ଭୁବନେଶ୍ୱର ୧୩/୦୧: ଶଙ୍ଖ ଭବନରେ ହୋଟେଲ ପ୍ରସଙ୍ଗକୁ ନେଇ ବିଜେପି-ବିଜେଡି ମୁହାଁମୁହିଁ । ଦୁଇ ଦଳର ନେତାଙ୍କ ମଧ୍ୟରେ ଚାଲିଛି କଥା କଟାକଟି । ବିଜେପି ନେତା ଜଗନ୍ନାଥ ପ୍ରଧାନଙ୍କୁ କାଉଣ୍ଟର କରିଛନ୍ତି ବିଜେଡି ବିଧାୟକ ଅରୁଣ ସାହୁ । ସେ କହିଛନ୍ତି ଯେ, ରେଳ ବିଭାଗରେ ଓ ସଂସଦରେ କ୍ୟାଣ୍ଟିନ୍ ଅଛି। ସେମିତି ଶଙ୍ଖ ଭବନରେ ଯଦି କ୍ୟାଣ୍ଟିନ ଅଛି ତେବେ ଅସୁବିଧା କେଉଁଠି ।
ଅବଶ୍ୟ ଖାଇବା ଲୋଭ କାହାର ଅଛି ତାହା ମିଡିଆରେ ଜଳ ଜଳ ଦିଶୁଛି । ମୁଁ ବିଜେପି ନେତାଙ୍କୁ ନିମନ୍ତ୍ରଣ କରୁଛି ତାଙ୍କର ଯେତେବେଳେ ଖାଇବାକୁ ଇଛା ହଉଛି ସେତେବେଳେ ସେ ଶଙ୍ଖ ଭବନ କ୍ୟାଣ୍ଟିନ୍ ଆସି ସୁଦ୍ଧ ସାକାହାରୀ ଖାଦ୍ୟ ଖାଇପାରିବେ । ବିଜେପିର ଏହା ଶସ୍ତା ରାଜନୀତି। ବିଜେପିର କିଛି କାମ ନାହିଁ ।
ଶଙ୍ଖ ଭବନ ଯେଉଁଦିନ ତିଆରି ହୋଇଥିଲା ସେଦିନ କୁହାଯାଇଥିଲା ଏହା ଲୋକଙ୍କ ଅଫିସ । ଏଠାରେ ପ୍ରତିଦିନ ବୈଠକ ବସୁଛି । କର୍ମୀଙ୍କ ସହିତ ନେତା ଓ ସାଧାରଣ ଲୋକ ଆସି ଖାଉଛନ୍ତି । କ୍ୟାଣ୍ଟିନ୍ରେ ଖାଇବା କଣ ଖରାପ । କ୍ୟାଣ୍ଟିନ୍ ଯିଏ ନେଇଛି ସେ ବି ଦୁଇ ପଇସା ପାଇଲେ ଚଳିବେ ।
ସୂଚନା ଥାଉକି, ପ୍ରେସମିଟ୍ କରି ଶଙ୍ଖ ଭବନକୁ ରେଷ୍ଟୁରାଣ୍ଟ କହିଥିଲେ ବିଜେପି ନେତା ଜଗନ୍ନାଥ ପ୍ରଧାନ। କହିଥିଲେ ବିଏମସି ପାଖରୁ କାର୍ଯ୍ୟାଳୟ ପାଇଁ ଅନୁମତି ନେଇ ସେଠାରେ ବିଜେଡି କେମିତି ହୋଟେଲ ଚଳାଉଛି ବୋଲି ପ୍ରଶ୍ନ କରିଥିଲେ । ସେ କହିଛନ୍ତି ଯେ, କାଙ୍ଗାଳ ହୋଇଗଲାଣି ବିଜେଡି । କର୍ପୋରେଟ୍ ଫଣ୍ଡିଂ ବନ୍ଦ ହେବା ଯୋଗୁଁ ପାର୍ଟି ଅଫିସ ଖର୍ଚ୍ଚ ତୁଲାଇବା ପାଇଁ ହୋଟେଲ ଖୋଲି ବ୍ୟବସାୟ କରୁଛି ବିଜେଡି।
ସତରେ କଣ ବିଜେଡି ନିଶ୍ଚିହ୍ନ ହେବାକୁ ଯାଉଛି? ଲୋକେ ଆଉ କାର୍ଯ୍ୟାଳୟକୁ ଆସୁ ନାହାଁନ୍ତି କି ? କେବଳ ପୂଜାପର୍ବ ଭଳି କାର୍ଯ୍ୟକ୍ରମ ପାଇଁ ନିମିତ୍ତ ମାତ୍ର ରହିଛି କି ବିଜେଡି କାର୍ଯ୍ୟାଳୟ ? ବିଜେଡି ଜବାବ ଦେଉ ଯେ ଶଙ୍ଖ ଭବନକୁ ହୋଟେଲ କରିବେ ନା କାର୍ଯ୍ୟାଳୟ କରିବେ? ଯଦି ହୋଟେଲ କରିବେ ସେ ଜାଗା ପାଇଁ ଅନୁମତି ବାଜ୍ୟାପ୍ତି କରାଯାଉ ବୋଲି ଦାବି କରିଛି ବିଜେପି।
