ନୂଆଦିଲ୍ଲୀ ୩।୪: ଦିଲ୍ଲୀର ରେଖା ଗୁପ୍ତା ସରକାର ପୂର୍ବର ଆପ୍ ସରକାରଙ୍କ ଭଳି ମହିଳାଙ୍କ ନିମନ୍ତେ ମାଗଣା ବସ୍ ସେବା ଜାରି ରଖିବେ। ତେବେ ଏଥି ପାଇଁ ସରକାର ନୂଆ ସର୍ତ୍ତ ଲଗାଇବାକୁ ଯାଉଛନ୍ତି। ଗଣମାଧ୍ୟମ ରିପୋର୍ଟ ଅନୁସାରେ ମାଗଣା ବସ୍ ଯାତ୍ରା ଯୋଜନା କେବଳ ସେହି ମହିଳା ଉପଲବ୍ଧ କରିପାରିବେ ଯେଉଁମାନେ ଦିଲ୍ଲୀରେ ରହୁଥିବେ। ଅଧିକାରୀ କହିଛନ୍ତି ଯେ ଏଥି ପାଇଁ ପରିବହନ ବିଭାଗ ‘ଆଜୀବନ ସ୍ମାର୍ଟ କାର୍ଡ’ ଆରମ୍ଭ କରିବାକୁ କାମ କରୁଛନ୍ତି।
ଅଧିକାରୀ କହିଛନ୍ତି ଯେ ଦିଲ୍ଲୀ ସାର୍ବଜନିକ ବସ୍ ରେ ନିଶୁଳ୍କ ଯାତ୍ରା କରିବା ପାଇଁ ସ୍ମାର୍ଟ କାର୍ଡ ପ୍ରାପ୍ତ କରିବା ପାଇଁ ଇଛୁକ ମହିଳାଙ୍କ ନିମନ୍ତେ ପଞ୍ଜିକରଣ ପ୍ରକ୍ରିୟା ଖୁବ୍ ଶୀଘ୍ର ଆରମ୍ଭ ହେବ। ଗତ ଦିନରେ ମୁଖ୍ୟମନ୍ତ୍ରୀ ରେଖା ଗୁପ୍ତା ବିଧାନସଭାରେ ପିଛିଲା ଆପ ସରକାର ପିଙ୍କ ଟିକେଟ୍ ପ୍ରଣାଳୀରେ ଭ୍ରଷ୍ଟାଚାର କରିଥିବାର ଅଭିଯୋଗ କରିଥିଲେ। ଏହା ପରେ ଅଧିକାରୀ ଏହି ପଦକ୍ଷେପ ସମ୍ପର୍କରେ ସୂଚନା ଦେଇଛନ୍ତି। ଏ ପର୍ଯ୍ୟନ୍ତ ଦିଲ୍ଲୀ ଡିଟିସି ବସମାନଙ୍କରେ ମହିଳା ମାଗଣା ଯାତ୍ରା କରୁଛନ୍ତି। ତେବେ ଏଥି ପାଇଁ ସେମାନଙ୍କୁ ଏବେବି ପିଙ୍କ ଟିକେଟ୍ ନେବାକୁ ପଡୁଛି।
ଗତ ଦିନରେ ମୁଖ୍ୟମନ୍ତ୍ରୀ ରେଖା ଗୁପ୍ତା କହିଥିଲେ ଯେ ପିଛିଲା ସରକାର ଦୁର୍ନୀତି ଓ ଗଡବଡ଼ କରୁଥିଲେ, ତାହା ଏବେ ଆଉ ଚଳିବନି। ଆମେ ଦିଲ୍ଲୀର ମହିଳାଙ୍କ ନିମନ୍ତେ କାର୍ଡ କରିବୁ। ଏହା ଦ୍ୱାରା ମହିଳାଙ୍କୁ ଆଉ ବସ୍ ରେ ପିଙ୍କ ଟିକେଟ୍ ନେବାକୁ ପଡିବ ନାହିଁ। ୨୦୧୯ ମସିହା ଭାଇଦୁଜ ପର୍ବ ଅବସରରେ ଆମ ଆଦମୀ ପାର୍ଟି ସରକାର ଡିଟିସି ବସରେ ମହିଳାଙ୍କ ମାଗଣା ଯାତ୍ରା ନିମନ୍ତେ ପିଙ୍କ ଟିକେଟ୍ ବ୍ୟବସ୍ଥା ଆରମ୍ଭ କରିଥିଲେ। ଏହି ଯୋଜନା ପରେ ଦିଲ୍ଲୀରେ ସାର୍ବଜନିକ ବସ୍ ରେ ମହିଳା ଯାତ୍ରୀଙ୍କ ସଂଖ୍ୟା ବୃଦ୍ଧି ହୋଇଛି।
ଗତ ଦିଲ୍ଲୀ ବିଧାନସଭା ନିର୍ବାଚନରେ ବିଜେପି ବିଜୟୀ ହୋଇଛି। ରାଜ୍ୟରେ ଏବେ ବିଜେପି ସରକାର ଥିବା ବେଳେ ମହିଳାଙ୍କ ନିମନ୍ତେ ସ୍ମାର୍ଟ କାର୍ଡ ଯୋଜନା କରିବାକୁ ଯାଉଛନ୍ତି। ଏହି ଯୋଜନାରେ କେବଳ ରାଜଧାନୀ ଦିଲ୍ଲୀ ଅଞ୍ଚଳରେ ରହୁଥିବା ମହିଳା ଉପକୃତ ହୋଇ ପାରିବେ। ସେମାନେ ସ୍ମାର୍ଟ କାର୍ଡ ଦେଖାଇ ବସ୍ ରେ ମାଗଣା ଯାତ୍ରା କରିପାରିବେ। ଆଗାମୀ ୨ରୁ ୩ ସପ୍ତାହ ମଧ୍ୟରେ ସରକାର ସ୍ମର୍ଟ କାର୍ଡ ଯୋଜନାରେ କାମ ଆରମ୍ଭ କରିବେ।
ଅଧିକାରୀ କହିଛନ୍ତି ଯେ ପାତ୍ରତା ମାନଦଣ୍ଡ ଅନୁସାରେ ଆଜୀବନ ସ୍ମାର୍ଟ କାର୍ଡ କେବଳ ଦିଲ୍ଲୀରେ ରହୁଥିବା ମହିଳାଙ୍କୁ ଜାରି କରାଯିବ। ଏହା ଦ୍ୱାରା ସେମାନେ ବିନା କୌଣସି ସୀମାରେ କେବେବି କେଉଁଠାକୁ ବି ସହଜରେ ଯାତ୍ରା କରିପାରିବେ। ତେବେ ଦିଲ୍ଲୀ ସହର ବାହାରୁ ରାଜଧାନୀକୁ ଯାତାୟାତ କରୁଥିବା ମହିଳାଙ୍କୁ ଆଉ ମାଗଣା ବସ୍ ଯାତ୍ରା ସୁବିଧା ଆଉ ମିଳିବ ନାହିଁ।
