ନୂଆଦିଲ୍ଲୀ ୨୨।୦୯ : ଇସ୍ରାଏଲର ପୁଣି ଏୟାରଷ୍ଟ୍ରାଇକ୍ । ଗାଜାର ସ୍କୁଲରେ ଇସ୍ରାଏଲ୍ ପକ୍ଷରୁ ହୋଇଛି ଏୟାରଷ୍ଟ୍ରାଇକ୍ । ଯେଉଁଥିରେ ୨୨ ଜଣଙ୍କର ମୃତ୍ୟୁ ହୋଇଯାଇଛି । ମୃତକଙ୍କ ମଧ୍ୟରେ ଅନେକ ମହିଳା ଓ ଶିଶୁ ସାମିଲ ଥିବା ଜଣାପଡିଛି ।
ଖବର ଅନୁଯାୟୀ, ଗାଜା ସିଟିର ଦକ୍ଷିଣାଞ୍ଚଳ ଜିଟାଉନ୍ ସହରରେ ଥିବା ଏକ ସ୍କୁଲ ଉପରେ ଇସ୍ରାଏଲ ସେନା ଏୟାରଷ୍ଟ୍ରାଇକ୍ କରିଛି । ଏଥିରେ ୨୨ ଜଣଙ୍କ ମୃତ୍ୟୁ ଘଟିଥିଲା ବେଳେ ଅନ୍ୟ ୩୦ରୁ ଅଧିକ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ୬ ମହିଳା ଓ ୧୩ ଜଣ ପିଲା ଅଛନ୍ତି । ସେହି ସ୍କୁଲରେ ପାଲେଷ୍ଟିନୀୟ ଶରଣାର୍ଥୀ ରହୁଥିଲେ । ସେମାନଙ୍କୁ ଟାର୍ଗେଟ କରି ଇସ୍ରାଏଲ ଏଭଳି ଆକ୍ରମଣ କରିଥିବା ସ୍ୱାସ୍ଥ୍ୟ ମନ୍ତ୍ରଣାଳୟ ଅଭିଯୋଗ କରିଛି । ଜଣେ ପ୍ରତ୍ୟକ୍ଷଦର୍ଶୀଙ୍କ କହିବାନୁଯାୟୀ ସ୍କୁଲ ପଡିଆରେ କିଛି ପିଲା ଖେଳୁଥିଲା ବେଳେ ଆଉ କିଛି ପିଲା ଓ ମହିଳା ସେଠାରେ ଖେଳ ଦେଖୁଥିଲେ । ଏହି ସମୟରେ ହଠାତ୍ ଦୁଇଟି ରକେଟ ମାଡ଼ ହୋଇଥିଲା । ଗୋଟିଏ ସ୍କୁଲ ଉପରେ ଓ ଅନ୍ୟଟି ପଡିଆରେ ପଡିଥିଲା ।
ଅନ୍ୟପଟେ ଇସ୍ରାଏଲ କହିଛି କି ଉକ୍ତ ସ୍କୁଲକୁ ହମାସ ଆତଙ୍କୀମାନେ କମାଣ୍ଡ ସେଣ୍ଟର ଭାବେ ବ୍ୟବହାର କରୁଥିଲେ । ବିମାନ ଆକ୍ରମଣରେ ତାକୁ ଧ୍ୱଂସ କରିଦିଆଯାଇଛି । ହେଲେ ହମାସ ଏହାକୁ ଖଣ୍ଡନ କରିଛି।
