ମୁମ୍ବାଇ ୮।୯: ଏଥର ଗଣପତି ବିସର୍ଜନ ଓ ଇଦ-ଏ-ମିଲାଦ ଉଭୟ ୧୭ ସେପ୍ଟେମ୍ବର ଗୋଟିଏ ଦିନରେ ପଡୁଛି। ଏଣୁ ମହାରାଷ୍ଟ୍ର ଖିଲାଫତ କମିଟି ଉଦାରତା ଦେଖାଇ ବଡ଼ ଘୋଷଣା କରିଛି। ଖିଲାଫତ କମିଟି ଶନିବାର ଅନୁଷ୍ଠିତ ବୈଠକରେ ଇଦ-ଏ-ମିଲାଦ-ଉନ-ନବି ଶୋଭାଯାତ୍ରାର ତାରିଖ ୧୭ ବଦଳେ ୧୮ ସେପ୍ଟେମ୍ବର କରିଦେଇଛି। ଖିଲାଫତ କମିଟି ଉଲ୍ଲେମା-ଏ-ଇକ୍ରମ ଓ ସବୁ ରାଜନୈତିକ ଦଳ ନେତାଙ୍କ ଉପସ୍ଥିତିରେ ଏହି ଘୋଷଣା କରିଛି।
ଏଥିରେ ଏଆଇଏମଆଇଏମ ନେତା ୱାରିସ ପଠାନ ଇଦ-ଏ-ମିଲାଦ ଶୋଭାଯାତ୍ରା ଦିନ ସରକାରଙ୍କ ନିକଟରେ ଗୋଟିଏ ଦିନ ଛୁଟି ନିବେଦନ କରିଛନ୍ତି। ଏ ନେଇ ୱାରିସ ପଠାନ ଏକ୍ସରେ ଏକ ପୋଷ୍ଟ କରିଥିବା ବେଳେ ମୁସଲମାନମାନଙ୍କ ଭାବନାକୁ ଦୃଷ୍ଟିରେ ରଖି ସେପ୍ଟେମ୍ବର ୧୮ ତାରିଖ ଦିନ ଛୁଟି ଘୋଷଣା କରନ୍ତୁ ଓ ପୁରା ମହାରାଷ୍ଟ୍ରରେ ଏହି ଗୋଟିଏ ଦିନକୁ ମଦବନ୍ଦ ଘୋଷଣା କରନ୍ତୁ ବୋଲି ନିବେଦନ କରିଛନ୍ତି। ଏଣୁ ଗଣେଶ ପୂଜା ବିସର୍ଜନ କାଳରେ ମୁସଲମାନମାନଙ୍କ ଧାର୍ମିକ କାର୍ଯ୍ୟକ୍ରମ ଯୋଗୁ ଉପୁଜିବାକୁ ଥିବା ସମସ୍ୟା ଦୂର ହେବ ବୋଲି ଏବେ ଆଶା କରାଯାଉଛି।