ଭଦ୍ରକ ୧୨।୦୧ : ରୋଜଗାର କ୍ଷମ ହେବେ ଭିନ୍ନକ୍ଷମ । ଆର୍ଥିକ ସହ ସାମାଜିକ ସ୍ଥଳରେ ପ୍ରତିଷ୍ଠା ଲାଭ କରିବେ । ଏଥିପାଇଁ ସ୍ୱତନ୍ତ୍ର ବ୍ୟବସ୍ଥା କରିଛନ୍ତି ରାଜ୍ୟ ସରକାର । ଭିନ୍ନକ୍ଷମଙ୍କୁ ଆର୍ଥିକ ସ୍ଥରରେ ମଜ୍ବୁତ୍ କରିବା ପାଇଁ ଦିଆଯାଇଛି ଇ-ରିକ୍ସା । ଭଦ୍ରକ ଜିଲ୍ଲାରେ ୧୭ ଜଣ ଭିନ୍ନକ୍ଷମ ବ୍ୟକ୍ତିମାନଙ୍କୁ ୧୭ ରିକ୍ସା ଏବଂ କିଟ୍ ବଣ୍ଟନ ପରେ ସେମାନେ ବେଶ୍ ଉତ୍ସାହିତ ଅଛନ୍ତି । ଜିଲ୍ଲାପାଳଙ୍କ କାର୍ଯ୍ୟାଳୟରେ ଆୟୋଜିତ ଏହି ବଣ୍ଟନ କାର୍ଯ୍ୟକ୍ରମକୁ ଭଦ୍ରକ ବିଧାୟକ ସୀତାଂଶୁ ଶେଖର ମହାପାତ୍ର, ଜିଲ୍ଲାପାଳ ଦିଲ୍ଲୀପ ରାଉତରାୟ ଅନୁଷ୍ଠାନିକ ଭାବେ ଉଦ୍ଘାଟନ କରିଥିଲେ ।
ତେବେ ଇ-ରିକ୍ସା ପାଇଥିବା ବ୍ୟକ୍ତି ମଧ୍ୟରେ ଭଦ୍ରକ ବ୍ଲକର ୪ଜଣ, ବାସୁଦେବପୁର ବ୍ଲକର ୩ ଜଣ, ଭଣ୍ଡାରିପୋଖରୀ ବ୍ଲକର ଜଣେ, ବନ୍ତ ବ୍ଲକର ୨ ଜଣ, ଚାନ୍ଦବାଲି ବ୍ଲକର ୩ ଜଣ, ଧାମନଗର ବ୍ଲକର ୨ଜଣ, ତିହିଡି ବ୍ଲକର ୨ ଜଣ ରହିଛନ୍ତି । ଏମ୍ସିଏଲ୍ ତରଫରୁ ଏହି ଇ-ରିକ୍ସା ବଣ୍ଟନ ପୂର୍ବରୁ ଚୟନ ପ୍ରକ୍ରିୟା ଆରମ୍ଭ ହୋଇଥିଲା । ୪୦ ପ୍ରତିଶତରୁ ଅଧିକ ଭିନ୍ନକ୍ଷମଙ୍କୁ ମେଡିକାଲର ବିଶେଷଜ୍ଞ ଯାଞ୍ଚ କରିଥିଲେ । ଭିନ୍ନକ୍ଷମମାନେ ଇ-ରିକ୍ସା ଚଳାଇ ରୋଜଗାର କରିବେ । ପରିବାର ପୋଷି ଅନ୍ୟ ପାଇଁ ପ୍ରେରଣା ସାଜିବେ ।
