ନୂଆଦିଲ୍ଲୀ ୧୫।୧୨; ସିରିଆରେ ସରିଛି ଅସଦ ଯୁଗ । ୧୩ ବର୍ଷର ଗୃହଯୁଦ୍ଧ ପରେ ସିରିଆକୁ କବ୍ଜା କରିଛନ୍ତି ବିଦ୍ରୋହୀ ଗୋଷ୍ଠୀ । ଏହାରି ମଧ୍ୟରେ ଦେଶ ଛାଡି ପଳାୟନ କରିଛନ୍ତି ରାଷ୍ଟ୍ରପତି ବଶର ଅଲ-ଅସଦ । ଗୋଟିଏ ପଟେ ଅସଦଙ୍କ ସାମ୍ରାଜ୍ୟରେ ଦେଶର ୯୦ ପ୍ରତିଶତ ଲୋକ, ଦାରିଦ୍ରରେ ଜୀବନଯାପନ କରିବାକୁ ବାଧ୍ୟ ହେଉଥିଲେ । କିନ୍ତୁ ଅନ୍ୟ ପଟେ, ବଶର ଅଲ-ଅସଦଙ୍କ ରାଜକୀୟ ଶୈଳୀ କାହାଠାରୁ ଲୁଚି ନଥିଲା ।
ଅସଦଙ୍କ ମୋଟ ସମ୍ପତ୍ତି ବିଷୟରେ କହିବାକୁ ଗଲେ ୨୦୨୩ ପର୍ଯ୍ୟନ୍ତ ତାଙ୍କ ପାଖରେ ୨୦୦ ଟନ୍ ସୁନା, ୧୬ ବିଲିୟନ ଡଲାର ଏବଂ ୫ ବିଲିୟନ ୟୁରୋ ସମେତ ଅନ୍ୟାନ୍ୟ ସମ୍ପତ୍ତି ରହିଥିଲା । କିନ୍ତୁ ଅସଦ ଯେତେବେଳେ ସିରିଆ ଛାଡି ପଳାୟନ କରିଛନ୍ତି ସେତେବେଳେ ନିଜ ସହ କଣ ନେଇଛନ୍ତି ସେ ସମ୍ପର୍କରେ କୌଣସି ସ୍ପଷ୍ଟ ସୂଚନା ନାହିଁ। ଏସବୁ ବ୍ୟତୀତ ଅସଦଙ୍କର ରହିଛି ଏକ ବଡ ଲଗଜୁରୀ କାର କଲେକ୍ସନ୍ । ଯେଉଁଥିରେ ଅନେକ ଦାମୀ ଏବଂ ବିଳାସପୂର୍ଣ୍ଣ କାର୍ ସାମିଲ ରହିଛି ।
ଦେଶ ଛାଡିବା ପରେ ବିଦ୍ରୋହୀ ଗୋଷ୍ଠୀ ଅସଦଙ୍କ ବଙ୍ଗଳାକୁ ନଷ୍ଟ କରିବା ସମୟର ଫଟୋ ଭାଇରାଲ୍ ହୋଇଥିଲା । ଏହି ସମୟରେ ନଜରକୁ ଆସିଥିଲା ଅସଦଙ୍କ ଗ୍ୟାରେଜ୍ । ଏଥିରେ ଲଗଜୁରୀ କାର ହୋଇଥିଲା ପାର୍କି । ରାଷ୍ଟ୍ରପତି ବଶର ଅଲ-ଅସଦଙ୍କ କାର କଲେକ୍ସନ ବିଷୟରେ କହିବାକୁ ଗଲେ ଏଥିରେ ସବୁଠାରୁ ଦାମୀ କାର ଥିଲା ରୋଲ୍ସ ରୋଏସ୍ ଫାଣ୍ଟମ୍ । ଯାହାର ଦାମ୍ ପ୍ରାୟ ୯ କୋଟି ଟଙ୍କା । ଏହାବ୍ୟତୀତ ଏଷ୍ଟନ୍ ମାର୍ଟିନ୍ ଡିବି ସିରିଜ୍ ରହିଥିଲା । ଏହାର ଦାମ୍ ପାଖାପାଖି ୩-୪ କୋଟି ଟଙ୍କା ।
କେବଳ ଏତିକି ହିଁ ନୁହେଁ ବଶର ଅଲ-ଅସଦଙ୍କ କାର୍ କଲେକ୍ସନ୍ରେ ଫରାରୀ କାର୍ ନଜରକୁ ଆସିଥିଲା । ଏଥିରେ ଫରାରୀ ଏଫ୍୪୦, ଫରାରୀ ଏସ୍୪୩୦ ସାମିଲ ରହିଛି । ଏହାବ୍ୟତୀତ ଲାଲ୍ ଏବଂ କଳା ରଙ୍ଗର ଲଗଜୁରୀ ଲାମ୍ପୋର୍ଗିନି କାର ମଧ୍ୟ ରହିଥିଲା । ପୂର୍ବରୁ ପଳାତକ ରାଷ୍ଟ୍ରପତିଙ୍କ ନିକଟରେ ମର୍ସିଡିଜ୍ ବେଞ୍ଜ୍ କୁପ, ବିଏମଡବ୍ଲୁ, ଅଡି ଭଳି ଡଜନେ କାର ପ୍ରାୟତଃ ଦେଖିବାକୁ ମିଳୁଥିଲା । ଯାହା ତାଙ୍କ ବଙ୍ଗଳାର ପାର୍କିଂରେ ପାର୍କ ହେଉଥିଲା ।
ସୂଚନା ଅନୁଯାୟୀ ସିରିଆ ଗୃହଯୁଦ୍ଧ ମଧ୍ୟରେ ରାଷ୍ଟ୍ରପତି ବଶର ଅଲ-ଅସଦ ଦେଶ ଛାଡି ବିମାନରେ ଚାଲି ଯାଇଥିଲେ । ଏହାପରେ ସେ ରୁଷରେ ଆଶ୍ରୟ ନେଇଛନ୍ତି । ସିରିଆରେ ବିଦ୍ରୋହ ୨୦୧୧ରେ ଆରମ୍ଭ ହୋଇଥିଲା । ଯେତେବେଳେ ଅସଦ ସରକାର ଗଣତନ୍ତ୍ର ସମର୍ଥକ ବିରୋଧକୁ ଅତି ନିର୍ମମ ଭାବରେ ଦମନ କରିଥିଲେ। ଏହି ବିବାଦ ଧୀରେ ଧୀରେ ଗୃହଯୁଦ୍ଧରେ ପରିଣତ ହୋଇଥିଲା ।
ଯେଉଁଥିରେ ଅସଦ ସରକାରଙ୍କ ବିରୁଦ୍ଧରେ ଅନେକ ବିଦ୍ରୋହୀ ଗୋଷ୍ଠୀ ମୁଣ୍ଡ ଟେକି ଉଠିଥିଲେ । ଶେଷରେ ୧୩ବର୍ଷର ଏହି ବିବାଦ ଅସଦ ଶାସନକୁ ମାଟିରେ ମିଶାଇ ଦେଇଛି । ବିଦ୍ରୋହୀ ଗୋଷ୍ଠୀ କେବଳ ଦମସକସ୍ ଉପରେ କବ୍ଜା କରିଛନ୍ତି ତା ନୁହେଁ ବରଂ ସିରିଆବାସୀଙ୍କୁ ଏକ ନୂଆ ଆରମ୍ଭର ସୁଯୋଗ ଦେଇଛନ୍ତି।
