ମୁମ୍ଵାଇ ୧୨।୦୨; ଇଣ୍ଡିଆଜ୍ ଗଟ୍ ଟାଲେଣ୍ଟ ସୋ'ରେ ତାଙ୍କ ଅଶାଳୀନ ପ୍ରଶ୍ନ ପାଇଁ ୟୁଟ୍ୟୁବର ରଣବୀର ଆଲ୍ଲାହାବାଦିଆ ଏବେ ସମାଲୋଚନାର ସମ୍ମୁଖୀନ ହେଉଛନ୍ତି। ଏବେ ଏହାର ପ୍ରଭାବ ତାଙ୍କ କାମ ଉପରେ ମଧ୍ୟ ପଡ଼ିଛି। ପୋଡକାଷ୍ଟ ପାଇଁ ଲୋକପ୍ରିୟ ଥିବା ରଣବୀର ନିଜ ଅଶାଳୀନ ପ୍ରଶ୍ନ ପାଇଁ କ୍ଷମା ମାଗିବା ସତ୍ତ୍ୱେ, ଅତିଥିମାନେ ତାଙ୍କ ସୋ'କୁ ଆସିବାକୁ ମନା କରୁଛନ୍ତି। ଏବେ ଜଣାଶୁଣା ଗାୟକ ବି ପ୍ରାକ୍ ପୋଡକାଷ୍ଟକୁ ଯିବେ ନାହିଁ। ଏନେଇ ସେ ନିଜେ ସୂଚନା ଦେଇଛନ୍ତି।
ବି ପ୍ରାକ୍ ଏକ ଭିଡିଓ ସେୟାର କରି କହିଛନ୍ତି ଯେ, ସେ ଆସନ୍ତା ସପ୍ତାହରେ ତାଙ୍କ ପୋଡକାଷ୍ଟକୁ ଯାଇଥାନ୍ତେ, କିନ୍ତୁ ଏବେ ସେ ଯିବେ ନାହିଁ। ସେ ଏହାକୁ ବାତିଲ କରିଛନ୍ତି। ଗାୟକ କହିଛନ୍ତି ଯେ, ରଣବୀରଙ୍କ ଅଶାଳୀନ ପ୍ରଶ୍ନ ମୋତେ କ୍ରୋଧିତ କରିଛି। ନିଜ ଭିଡିଓରେ ସେ କହିଛନ୍ତି, ମୁଁ ବିୟର ବାଇସେପ୍ସର ପୋଡକାଷ୍ଟକୁ ଯିବାର ଯୋଜନା ଥିଲା। କିନ୍ତୁ ଆମେ ତାହା ବାତିଲ କରିଦେଲୁ। କାରଣ ଏବେ ଜାଣିଲି ତାଙ୍କର ଚିନ୍ତାଧାରା କେତେ ଖରାପ। ସମୟ ରାଇନାଙ୍କ ସୋ'ରେ ସେ କିଭଳି ଅଶାଳୀନ ଶବ୍ଦ ବ୍ୟବହାର କରିଥିଲେ, ଏହା ଆମର ଭାରତୀୟ ସଂସ୍କୃତି ନୁହେଁ। ତୁମେ ବାପାମାଙ୍କ ବିଷୟରେ ଏସବୁ କିପରି କହୁଛ? ଏହା କ'ଣ ଏକ କମେଡି? ଏହା କମେଡି ନୁହେଁ।
ଏହା ପରେ ରଣବୀରଙ୍କୁ ଟାର୍ଗେଟ କରି ସେ କହିଛନ୍ତି, ''ରଣବୀର ଆଲ୍ଲାହାବାଦିଆ, ତୁମେ ଧର୍ମ ବିଷୟରେ କଥା ହୁଅ, ତୁମେ ଆଧ୍ୟାତ୍ମିକତା ବିଷୟରେ କଥା ହୁଅ, ତୁମର ପୋଡକାଷ୍ଟକୁ ଏତେ ବଡ଼ ଲୋକ ଆସନ୍ତି, କେତେ ବଡ଼ ବଡ଼ ସନ୍ଥ ଆସିଛନ୍ତି...ଏତେ ସବୁ ପରେ ବି ତୁମର ଚିନ୍ତାଧାରା ଏତେ ଖରାପ। ବନ୍ଧୁଗଣ, ମୁଁ ଆପଣଙ୍କୁ କେବଳ ଗୋଟିଏ କଥା କହିବି, ଯଦି ଆମେ ଏସବୁକୁ ବନ୍ଦ ନକରିବା, ତେବେ ଆମ ପିଲାମାନଙ୍କର ଭବିଷ୍ୟତ ବହୁତ ଖରାପ ହେବ। ଦୟାକରି, ସମୟ ରାଇନା ଏବଂ ସେହି ସୋ'କୁ ଆସୁଥିବା ଅନ୍ୟ ହାସ୍ୟ ଅଭିନେତାମାନଙ୍କୁ ହାତ ଯୋଡି ବିନମ୍ରତାର ସହିତ ଏହା ନକରିବାକୁ ଅନୁରୋଧ କରୁଛି।
