ନୂଆଦିଲ୍ଲୀ: ୱାକଫ୍ ସଂଶୋଧନ ବିଧେୟକ ଉପରେ ସଂଯୁକ୍ତ ସଂସଦୀୟ ସମିତି (ଜେପିସି)କୁ ପ୍ରାୟ ୧.୨୫ କୋଟି ଫିଡ୍ବ୍ୟାକ୍ ମିଳିଛି । ଏବେ ଏହା ପଛରେ ବିଦେଶୀ ଶକ୍ତିଙ୍କ ଷଡ଼ଯନ୍ତ୍ର ଥିବା ବିଜେପି ଆଶଂକା କରୁଛି । ଝାଡ଼ଖଣ୍ଡର ଗୋଡ୍ଡାରୁ ବିଜେପି ସାଂସଦ ନିଶିକାନ୍ତ ଦୁବେ ବିଦେଶୀ ସଂସ୍ଥା ଏବଂ କଟ୍ଟରପନ୍ଥୀ ସଂଗଠନର ସମ୍ଭାବିତ ପ୍ରଭାବ ଥିବା ଆଶଂକା କରିଛନ୍ତି । ଏହି ଫିଡ୍ବ୍ୟାକ୍ କେଉଁଠାରୁ ଆସିଛି ତାହା ଜାଣିବା ପାଇଁ ବିଜେପି ସାଂସଦ ଗୃହ ମନ୍ତ୍ରଣାଳୟ ନେତୃତ୍ୱରେ ଏକ ବ୍ୟାପକ ତଦନ୍ତ ପାଇଁ ମଧ୍ୟ ଦାବି କରିଛନ୍ତି । କେନ୍ଦ୍ରର ମୋଦୀ ସରକାର ୱାକଫ୍ ଆଇନରେ କିଛି ଗୁରୁତ୍ୱପୂର୍ଣ୍ଣ ପରିବର୍ତ୍ତନ ପାଇଁ ଗତ ଅଧିବେଶନରେ ଲୋକସଭାରେ ସଂଶୋଧନ ବିଧେୟକ ଆଗତ କରିଥିଲେ । ବିରୋଧୀ ଏହି ବିଧେୟକକୁ ଜେପିସିକୁ ପଠାଇବା ପାଇଁ ଦାବି କରିଥିଲେ ଏବଂ ଏବେ ଏହି ୱାକଫ୍ ସଂଶୋଧନ ବିଲ୍ ଜେପିସି ନିକଟରେ ରହିଛି ।
ନିଶିକାନ୍ତ ଦୁବେ ଜେପିସି ସଦସ୍ୟଙ୍କ ମଧ୍ୟରେ ସାମିଲ ଅଛନ୍ତି । ସେ ଜେପିସି ଅଧ୍ୟକ୍ଷ ଜଗଦମ୍ୱିକା ପାଲଙ୍କୁ ଏକ ଚିଠି ଲେଖି ମିଳିଥିବା ଫିଡ୍ବ୍ୟାକ୍ ସଂଖ୍ୟା ଉପରେ ସନ୍ଦେହ ପ୍ରକାଶ କରିଛନ୍ତି । ସେ କହିଛନ୍ତି ଯେ ଭାରତ ଭିତରୁ ସ୍ୱାଭାବିକ ଭାବେ ଏତେ ସଂଖ୍ୟାରେ ମତାମତ ଆସିପାରିବ ନାହିଁ । ଅନେକ ମତାମତ ଲେଖା ଏବଂ ଭାଷା ମେଳ ଖାଉଛି, ଯେଉଁଥିରୁ ଷଡ଼ଯନ୍ତ୍ରର ଗନ୍ଧ ଆସୁଛି । ଦୁବେ କହିଛନ୍ତି, 'ସବୁଠୁ ବଡ଼ ପ୍ରସଙ୍ଗ ଏହା ଯେ ଏଥିରୁ କେତେ ମତାମତ ଭାରତ ଭିତରୁ ଏବଂ କେତେ ବିଦେଶରୁ ଆସିଛି ।'
ବିଜେପି ସାଂସଦ ଏଥିରେ ବିଶେଷ ଭାବେ ଜାକିର ନାଇକ ପରି ବ୍ୟକ୍ତି ଏବଂ ଜମାତ-ଏ-ଇସ୍ଲାମୀ ପରି ସଂଗଠନ ସହ ପାକିସ୍ତାନର ଆଇଏସଆଇ ଏବଂ ଚୀନ ସମେତ କିଛି ବିଦେଶୀ ଏଜେନ୍ସିଙ୍କ ନାଁ ଲେଖିଛନ୍ତି, ଯେଉଁମାନେ କେବଳ ଭାରତରେ ଅସ୍ଥିରତା ପାଇଁ ଲାଗିଛନ୍ତି । ଦୁବେ ଜୋର ଦେଇ କହିଛନ୍ତି, 'ଏହି ଫିଡବ୍ୟାକ୍ କେଉଁଠୁ ଆସିଛି, ସତର୍କତା ସହ ତଦନ୍ତ ହେବା ଦରକାର । ଆମେ ବିଦେଶୀ ଶକ୍ତିଙ୍କ ସମ୍ଭାବିତ ଏଜେଣ୍ଡା ଉପରେ ଆଧାରିକ ଇନପୁଟ୍ ଜରିଆରେ ଜେପିସିକୁ ପ୍ରଭାବିତ କରିବା ପାଇଁ ଅନୁମତି ଦେଇପାରିବା ନାହିଁ ।'
ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ ମଧ୍ୟ ଏଭଳି ସମ୍ଭାବନାକୁ ଦୋହରାଇଛନ୍ତି । କେନ୍ଦ୍ରମନ୍ତ୍ରୀ କହିଛନ୍ତି ଯେ ଏତେ ସଂଖ୍ୟାରେ ମିଳିଥିବା ମତାମତ ସ୍ୱାଭାବିକ ସ୍ଥିତିକୁ ଦର୍ଶାଉ ନାହିଁ । ସେ କହିଛନ୍ତି ଯେ ପୂର୍ବେ ୧୦୦୦ ଫିଡ୍ବ୍ୟାକ୍ ମିଳିତ ବହୁ ଅଧିକ ବୋଲି ଧରାଯାଉଥିଲା । ରିଜିଜୁ ପ୍ରକ୍ରିୟାରେ ପାରଦର୍ଶିତା ଉପରେ ଜୋର ଦେଇ କହିଛନ୍ତି, 'ଜେପିସିକୁ କୋଟିଏରୁ ଅଧିକ ସଂଖ୍ୟାରେ ଫିଡ୍ବ୍ୟାକ୍ ମିଳିବ ବୋଲି କେହି ମଧ୍ୟ ଭାବି ନଥିଲେ ।'
