ନୂଆଦିଲ୍ଲୀ: ଇଣ୍ଟରନ୍ୟାସନାଲ କ୍ରିକେଟ୍ କାଉନସିଲ (ଆଇସିସି) ମଙ୍ଗଳବାର କ୍ରିକେଟରେ ନୂଆ ନିୟମ ଘୋଷଣା କରିଛି । ଏହା ଅନୁସାରେ ଦିନିକିଆ ଓ ଟି-୨୦ ଅନ୍ତରାଷ୍ଟ୍ରୀୟରେ ଯଦି ବୋଲର ପରବର୍ତ୍ତୀ ଓଭର ପକାଇବା ପାଇଁ ୬୦ ସେକେଣ୍ଡରୁ ଅଧିକ ସମୟ ନିଅନ୍ତି ଓ ଇନିଂସରେ ତିନିଥର ଏପରି ହୁଏ ତେବେ ବୋଲିଂ ଟିମକୁ ପେନାଲ୍ଟି ଲାଗିବ । ଏହି ନିୟମକୁ ପ୍ରଥମେ ଟ୍ରାଏଲ ରୂପେ ଲାଗୁ କରାଯିବ । ଆଇସିସିର ବୋର୍ଡର ଅହମଦାବାଦ ବୈଠକରେ ଏହି ନିଷ୍ପତ୍ତି ନିଆଯାଇଛି ।

ଆଇସିସିର ବୟାନରେ କୁହାଯାଇଛି, ପୁରୁଷ ଏକଦିବସୀୟ ଓ ଟି-୨୦ ଅନ୍ତରାଷ୍ଟ୍ରୀୟ କ୍ରିକେଟରେ ୨୦୨୩ ଡିସେମ୍ୱରରୁ ୨୦୨୪ ଏପ୍ରିଲ ଯାଏ ଟ୍ରାଏଲ ଆଧାରରେ ଷ୍ଟପ୍ କ୍ଲକ୍ କାର୍ଯ୍ୟକାରୀ କରାଯିବ । ଏହି କ୍ଲକକୁ ଓଭରଗୁଡିକ ମଧ୍ୟର ସମୟ ଉପରେ ନଜର ରଖିବା ପାଇଁ ବ୍ୟବହାର କରାଯିବ ।

ପଢନ୍ତୁ: ଶ୍ରୀଲଙ୍କା ହାତରୁ ଖସିଲା ଅଣ୍ଡର-19 ବିଶ୍ଵକପ୍ ଆୟୋଜନ ଅଧିକାର, ICC ୧୧ ଦିନରେ ଦେଲା ଦ୍ଵିତୀୟ ଝଟକା

ବୟାନ ଅନୁସାରେ, ଯଦି ବୋଲର ଟିମ୍ ଗୋଟିଏ ଓଭର ଶେଷ ହେବା ପରେ ୬୦ ସେକେଣ୍ଡ ମଧ୍ୟରେ ପରବର୍ତ୍ତୀ ଓଭର ପକାଇବାରେ ବିଫଳ ହେଲେ ପେନାଲ୍ଟି ଲାଗିବ । ତେବେ ଇନିଂସରେ ତିନି ଥର ଏପରି କରିବା ପରେ ପାଞ୍ଚ ରନ୍ ପେନାଲ୍ଟି ଲାଗିବ । ଏହାସହ ପିଚ୍ ଓ ଆଉଟଫିଲ୍ଡ ନିରୀକ୍ଷଣ ନିୟମ ପରିବର୍ତ୍ତନକୁ ମଧ୍ୟ ଆଇସିସି ମଞ୍ଜୁରୀ ଦେଇଛି ।