ନୂଆଦିଲ୍ଲୀ ୧୬।୦୧: ଶୀତଦିନେ ମହିଳାମାନେ ବିଶେଷକରି ଓଠକୁ ସୁନ୍ଦର କରିବାକୁ ଅନେକ ପ୍ରୟାସ କରିଥାନ୍ତି । କାରଣ ଏହି ସମୟରେ ଓଠ ଫାଟିବା ସମସ୍ୟା ଦେଖା ଦେଇଥାଏ । ଆପଣ ଚାହିଁଲେ ଘରୋଇ ଉପାୟରେ ଓଠକୁ ସୁନ୍ଦର ଓ କୋମଳ ରଖିପାରିବେ । ଏଥିପାଇଁ ମହୁର ବ୍ୟବହାର କରିପାରିବେ ।
ମହୁ ଏକ ପ୍ରକାରର ଔଷଧ । ସକାଳେ ଖାଲି ପେଟରେ ପାଣିରେ ମହୁ ପକାଇ ପିଇବା ଦ୍ୱାରା ଅନେକ ଲାଭ ମିଳିଥାଏ । ସେହିପରି ଶୀତଦିନେ ଓଠରେ ମହୁ ଲଗାଇବା ଦ୍ୱାରା ଶୁଷ୍କତା କମ୍ ରହିଥାଏ । ଓଠର ରଙ୍ଗରେ ମଧ୍ୟ ପରିବର୍ତ୍ତନ ହେବା ସହ ଚମକ୍ ଆସିଥାଏ । ମହୁରେ ଆଣ୍ଟି ବ୍ୟାକ୍ଟେରିଆଲ୍ ଓ ଆଣ୍ଟି ଫଙ୍ଗାଲ ଗୁଣ ରହିଥାଏ, ଯାହା ଓଠକୁ ମଏଶ୍ଚରାଇଜ୍ କରିଥାଏ । ଫଳରେ ଓଠ ନରମ ଓ ଚିକ୍ଣ ରହିଥାଏ । ନିୟମିତ ରାତିରେ ଶୋଇବା ପୂର୍ବରୁ ଓଠରେ ମହୁ ଲଗାଇବା ଦ୍ୱାରା ଦିନର ଖରା, ପବନ ଓ ପରିବେଶଜନିତ ସମସ୍ୟାକୁ ସାମ୍ନା କରିବା ସହଜ ହୋଇଥାଏ ।
ଯଦି ଓଠ ଶୁଖିଯାଉଥାଏ, ତେବେ ନିୟମିତ ମହୁ ଲଗାନ୍ତୁ । ଏପରି କରିବା ଦ୍ୱାରା ଓଠର ରଙ୍ଗରେ ସୁଧାର ଆସିଥାଏ । କାରଣ ମହୁରେ ଆଣ୍ଟି- ପିଗ୍ମେଣ୍ଟେସନ୍ ଗୁଣ ରହିଥାଏ । ମହୁରେ ଥିବା ଆଣ୍ଟି-ବ୍ୟାକ୍ଟେରିଆଲ୍ ଓ ଆଣ୍ଟି-ଫଙ୍ଗଲ୍ ଗୁଣ ଓଠର ବିଭିନ୍ନ ସମସ୍ୟାକୁ ଦୂର କରିବାରେ ସହଯୋଗ କରିଥାଏ ।
