ଭୁବନେଶ୍ୱର10/01 :  ସେବେ ଅର୍ଚ୍ଚନା, ଏବେ ହଂସିତା। ଦୁଇ ସୁନ୍ଦରୀ, ନାମ ଅଲଗା କିନ୍ତୁ  ପ୍ରାୟ ସମାନ କାରନାମା । ବହୁତ ଲିଙ୍କ୍ , ଅନେକ ସଂପତ୍ତି । ଗାଁ, ସହରରୁ ଭୁବନେଶ୍ୱର ତାପରେ ବଦଳିଗଲା ଚେହେରା, ବଦଳିଗଲା ଜୀବନ । ସୁନ୍ଦର ଘର, ଅନେକ ଗାଡି, ଅଫିସ , ବେପାର, କେତେ କେତେ କାରବାର । ଧରାପଡନ୍ତି , ଜେଲ୍ ଯାଆନ୍ତି , ଆଉ କହନ୍ତି ସମାନ କଥା । ସୁନ୍ଦର ଚେହେରାର ଗୁମର ନେଇ ମିଡିଆରେ ଢେର ଚର୍ଚ୍ଚା । ସେବେ ବି ଏବେ ବି । 

ଅର୍ଚ୍ଚନା ନାଗ । ଦିନେ ତାଙ୍କ ପାଇଁ  ରାଜ୍ୟରେ ହୋଇଥିଲା ହଇଚଇ । ବ୍ୟବସାୟୀଙ୍କ ଠୁ ଆରମ୍ଭ କରି ଫିଲ୍ମ ନିର୍ମାତା ଆଉ ରାଜନେତା । ବ୍ଲାକ ମେଲିଂ ଅଭିଯୋଗରେ ପୋଲିସ ଗିରଫ କଲା, ତାପରେ ଆସିଲା ତାଙ୍କ କାରନାମାର ଅନେକ ଖବର । ସୁନ୍ଦର ଘର ଆଉ ଅୟସ ଜୀବନ । ଅମାପ ସଂପତ୍ତିର ହଇଚଇ ଖବର। ଇଡି କଲା ଛାନଭିନ୍ । ସ୍ୱାମୀ ବି ଫସିଲେ, ଅର୍ଚ୍ଚନା ବି । ଜେଲ୍ ଗଲେ । କିନ୍ତୁ ଜେଲ୍ରୁ କୋର୍ଟକୁ, ପୋଲିସ ରିମାଣ୍ଡରେ ଯିବା ବେଳେ କଲେ ବିସ୍ଫୋରଣ । କହିଲେ ପାଟି ଖୋଲିଲେ ଥରିବ ଓଡ଼ିଶା, ସରକାର ଭାଙ୍ଗିବ । ଅନେକ କଥା , କାନ୍ଦ ସହ କେତେ ନାଟକ । 

 ଏବେ ଖବରରେ ହଂସିତା? ହାଇ ପ୍ରୋଫାଇଲ୍ ଗ୍ଲାମରିୟସ ଲେଡି । ପଲିଟିକ୍ସରୁ ବିଜିନେସ ଓମ୍ୟାନ୍, ଲିଆସନିଂ, ପାର୍ଟି , ଅଫିସ, ଗାଡ଼ି । କୋଟି କୋଟିରେ ଖେଳ । ଫୁଲ୍  ଅୟସ କି ଜିନ୍ଦେଗୀ । ବେଶ ଭୂଷାରେ ଯେପରି ଷ୍ଟାଇଲିସ୍ ଲିଙ୍କ୍ ବି କୁଆଡେ ହାଇ ପ୍ରୋଫାଇଲ୍। ଦିଲ୍ଲୀରେ ଫାର୍ମ ହାଉସ , ରେଷ୍ଟୁରାଣ୍ଟ, ଓଡ଼ିଶା ସମେତ ଆଉ କିଛି ରାଜ୍ୟରେ ଅଫିସ । ଚୋଚକ ଚର୍ଚ୍ଚା ହେଲା ତାଙ୍କ ସ୍ୱାମୀ, ବୟ ଫ୍ରେଣ୍ଡ ଏବଂ ବିଜନେସ ପାର୍ଟନରଙ୍କୁ ନେଇ ।ଏକାଧିକ ଲାଇଫ୍ ପାର୍ଟନର । କାମ କରାଇ ଦିଅନ୍ତି, କାମ କରିବାର ଭରସା ଦିଅନ୍ତି , ନିଅନ୍ତି ପରସେଣ୍ଟ ଆଉ ଆଡଭାନ୍ସ । ହିସାବ ଲକ୍ଷ ଆଉ କୋଟିରେ । ଏବେ ଧରାପଡିବା ପରେ ଠିକ୍ ଅର୍ଚ୍ଚନାଙ୍କ ଭଳି ।  କାନ୍ଦ, ଲୁହ । କିଛି ଜାଣିନୁ, କହିପାରିବୁନି , ଫସାଇଦେଲେ । ପାର୍ଟନର ଅନୀଲ ମହାନ୍ତି ବି ଇନୋସେଣ୍ଟ ଭଳି କହୁଛନ୍ତି ।  

ସତରେ କଣ ଏମାନଙ୍କୁ କିଏ ମୋହରା କରିଛି । ଏମାନେ କଣ ଚକ୍ରାନ୍ତକାରୀଙ୍କ ସବୁ ଗୁମର ଖୋଲିଦେବେ ?  ପୋଲିସକୁ ସହଯୋଗ କରିବେ , ସବୁ କହିଦେବେ ? ଏଇଟା ସତ ନା ନାଟକ ? କାରଣ ଅର୍ଚ୍ଚନା ବି ଏମିତି କହିଥିଲେ । ଏବେ ଜାମିନରେ ବାହାରେ । ପାଟି ବି ଖୋଲିଲେନି । କେହି ବି ବଡ ମାଛ ବି ଫସି ଲେନି । ଠିକ୍ ସେମିତି ବଡ ବଡିଆଙ୍କ ଲିଙ୍କ୍ରେ ଥିବା ହଂସିତା ଫାର୍ଟି କଲଚରରେ ଥିଲେ ।କିନ୍ତୁ ତାଙ୍କ ଗୁମର ଫିଟିବ ତ ?  ନା ଏଇ ଖବର ବି ଶବ୍ଦ ପବନରେ ମିଳାଇଯିବା ଭଳି ମିଳାଇଯିବ ?  

ମାମଲା ସବୁରେ ତଦନ୍ତ, ଜେଲ୍, କୋର୍ଟ , ଜାମିନ ତାପରେ ତାରିଖ ଆଉ ତାରିଖ । ଶେଷରେ ଅନେକ କାରଣରେ ମାମଲା ଶେଷ । ସବୁ ଅନିଶ୍ଚିତ ଅସମାହିତ । ଅନେକ ଚର୍ଚ୍ଚିତ ଖବର, ମାମଲା ସବୁ କିଛି ଦିନ ପରେ ଏମିତି ଲୁଚିଯାଏ କାହିଁକି ? ଏହାର କାରଣ କଣ  ? ଅଦୃଶ୍ୟ ପ୍ରଭାବର ସେହି ଶକ୍ତିଶାଳୀ ପ୍ରଭାବଶାଳୀ ମାନେ କଣ ଶକ୍ତିହୀନ ହୁଅନ୍ତି ନାହିଁ ?ମୁଖା ଖୋଲିଯିବା ଭୟରେ ସତକୁ ଚାପିଦେଉଥିବା ଏହି ଖଳ ନାୟକ ମାନଙ୍କୁ କେବେ ଦଣ୍ଡ ମିଳେ ?  ଅନେକ ପ୍ରଶ୍ନର ଉତ୍ତର ଦେବ କିଏ ?

Also Read-  ଚୀନରେ ସ୍ଥିତି ବେହାଲ, ଲକ୍‌ଡାଉନ୍ ସ୍ଥିତି ! ସ୍କୁଲରେ ପଡିଲା ତାଲା, ଘରୁ ବାହାରିବା ମୁସ୍କିଲ୍