ମୁମ୍ବାଇ: ପୂର୍ବତନ ପ୍ରେମିକଙ୍କୁ ହତ୍ୟା ଅଭିଯୋଗରେ ଗିରଫ ହେଲେ ବଲିଉଡ୍ ଅଭିନେତ୍ରୀ ନର୍ଗିସ୍ ଫଖରିଙ୍କ ଭଉଣୀ ଆଲିୟା । ଆଲିୟା ଫଖରିଙ୍କୁ ନ୍ୟୁୟର୍କ ପୋଲିସ ଗିରଫ କରିଥିବା ଜଣାପଡ଼ିଛି। ଅଭିଯୋଗ ରହିଛି ନ୍ୟୁୟର୍କର କ୍ବିନ୍ସରେ ଆଲିୟା ଏକ ଦୁଇ ମହଲା ଗ୍ୟାରେଜ୍ରେ ନିଆଁ ଲଗାଇ ଦେଇଥିଲେ । ଏଥିରେ ତାଙ୍କ ପୂର୍ବତନ ପ୍ରେମିକ ୩୫ ବର୍ଷୀୟ ଏଡଓ୍ବାର୍ଡ ଜାକୋବସ୍ ଏବଂ ତାଙ୍କର ନୂଆ ବାନ୍ଧବୀ ୩୩ ବର୍ଷୀୟ ଅନସ୍ତାସିଆ ଜୀବନ୍ତଦଗ୍ଧ ହୋଇଥିଲେ। ଇର୍ଷାପରାୟଣ ହୋଇ ଆଲିୟା ଡବଲ୍ ମର୍ଡର କରିଥିବା ଅଭିଯୋଗ ହୋଇଥିଲା।
ମିଳିଥିବା ସୂଚନା ଅନୁସାରେ, ଏକ ଗ୍ୟାରେଜ ଭିତରେ ଦୁଇ ଜଣ ଥିବା ବେଳେ ଆଲିୟା ନିଆଁ ଲଗାଇ ଦେଇଥିଲେ । ବିଷାକ୍ତ ଧୂଆଁ ଏବଂ ନିଆଁରେ ପୋଡ଼ି ଜୀବନ ହରାଇଥିଲେ ଏଡଓ୍ବାର୍ଡ ଏବଂ ଅନସ୍ତାସିଆ । ଆଲିୟାଙ୍କ ଏହି କାର୍ଯ୍ୟକୁ ‘ବର୍ବର କାଣ୍ଡ’ର ଆଖ୍ୟା ଦେଇଛନ୍ତି ଜଜ୍ ମେଲିଣ୍ଡା କାଜ୍ । ସେପଟେ ଆଲିୟାଙ୍କ ଜାମିନ ଆବେଦନକୁ କ୍ବିନ୍ସର ଏକ କୋର୍ଟ ଖାରଜ କରିଦେଇଛନ୍ତି ।
ସେପଟେ ଘଟଣାକୁ ନେଇ ନର୍ଗିସ କୌଣସି ପ୍ରତିକ୍ରିୟା ଦେଇନାହାନ୍ତି । କିନ୍ତୁ ତାଙ୍କ ମା’ କହିଛନ୍ତି ଯେ, ଆଲିୟା କାହାକୁ ହତ୍ୟା କରିବା ଅସମ୍ଭବ। ସେ ସମସ୍ତଙ୍କ ଯତ୍ନ ନେବାକୁ ଭଲ ପାଏ ଏବଂ ସାହାଯ୍ୟ କରିବାକୁ ସର୍ବଦା ଚେଷ୍ଟା କରେ । ଏହା ବ୍ୟତୀତ ଆଲିୟା ଏକ ଗୁରୁତର ରୋଗରେ ପୀଡ଼ିତ ଥିବା କଥା କହିଛନ୍ତି ତାଙ୍କ ମା’ ।
