ଭୁବନେଶ୍ୱର୧୬/୦୨: କଳିଙ୍ଗ ଷ୍ଟାଡିୟମରେ ହକି ପର୍ବ । ଶନିବାର ଏଫ୍ଆଇଏଚ୍ ପ୍ରୋ ଲିଗ୍ରେ ୩ଟି ମ୍ୟାଚ୍ ଖେଳାଯାଇଥିଲା । ପ୍ରଥମ ମ୍ୟାଚରେ ଭାରତର ମହିଳା ହକି ଟିମ୍ ୩-୨ରେ ଇଂଲଣ୍ଡକୁ ହରାଇ ଅଭିଯାନ ଆରମ୍ଭ କରିଛି । ସେହିପରି ସ୍ପେନ୍ ଟିମ୍ ୨-୧ରେ ଜର୍ମାନୀକୁ ପରାଜିତ କରିଥିଲା । ମାତ୍ର ଭାରତୀୟ ପୁରୁଷ ଦଳକୁ ପରାଜୟ ସାମ୍ନା କରିବାକୁ ପଡ଼ିଛି । ପ୍ରଥମ ମ୍ୟାଚ୍ରେ ୧-୩ ଗୋଲ୍ରେ ସ୍ପେନ ନିକଟରୁ ହାରିଛି ।
ଏଫ୍ଆଇଏଚ୍ ପ୍ରୋ ଲିଗ୍ର ପ୍ରଥମ ମ୍ୟାଚରେ ଭାରତୀୟ ମହିଳା ଦଳ ଏକ ରୋମାଞ୍ଚକର ବିଜୟ ସହ ପଏଣ୍ଟ ଖାତା ଖୋଲିଛି । ସିଜନର ପ୍ରଥମ ମ୍ୟାଚ୍ରେ ଘରୋଇ ଦଳ ୩-୨ ଗୋଲ୍ରେ ଇଂଲଣ୍ଡକୁ ପରାସ୍ତ କରିଥିଲା । ୫୯ମିନିଟ୍ରେ ନବନୀତ କୌର ଗୋଟିଏ ଦର୍ଶନୀୟ ଗୋଲ୍ କରି ଦଳକୁ ଜିତାଇଥିଲେ । ଏହି ମ୍ୟାଚ୍ରେ ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓ ଅତିଥି ଭାବେ ଯୋଗଦେଇ ଭାରତୀୟ ଦଳର ସୁନେଲିତା ଟପ୍ପୋଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ଟ୍ରଫି ପ୍ରଦାନ କରିଥିଲେ ।
ଭାରତ ୧-୩ ସ୍ପେନ୍
ଭାରତୀୟ ପୁରୁଷ ଦଳ ପରାଜୟ ସହ ଅଭିଯାନ ଆରମ୍ଭ କରିଛି । ପ୍ରଥମ ମ୍ୟାଚ୍ରେ ଦଳ ୧-୩ ଗୋଲ୍ରେ ସ୍ପେନ୍ ନିକଟରୁ ହାରି ଯାଇଥିଲା । ଭାରତୀୟ ମହିଳା ଦଳ ବିଜୟ ହାସଲ କରିବା ପରେ ପୁରୁଷ ଦଳର ମ୍ୟାଚ୍ ଉପରେ ସମସ୍ତଙ୍କ ନଜର ରହିଥିଲା । ସ୍ପେନ୍ ବିପକ୍ଷରେ ପୁରୁଷ ଦଳ ଆରମ୍ଭରୁ ଭଲ ପ୍ରଦର୍ଶନ କରିଥିଲା । ପ୍ରଥମ କ୍ୱାର୍ଟରର ତୃତୀୟ ମିନିଟ୍ରେ ଭାରତ ପ୍ରଥମ ପେନାଲ୍ଟି ପାଇଥିଲା । ମାତ୍ର ଏହା ବିଫଳ ଯାଇଥିଲା । ଏହି ଭାଗରେ ଉଭୟ ଦଳ କେହି କାହାରିକୁ ଗୋଲ୍ ଦେଇ ପାରିନଥିଲେ । ଦ୍ୱିତୀୟ କ୍ୱାର୍ଟରରେ ଭାରତ ଖାତା ଖୋଲିଥିଲା । ୨୫ମିନିଟ୍ରେ ସୁଖଜୀତ ସିଂହଙ୍କ ଗୋଲ୍ ବଳରେ ଦଳ ୧-୦ରେ ଅଗ୍ରଣୀ ହାସଲ କରିଥିଲା । ଏହାର ୩ମିନିଟ୍ ମଧ୍ୟରେ ସ୍ପେନର ବ୍ରୋଜା ଲାକାଲି ଗୋଲ୍ ପରିଶୋଧ କରି ଦେଇଥିଲେ । ସ୍ଥିତି ୧-୧ରେ ବରାବର ରହିଥିଲା । ମାତ୍ର ପରବର୍ତ୍ତୀ ମିନିଟ୍ରେ ସ୍ପେନ୍ ଦ୍ବିତୀୟ ଗୋଲ୍ ଏବଂ ୫୬ମିନିଟ୍ରେ ଦଳକୁ ପେନାଲ୍ଟି ଗୋଲ୍ ମିଳିବାରୁ ସ୍ପେନ ୩-୧ରେ ଆଗେଇ ଥିଲା । ଭାରତ ଏକାଧିକ ପେନାଲ୍ଟି ସୁଯୋଗ ହାତଛଡ଼ା କରି ପରାଜିତ ହୋଇଥିଲା ।
