ହାଇଦ୍ରାବାଦ: ହାଇଦ୍ରାବାଦରେ ହାଇ ରେକର୍ଡ। ଟି-୨୦ ଅନ୍ତର୍ଜାତୀୟ ଇତିହାସରେ ଦ୍ୱିତୀୟ ସର୍ବାଧିକ ସ୍କୋର କରି ରେକର୍ଡ କଲା ଟିମ୍ ଇଣ୍ଡିଆ। ବାଂଲାଦେଶ ବିପକ୍ଷ ତୃତୀୟ ତଥା ଅନ୍ତିମ ମ୍ୟାଚ୍ରେ ଭାରତ ନିର୍ଦ୍ଧାରିତ ୨୦ ଓଭରରେ ୬ ୱିକେଟ ହରାଇ ୨୯୭ ରନ୍ କରିଛି। ଯାହା ଟି-୨୦ ଇତିହାସରେ ଦ୍ୱିତୀୟ ସର୍ବାଧିକ ରନ୍। ଏହା ପୂର୍ବରୁ ୨୦୨୩ ସେପ୍ଟେମ୍ବର ୨୭ ତାରିଖରେ ନେପାଳ ମଙ୍ଗୋଲିଆ ବିରୋଧରେ ଟି-୨୦ ଇତିହାସରେ ସର୍ବାଧିକ ୩୧୪ ରନ୍ କରି ଟପ୍ରେ ରହିଛି।
ଆଜିର ମ୍ୟାଚ୍ରେ ଭାରତ ଟସ୍ ଜିତି ପ୍ରଥମେ ବ୍ୟାଟିଂ କରିଥିଲା। ଦଳ ପକ୍ଷରୁ ସଞ୍ଜୁ ସାମସନ ଦ୍ୱିତୀୟ ଭାରତୀୟ ଖେଳାଳିଭାବେ ଟି-୨୦ ଅନ୍ତର୍ଜାତୀୟ ମ୍ୟାଚ୍ରେ ଦ୍ରୁତ ଶତକ ହାସଲ କରିଛନ୍ତି। ସେ ମାତ୍ର ୪୦ ବଲ୍ରେ ୧୧୧ ରନ୍ କରିଥିଲେ। ସେହିପରି କ୍ୟାପ୍ଟେନ୍ ସୂର୍ଯ୍ୟକୁମାର ଯାଦବ ୭୫ ରନ୍ କରିଥିବା ବେଳେ ହାର୍ଦ୍ଦିକ ପାଣ୍ଡ୍ୟା ୪୭ ଓ ରିଆନ ପରାଗ ୩୪ ରନ୍ କରିଥିଲେ। ତେବେ ଏଥର ବି ଫେଲ୍ ମାରିଥିଲେ ଅଭିଷେକ ଶର୍ମା। ସେ ମାତ୍ର ୪ ରନ୍ କରି ଆଉଟ୍ ହୋଇଥିଲେ। ରିଙ୍କୁ ସିଂହ ଶେଷ ବେଳକୁ ଆସି ୮ ରନ୍ କରି ନଟ୍ ଆଉଟ ରହିଥିଲେ।
ସେହିପରି ବାଂଲାଦେଶ ପକ୍ଷରୁ ଆଜି କୌଣସି ବୋଲରଙ୍କ ବୋଲିଂ କାମ ଦେଇ ନଥିଲେ। ଭାରତୀୟ ବ୍ୟାଟରମାନେ ନିର୍ଦ୍ଦୟ ଭାବେ ପ୍ରହାର କରିଥିଲେ। ତଞ୍ଜିମ ହସନ ଶକିବ ୪ ଓଭର କରି ସର୍ବାଧିକ ୬୬ ରନ୍ ଦେଇ ସର୍ବାଧିକ ୩ ୱିକେଟ୍ ନେଇଥିଲେ। ହେଲେ ଶେଷ ଓଭର ବୋଲିଂ କରିବାକୁ ଆସି ତଞ୍ଜିମ ୱିକେଟ୍ ନେବାକୁ ସକ୍ଷମ ହୋଇଥିଲେ। ସେହିପରି ତସ୍କିନ ଅହମଦ, ମୁସ୍ତାଫିଜୁର ଓ ମହମଦୁଲ୍ଲା ଗୋଟିଏ ଲେଖାଏ ୱିକେଟ୍ ନେଇଥିଲେ।
