାଚନ ଫଳାଫଳ ଫେବୃଆରୀ ୮ ତାରିଖରେ ଘୋଷଣା ହେବ।
