ବର୍ଲିନ,୨/୭: ବେଲଜିୟମର ଭାଙ୍ଗିଲା ୟୁରୋ ଟାଇଟଲ ସ୍ବପ୍ନ । ଫିଫା ମାନ୍ୟତାର ତୃତୀୟ ସ୍ଥାନରେ ରହିଥିବା ବେଲଜିୟମ ୟୁରୋ ଚାମ୍ପିଅନସିପ୍ରୁ ବାଦ ପଡ଼ିଛି । ଡୁସେଲଡର୍ଫରେ ଅନୁଷ୍ଠିତ ରାଉଣ୍ଡ-୧୬ର ଏକ ମ୍ୟାଚ୍ରେ ବେଲ୍ଜିୟମ୍ ୦-୧ ଗୋଲ୍ରେ ଫ୍ରାନ୍ସ ଠାରୁ ପରାସ୍ତ ହୋଇଛି । ଏହି ମ୍ୟାଚ୍ଟି ତୀବ୍ର ସଂଘର୍ଷପୂର୍ଣ୍ଣ ରହିଥିଲେ ମଧ୍ୟ ଶେଷରେ ବେଲ୍ଜିୟମ୍ ଖେଳାଳି ଜାନ୍ ଭର୍ତୋଙ୍ଗେନଙ୍କ ଆତ୍ମଘାତୀ ଗୋଲ୍ ବଳରେ ଫ୍ରାନ୍ସ ବିଜୟ ହାସଲ କରିଥିଲା । ଫ୍ରାନ୍ସ ଏହି ବିଜୟ ସହ ଷଷ୍ଠ ଥର ପାଇଁ କ୍ୱାର୍ଟର ଫାଇନାଲ୍ରେ ପ୍ରବେଶ କରିଛି ଫ୍ରାନ୍ସ । କେବଳ ସେତିକି ନୁହେଁ, ବିଶ୍ୱକପ୍ ଏବଂ ୟୁରୋକୁ ମିଶାଇ ବେଲ୍ଜିୟମ୍ ବିପକ୍ଷରେ ଏହା ଫ୍ରାନ୍ସର ପଞ୍ଚମ ବିଜୟ।
୮୫ତମ ମିନିଟ୍ରେ ଫ୍ରାନ୍ସ ଖେଳାଳି କୋଲୋ ମୁଆନି ଗୋଲ ପାଇଁ ପ୍ରୟାସ କରିଥିଲେ । ଡିଫେନ୍ସରେ ରହିଥିବା ଭର୍ତୋଙ୍ଗେନ ବଲ୍ ଅଟକାଇବା ପାଇଁ ପ୍ରୟାସ କରୁଥିବାବେଳେ ତାଙ୍କ ଗୋଡରେ ବଲ୍ ବାଜି ନିଜ ଦଳର ଗୋଲ୍ ପୋଷ୍ଟ ଭିତରକୁ ଚାଲିଯାଇଥିଲା । ମ୍ୟାଚ୍କୁ ଫେରିବା ପାଇଁ ବେଲ୍ଜିୟମ୍ ନିକଟରେ ଆଉ ସମୟ ନଥିଲା । ମ୍ୟାଚ୍ ଆରମ୍ଭରୁ ଶେଷ ପର୍ଯ୍ୟନ୍ତ ସ୍ପେନ୍ ଘନ ଘନ ଆକ୍ରମଣ କରିଥିଲା । ସମ୍ପୂର୍ଣ୍ଣ ୯୦ମିନିଟ୍ ମଧ୍ୟରେ ଦଳ ମୋଟ୍ ୧୯ଟି ସୁଯୋଗ ସୃଷ୍ଟି କରିଥିଲା । ମାତ୍ର ଗୋଟିଏ ହେଲେ ଗୋଲ୍ କରିପାରି ନଥିଲା । କ୍ୱାର୍ଟର ଫାଇନାଲ୍ରେ ପହଞ୍ଚି ସାରିଥିଲେ ହେଁ ଫ୍ରାନ୍ସର କୌଣସି ଖେଳାଳି ଏପର୍ଯ୍ୟନ୍ତ ଗୋଲ୍ କରିନାହାନ୍ତି । ଅଷ୍ଟ୍ରିୟା ବିପକ୍ଷ ଲିଗ୍ ମ୍ୟାଚ୍ରେ ଫ୍ରାନ୍ସ ଆତ୍ମଘାତୀ ଗୋଲ୍ ବଳରେ ଜିତିଥିଲା । ଏହାପରେ ନେଦରଲାଣ୍ଡ୍ସ ବିପକ୍ଷ ମ୍ୟାଚ୍ ଗୋଲ୍ ଶୂନ୍ୟ ରହିଥିଲା । ସେହିପରି ପୋଲାଣ୍ଡ ବିପକ୍ଷ ମ୍ୟାଚ୍ ମଧ୍ୟ ୧-୧ ଗୋଲ୍ରେ ଡ୍ର’ ରହିଥିଲା । ଉଭୟ ଦଳ ପେନାଲ୍ଟି ବଳରେ ଗୋଲ୍ କରିଥିଲେ ।
ସେପଟେ ଅନ୍ୟ ଏକ ମ୍ୟାଚ୍ରେ ପର୍ତ୍ତୁଗାଲ୍ ୩-୦ ପେନାଲ୍ଟି ସୁଟ୍ ଆଉଟ୍ ଗୋଲ୍ରେ ସ୍ଲୋଭେନିଆକୁ ହରାଇ କ୍ୱାର୍ଟର ଫାଇନାଲ୍ରେ ପ୍ରବେଶ କରିଥିଲା । ମ୍ୟାଚ୍ର ନିର୍ଦ୍ଧାରିତ ୯୦ ମିନିଟ୍ ଓ ଅତିରିକ୍ତ ୩୦ ମିନିଟ୍ ମଧ୍ୟରେ ଗୋଲ୍ ହୋଇ ନଥିଲା । ପ୍ରଥମ କରି ରାଉଣ୍ଡ-୧୬ରେ ପ୍ରବେଶ କରିଥିବା ସ୍ଲୋଭେନିଆ ଚମତ୍କାର ଖେଳ ପ୍ରଦର୍ଶନ କରିଥିଲା । କେବଳ ପତ୍ତୁର୍ଗାଲକୁ ଅଟକାଇବାରେ ସ୍ଲୋଭେନିଆ ସବୁ ଶକ୍ତି ଲଗାଇଥିଲା । ୯୦ ମିନିଟ୍ ମଧ୍ୟରେ ପର୍ତ୍ତୁଗାଲ ଅନେକ ସୁଯୋଗ ସୃଷ୍ଟି କରିଥିଲେ ହେଁ ଗୋଲ୍ ସମ୍ଭବ ହୋଇନଥିଲା । ନିର୍ଦ୍ଧାରିତ ସମୟ ଗୋଲ୍ ଶୂନ୍ୟ ରହିବାରୁ ଅତିରିକ୍ତ ୩୦ ମିନିଟ୍ ଖେଳ ହୋଇଥିଲା । ୧୦୫ତମ ମିନିଟ୍ରେ ପର୍ତ୍ତୁଗାଲ ପାଇଁ ଏକ ପେନାଲ୍ଟି ଜିତିଥିଲେ ଡିଓଗୋ ଜୋଟା । ରୋନାଲ୍ଡୋଙ୍କୁ ପେନାଲ୍ଟି ମାରିବା ପାଇଁ ସୁଯୋଗ ଦିଆଯାଇଥିଲା । ମାତ୍ର ବିଶ୍ୱର ଶ୍ରେଷ୍ଠ ଖେଳାଳି ଫେଲ୍ ମାରିଥିଲେ । ତାଙ୍କ ସଟ୍କୁ ସ୍ଲୋଭେନିଆ ଗୋଲ୍ କିପର ଜାନ ଓବ୍ଲାକ୍ ଅଟକାଇ ଦେଇଥିଲେ । ୧୨୦ ମିନିଟ୍ର ଖେଳ ମଧ୍ୟରେ ଗୋଲ୍ ହୋଇନଥିଲା । ଶେଷରେ ଟାଇବ୍ରେକର ସହାୟତା ନିଆଯାଇଥିଲା । ପର୍ତ୍ତୁଗାଲ୍ ୩-୦ ପେନାଲ୍ଟି ସୁଟ୍ ଆଉଟ୍ ଗୋଲ୍ରେ ବିଜୟ ହାସଲ କରି କ୍ୱାର୍ଟର ଫାଇନାଲ୍ରେ ପ୍ରବେଶ କରିଛି ।