ଅହମଦାବାଦ ୦୩/୦୪: ଗୁଜରାଟ ଜାମନଗରରେ ବିମାନ ଦୁର୍ଘଟଣାଗ୍ରସ୍ତ । ଦୁର୍ଘଟଣାରେ ଜଣେ ପାଇଲଟଙ୍କ ମୃତ୍ୟୁ ହୋଇଛି । ବୁଧବାର ରାତି ପ୍ରାୟ ୯.୩୦ ସମୟରେ ଗୁଜୁରାଟର ଜାମନଗରରେ ବାୟୁସେନାର ଜାଗୁଆର ଯୁଦ୍ଧ ବିମାନ ଦୁର୍ଘଟଣାଗ୍ରସ୍ତ ହୋଇଛି। ବିମାନଟି ଜାମନଗର ବାୟୁସେନା ଷ୍ଟେସନରୁ ଉଡ଼ାଣ ଆରମ୍ଭ କରିଥିଲା। ଏହି ଦୁର୍ଘଟଣାରେ ଜଣେ ପାଇଲଟଙ୍କ ମୃତ୍ୟୁ ହେବା ସହ ଜଣେ ଗୁରୁତର ଆହତ ହୋଇଛନ୍ତି। ତାଙ୍କ ନାମ ମନୋଜ କୁମାର ସିଂହ। ପାଇଲଟଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।
ପ୍ରାକ୍ଟିସ୍ ମିଶନ ସମୟରେ ଷ୍ଟେସନରୁ ଉଡ଼ାଣ ଭରିବା ପରେ, ଏହା ଜାମନଗରରୁ ପ୍ରାୟ ୧୨ କିଲୋମିଟର ଦୂରରେ ଥିବା ସୁଭାରଦା ଗ୍ରାମର ଏକ ଖୋଲା ପଡ଼ିଆରେ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ସମୟ ମଧ୍ୟରେ, ଜଣେ ପାଇଲଟ ବିମାନକୁ ବାହାର କରାଯାଇଥିଲା । ହେଲେ ଅନ୍ୟ ଜଣେ ପାଇଲଟ ବାହାର କରିପାରି ନଥିଲେ। ଦୁର୍ଘଟଣା ଏତେ ଭୟଙ୍କର ଥିଲା ଯେ, ବିମାନଟି ଖଣ୍ଡ ଖଣ୍ଡ ହୋଇଗଲା । ପରେ ବିମାନରେ ନିଆଁ ଲାଗିଗଲା । ଘଟଣା ପରେ ଗ୍ରାମବାସୀ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଲୋକମାନେ ଆହତଙ୍କୁ ସାହାଯ୍ୟ କରିଥିଲେ ଏବଂ ଘଟଣା ବିଷୟରେ ପୋଲିସକୁ ମଧ୍ୟ ଜଣାଇଥିଲେ। ଦୁର୍ଘଟଣାର କାରଣ ଏପର୍ଯ୍ୟନ୍ତ ଜଣାପଡ଼ି ନାହିଁ।
ଦୁର୍ଘଟଣା ସମ୍ପର୍କରେ ସୂଚନା ମିଳିବା ମାତ୍ରେ ଜାମନଗର ଏସପି, ଡିଏମ ଏବଂ ବାୟୁସେନା ଦଳ ଘଟଣାସ୍ଥଳରେ ପହଞ୍ଚିଥିଲେ। ଅଗ୍ନିଶମ ବାହିନୀ ବିମାନରେ ଲାଗିଥିବା ନିଆଁକୁ ଲିଭାଇ ଦେଇଥିଲେ। କଲେକ୍ଟର କେତନ ଠକ୍କର କହିଛନ୍ତି ଯେ ଦୁର୍ଘଟଣାଟି ଜନବସତିଠାରୁ ଦୂରରେ ଏକ ଖୋଲା ପଡ଼ିଆରେ ଘଟିଥିଲା। ଆହତ ପାଇଲଟଙ୍କୁ ଜିଜି ହସ୍ପିଟାଲରେ ଭର୍ତ୍ତି କରାଯାଇଛି। ତାଙ୍କ ଅବସ୍ଥା ସ୍ଥିର ଅଛି।
