ନୂଆଦିଲ୍ଲୀ: ଜଳୁଛି ଆମେରିକା। ଜଙ୍ଗଲ ନିଆଁରେ ପୋଡ଼ି ପାଉଁଶ ହେଲାଣି କାଲିଫର୍ନିଆ। ଘରଦ୍ୱାର ସବୁ ସ୍ୱାହା। କାର୍ଲିଫନିଆ ରାଜ୍ୟର ଲସ୍ ଆଞ୍ଜେଲସ୍ରେ ଅଗ୍ନିକାଣ୍ଡ ଘଟି ପ୍ରାୟ ୧୩ ଲକ୍ଷ କୋଟି ଟଙ୍କାର କ୍ଷତି ହୋଇଛି। ଆମେରିକାରେ ପାଣିପାଗ ସେବା ପ୍ରଦାନ କରୁଥିବା ଏକ ଘରୋଇ କମ୍ପାନୀ ଆକ୍ୟୁୱେଦର ତଥ୍ୟ ଅନୁଯାୟୀ, ଏହି ଅଗ୍ନିକାଣ୍ଡ ଯୋଗୁ କାଲିଫର୍ନିଆର ମୋଟ କ୍ଷତି ୧୩୫ ବିଲିୟନରୁ ୧୫୦ ବିଲିୟନ ଆମେରିକୀୟ ଡଲାର ମଧ୍ୟରେ ହେବ।
କ୍ଷତି ଆକଳନରେ ଅନ୍ୟାନ୍ୟ ଜିନିଷ ସହିତ, ଘର ଏବଂ ଅନ୍ୟାନ୍ୟ କୋଠାର କ୍ଷତି ଅନ୍ତର୍ଭୁକ୍ତ। ଏହା ବ୍ୟତୀତ, ମୌଳିକ ଭିତ୍ତିଭୂମିର କ୍ଷତି ଏବଂ ସେଗୁଡ଼ିକୁ ପୁନଃନିର୍ମାଣ କରିବାରେ ହୋଇଥିବା ଦୀର୍ଘକାଳୀନ ଖର୍ଚ୍ଚକୁ ମଧ୍ୟ ଅନ୍ତର୍ଭୁକ୍ତ କରାଯାଇଛି। ନିଆଁ ଏପର୍ଯ୍ୟନ୍ତ ନିୟନ୍ତ୍ରଣ କରାଯାଇ ନାହିଁ, ତେଣୁ ଏହି ସଂଖ୍ୟା ଆହୁରି ବୃଦ୍ଧି ପାଇବ।
କେବଳ ଯେ ଘରଦ୍ୱାର ସମ୍ପତ୍ତି ନଷ୍ଟ ହୋଇଛି ତାହା ନୁହେଁ, ଏଥିରେ ଲୋକଙ୍କ ଜୀବନ ବି ଯାଇଛି। ଗଣମାଧ୍ୟମ ରିପୋର୍ଟ ଅନୁସାରେ, ଲସ୍ ଆଞ୍ଜେଲସ୍ ଅଗ୍ନିକାଣ୍ଡରେ ଏପର୍ଯ୍ୟନ୍ତ ୧୦ ଜଣଙ୍କର ମୃତ୍ୟୁ ହେଲାଣି। ଏହା କାଲିଫର୍ନିଆରେ ଏପର୍ଯ୍ୟନ୍ତ ରେକର୍ଡ ହୋଇଥିବା ସବୁଠାରୁ ବଡ଼ ଅଗ୍ନିକାଣ୍ଡ। ଗତ ୪ ଦିନ ଧରି ଲାଗି ରହିଥିବା ନିଆଁ ପ୍ରାୟ ୪୦ ହଜାର ଏକର ଜମିରେ ବ୍ୟାପିଛି। ଏଥିମଧ୍ୟରୁ ୨୯ ହଜାର ଏକର ଅଞ୍ଚଳ ସମ୍ପୂର୍ଣ୍ଣ ଜଳି ଯାଇଛି।
ଅଗ୍ନିକାଣ୍ଡରେ ପ୍ରାୟ ୧୦,ହଜାର କୋଠା ଭସ୍ମିଭୂତ
ଅଗ୍ନିକାଣ୍ଡରେ ପ୍ରାୟ ୧୦ ହଜାର କୋଠା ନଷ୍ଟ ହୋଇଯାଇଥିବା ବେଳେ ୩୦ ହଜାର ଘର କ୍ଷତିଗ୍ରସ୍ତ ହୋଇଛି। ପ୍ରାୟ ୫୦ ହଜାର ଲୋକଙ୍କୁ ତୁରନ୍ତ ଘର ଖାଲି କରିବାକୁ କୁହାଯାଇଛି। ୩ ଲକ୍ଷ ଲୋକଙ୍କୁ ସୁରକ୍ଷିତ ସ୍ଥାନକୁ ଯିବାକୁ ନିର୍ଦ୍ଦେଶ ଦିଆଯାଇଛି। ଶନିବାର ସୁଦ୍ଧା ନିଆଁ ଆହୁରି ବ୍ୟାପିପାରେ ବୋଲି ପ୍ରଶାସନ ସତର୍କ କରାଇ ଦେଇଛି। ବର୍ତ୍ତମାନ ସେଠାରେ ୧ ଲକ୍ଷ ଲୋକ ବିଦ୍ୟୁତ୍ ବିନା ବଞ୍ଚୁଛନ୍ତି। ଏହି ଅଞ୍ଚଳଗୁଡ଼ିକରେ ପରମାଣୁ ବୋମା ପଡ଼ିବା ପରି ନିଆଁ ଲାଗୁଛି ବୋଲି ଲସ୍ ଆଞ୍ଜେଲସ୍ କାଉଣ୍ଟି ସେରିଫ୍ (ଜିଲ୍ଲା ସିଇଓଙ୍କ ସଦୃଶ) ରବର୍ଟ ଲୁନା କହିଛନ୍ତି।
