ତେଲକୋଇ: ୧୦ ବର୍ଷର ନାବାଳକକୁ ଶୁଣ୍ଢରେ ଉଠାଇ ଫିଙ୍ଗିଦେଲା ଦନ୍ତା। ତେଲକୋଇ ଫରେଷ୍ଟ ବିଟ କନ୍ତଲେଇ ଗାଁ ମୁଣ୍ଡାସାହିରେ ଘଟିଛି ଘଟଣା। ଗୁରୁତର ଆହତ ନାବାଳକର ନାଁ ଚରଣ ମୁଣ୍ଡା। ପ୍ରକୃତରେ ହାତୀ ପଲରେ ଥିବା ଦନ୍ତା ଚରଣଙ୍କୁ ଶୁଣ୍ଢରେ ଫିଙ୍ଗି ଦେଇଥିଲା। ଫଳରେ ଚରଣ ଗୁରୁତର ହୋଇପଡିଥିଲେ।
ସୂଚନା ଅନୁଯାୟୀ, ଶନିବାର ଅପରାହ୍ନରେ ଘଟିଛି ଏହି ଘଟଣା। ଘର ନିକଟରେ ଥିବାବେଳେ ୭୦ ଟିକିଏ ହାତୀ ପଲ ହାବୁଡ଼ରେ ପଡିଯାଇଥିଲେ ନାବାଳକ। ଆଉ ଏହି ହାତୀ ପଲ ମଧ୍ୟରୁ ଗୋଟିଏ ଦନ୍ତା ହାତୀ ତାଙ୍କୁ ଶୁଣ୍ଢରେ ଉଠାଇ ଫିଙ୍ଗି ଦେଇଥିଲା। ଫଳରେ ଏଥିରେ ଗୁରୁତର ଆହତ ହୋଇଥିଲେ ଚରଣ।
ତାଙ୍କୁ ସଙ୍ଗେ ସଙ୍ଗେ ତେଲକୋଇ ମେଡିକାଲରେ ଭର୍ତ୍ତି କରାଯାଇଥିଲା। କିନ୍ତୁ ଅବସ୍ଥା ଗୁରୁତର ହେବାରୁ ତାଙ୍କୁ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି। ନାବାଳକ ଏବଂ ତାଙ୍କ ଭାଇ ଆଈମାଙ୍କ ସହ ରହୁଛନ୍ତି। ତାଙ୍କର ମାଆ ଓ ବାପାଙ୍କ ମୃତ୍ୟୁ ଘଟିଥିବାବେଳେ କେବଳ ଆଇଙ୍କ ଆଶ୍ରାରେ ରହିଛନ୍ତି ଦୁଇ ଭାଇ।
ତେବେ ଦୀର୍ଘ ଦିନ ହେବ ତେଲକୋଇ ରେଞ୍ଜରେ ହାତୀ ପଲଙ୍କ ଉପଦ୍ରବ ଜାରି ରହିଥିବାବେଳେ ଫସଲକୁ ସୁରକ୍ଷା ଦେବାପାଇଁ ଲୋକେ ନିଆଁ ଜାଳି ହାତୀଙ୍କ ଗତିପଥକୁ ଅବରୋଧ କରୁଛନ୍ତି। ଯାହାଫଳରେ ହାତୀପଲ ଗାଁ ଆଡ଼କୁ ମୁହାଁଉଛନ୍ତି ବୋଲି ବନ୍ୟାଞ୍ଚଳ ଅଧିକାରୀ ପ୍ରକାଶ କରିଛନ୍ତି।
