ଲକ୍ଷ୍ନୌ: ବୋଲରଙ୍କ ପରେ ଦମ ଦେଖାଇଲେ ବ୍ୟାଟର। ଲକ୍ଷ୍ନୌରେ ଖେଳା ଯାଇଥିବା ଆଇପିଏଲ୍ ୨୦୨୫ର ୧୩ତମ ମ୍ୟାଚ୍ରେ ସହଜ ବିଜୟ ହାସଲ କରିଛି ପଞ୍ଜାବ କିଙ୍ଗ୍ସ। ଲକ୍ଷ୍ନୌ ସୁପର ଜାଏଣ୍ଟସକୁମ ତାରି ଘରେ ୮ ଓ୍ଵିକେଟ୍ରେ ହରାଇଛି ପଞ୍ଜାବ। ଏଥିସହ ଚଳିତ ସିଜିନରେ ଲଗାତାର ଦ୍ଵିତୀୟ ବିଜୟ ହାସଲ କରିଛି ଶ୍ରେୟସ ଆୟରଙ୍କ ନେତୃତ୍ଵାଧୀନ ଦଳ। ଅନ୍ୟପଟେ ଏଲଏସଜି ତୃତୀୟ ମ୍ୟାଚ୍ରୁ ଦ୍ଵିତୀୟ ପରାଜୟ ଭୋଗିଛି। ଲକ୍ଷ୍ନୌ ଦ୍ଵାରା ଧାର୍ଯ୍ୟ ୧୭୨ ରନର ବିଜୟ ଲକ୍ଷ୍ୟକୁ ପଞ୍ଜାବ ୧୬.୨ ଓଭରରେ ୨ ଓ୍ଵିକେଟ୍ ହରାଇ ହାସଲ କରି ନେଇଛି। ପ୍ରଭସିମରନ ସିଂ ୬୯ ରନର ଅର୍ଦ୍ଧଶତକୀୟ ଇନିଂସ ଖେଳିଥିବା ବେଳେ ଅଧିନାୟକ ଶ୍ରେୟସ ଆୟର ୫୨ ରନ ଓ ନେହଲ ଓ୍ଵେଧେରା ୪୩ ରନ ଅପରାଜିତ ଇନିଂସ ଖେଳିଛନ୍ତି। ବିଜୟ ସହ ପଞ୍ଜାବ ପଏଣ୍ଟ ଟେବୁଲର ଦ୍ଵିତୀୟକୁ ଉଠିଥିବା ବେଳେ ଲକ୍ଷ୍ନୌ ଷଷ୍ଠକୁ ଖସିଛି।
ଏହା ପୂର୍ବରୁ ଟସ୍ ହାରି ପ୍ରଥମେ ବ୍ୟାଟିଂ କରିଥିଲା ଲକ୍ଷ୍ନୌ। ଦଳ ୧ ରନ ସ୍କୋରରେ ମିଚେଲ୍ ମାର୍ଶ(୦)ଙ୍କ ରୂପେ ପ୍ରଥମ ଓ୍ଵିକେଟ୍ ହରାଇଥିଲା। ଭଲ ବ୍ୟାଟିଂ କରୁଥିବା ଆଡନ ମାରକ୍ରମ ୨୮ ରନ କରି ଆଉଟ୍ ହୋଇଥିଲେ। ଅଧିନାୟକ ଋଷଭ ପନ୍ତ ନିଜର ଖରାପ ଫର୍ମ ଜାରି ରଖି ମାତ୍ର ୨ ରନ କରି ପାଭିଲିୟନ ଫେରିଥିଲେ। ମଧ୍ୟକ୍ରମରେ ନିକୋଲାସ ପୂରନ ଓ ଆୟୂଷ ବାଦୋନି ଇନିଂସ ସମ୍ଭାଳିଥିଲେ।
ନିକୋଲାସ ପୂରନ ୩୦ ବଲରୁ ୫ ଚୌକା ଓ ୨ ଛକା ଜରିଆରେ ୪୪ ରନ କରିଥିଲେ। ଡେଭିଡ୍ ମିଲର ଧିମା ୧୯ ରନ କରିଥିଲେ। ଆୟୂଷ ବାଦୋନି କ୍ରିଜରେ ସେଟ୍ ହୋଇଥିଲେ ହେଁ ବିସ୍ଫୋରକ ବ୍ୟାଟିଂ କରିବାରେ ବିଫଳ ହୋଇଥିଲେ। ସେ ୩୩ ବଲରୁ ୪୧ ରନ କରି ପାଭିଲିୟ ଫେରିଥିଲେ। ଶେଷ ଆଡ଼କୁ ଅବଦୁଲ ସାମଦ ୧୨ ବଲରୁ ୨୭ ରନ କରିବାରୁ ଲକ୍ଷ୍ନୌ ୭ ଓ୍ଵିକେଟ୍ ହରାଇ ୧୭୧ ରନ କରି ପାରିଛି।
ବୋଲିଂରେ ଅର୍ଶଦୀପ ସିଂ ୪୩ ରନ ଦେଇ ସର୍ବାଧିକ ୩ଟି ଓ୍ଵିକେଟ୍ ଅକ୍ତିକାର କରିଛନ୍ତି। ଲୋକି ଫର୍ଗ୍ୟୁସନ, ଗ୍ଲେନ ମ୍ୟାକ୍ସଓ୍ଵେଲ, ମାର୍କୋ ଜନସେନ ଓ ୟୁଜବେନ୍ଦ୍ର ଚହଲ ପ୍ରତ୍ୟେକଙ୍କୁ ଗୋଟିଏ ଲେଖାଏଁ ଓ୍ଵିକେଟ୍ ମିଳିଛି।
ଜବାବରେ ପଞ୍ଜାବ କିଙ୍ଗସ ଆରମ୍ଭରୁ ୱିକେଟ୍ ହରାଇଥିଲା । ପ୍ରିୟଂଶ ଆର୍ଯ୍ୟ ୮ ରନ କରି ଆଉଟ୍ ହୋଇଥିଲେ । ଏହା ପରେ ପ୍ରଭସିମରନ ସିଂ ଧୂଆଁଧାର ବ୍ୟାଟିଂ କରିଥିଲେ । ଆଉ ଅଧିନାୟକ ଶ୍ରେୟସ ଆୟର ତାଙ୍କୁ ଉତ୍ତମ ସହଯୋଗ ଦେଇଥିଲେ । ଦୁଇ ବ୍ୟାଟର ଦ୍ରୁତ ବ୍ୟାଟିଂ କରି ଦ୍ୱିତୀୟ ୱିକେଟରେ ୮୪ ରନ ଯୋଡି ଦଳ ବିଜୟ ସୁନିଶ୍ଚିତ କରିଥିଲେ । ପ୍ରଭସିମରନ ୩୪ ବଲରୁ ୯ ଚୌକା ଓ ୩ ଛକା ସହ ୬୯ ରନ କରି ପାଭିଲିୟନ ଫେରିଥିଲେ । ଅଧିନାୟକ ଶ୍ରେୟସ ଆୟର ଆଉ ଏକ ଦମଦାର ଅର୍ଦ୍ଧଶତକୀୟ ଇନିଂସ ଖେଳିଥିଲେ । ସେ ଓ ନେହଲ ୱେଧରା ଅବିଭାଜିତ ତୃତୀୟ ଯୋଡିରେ ୬୭ ରନ ଯୋଡି ଦଳକୁ ଜିତାଇଥିଲେ । ଶ୍ରେୟସ ୩୦ ବଲରୁ ୩ ଚୌକା ଓ ୪ ଛକା ଜରିଆରେ ୫୨ ରନ କରି ଅପରାଜିତ ଥିଲେ । ନେହଲ ୱେଧରା ୪୩ ରନର ବିସ୍ଫୋରକ ଇନିଂସ ଖେଳି କ୍ରିଜରେ ଥିଲେ । ପଞ୍ଜାବ ୧୬.୨ ଓଭରରେ ମାତ୍ର ୨ ୱିକେଟ୍ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା । ଏଲଏସଜିର ବୋଲର ମହଙ୍ଗା ସାବ୍ୟସ୍ତ ହୋଇଥିଲେ ।
