ନୂଆଦିଲ୍ଲୀ: ଆନ୍ଧ୍ର ପ୍ରଦେଶର ଏଲୁର ଜିଲ୍ଲାରେ ବାଇକରେ ପିଆଜ ବୋମା (ବାଣ) ନେବା ବେଳେ ଭୟଙ୍କର ବିସ୍ଫୋରଣ ଘଟିଛି । ବୋମା ନେଇ ଯିବା ବେଳେ ରାସ୍ତାରେ ଥିବା ଖାଲରେ ବାଇକ୍ ପଡ଼ିବା ପରେ ବିସ୍ଫୋରଣ ହୋଇଥିଲା । ମିଡିଆ ରିପୋର୍ଟ ଅନୁସାରେ ଏହି ଅଘଟଣରେ ତିନି ଯୁବକଙ୍କ ମୃତ୍ୟୁ ହୋଇଛି । ଅନ୍ୟପଟେ ପାଞ୍ଚ ଜଣ ଆହତ ହୋଇଛନ୍ତି । ବିସ୍ଫୋରଣ ସମୟର ସିସିଟିଭି ଫୁଟେଜ୍ ଭାଇରାଲ ହେବାରେ ଲାଗିଛି ।
ମିଡିଆ ରିପୋର୍ଟ ଅନୁସାରେ ଏଲୁର ଜିଲ୍ଲାରେ ବାଇକରେ ଦୁଇ ଜଣ ଗୋଟିଏ ଅଖାରେ ପିଆଜ ବୋମା ନେଇ ଯାଉଥିଲେ । ତେବେ ଗୋଟିଏ ଗଳି ଦେଇ ଯିବା ବେଳେ ବାଇକ୍ ଖାଲରେ ପଡ଼ିବା ଯୋଗୁଁ ବୋମା ଭର୍ତ୍ତି ଅଖା ରାସ୍ତାରେ ପଡ଼ି ବିସ୍ଫୋରଣ ହୋଇଥିଲା । ତେବେ ଦୁର୍ଭାଗ୍ୟକୁ ବିସ୍ଫୋରଣ ସ୍ଥାନରେ ଅନ୍ୟ ୬ ଜଣ ଲୋକ ଠିଆ ହୋଇ କଥାବର୍ତ୍ତା ହେଉଥିଲେ । ଏହି ବିସ୍ଫୋରଣରେ ୪ରୁ ୫ ଜଣ ଆହତ ହୋଇଛନ୍ତି ।
ଘଟଣାର ସିସିଟିଭି ଫୁଟେଜ ଭାଇରାଲ ହେବାରେ ଲାଗିଛି । ଏଥିରେ ଅପରାହ୍ଣ ୧୨ଟା ବେଳେ ବାଇକରେ ଦୁଇ ଜଣ ଲୋକ ଗୋଟିଏ ଗଳି ଦେଇ ଯାଉଥିବା ଦେଖିବାକୁ ମିଳୁଛି । ବାଇକ ଗଳି ମୁଣ୍ଡରେ ପହଞ୍ଚିବା ବେଳେ ହଠାତ୍ ବିସ୍ଫୋରଣ ହେଉଥିବା ଦେଖିବାକୁ ମିଳୁଛି । ଏହାପରେ ପୂରା ଅଞ୍ଚଳ ଧୂଆଁ ଧୂଆଁ ହୋଇଯାଇଥିଲା । ଏହାସହ ଚାରିଆଡ଼େ କାଗଜ ଉଡ଼ୁଥିବା ଦେଖିବାକୁ ମିଳୁଛି ।
ବିସ୍ଫୋରଣରେ ବାଇକ ଆରୋହୀଙ୍କ ମୃତ୍ୟୁ ହୋଇଛି । ମୃତକର ଶରୀର ଖଣ୍ଡ ଖଣ୍ଡ ହୋଇ ଦୂରରେ ଯାଇ ପଡ଼ିଥିଲା । ମୃତକଙ୍କ ନାଁ ସୁଧାକର ବୋଲି ଜଣାପଡ଼ିଛି । ମିଡିଆ ରିପୋର୍ଟ ଅନୁସାରେ ବିସ୍ଫୋରଣରେ ଅନ୍ୟ ଦୁଇ ଜଣଙ୍କ ମୃତ୍ୟୁ ହୋଇଛି । ପୋଲିସ ଘଟଣା ସ୍ଥଳରେ ପହଞ୍ଚି ମାମଲା ରୁଜୁ କରିବା ସହ ତଦନ୍ତ ଆରମ୍ଭ କରିଛି ।
