ଝାରସୁଗୁଡା ୨୭/୧୨: ସମ୍ଭାଵ୍ୟ ପଶ୍ଚିମା ଝଡ଼ ଯୋଗୁଁ ଆସନ୍ତା ୨୮ ଏବଂ ୨୯ ତାରିଖ ପଶ୍ଚିମ ଓଡିଶାରେ ବର୍ଷା ହେବା ନେଇ ଆକଳନ କରିଛି ପାଣିପାଗ ବିଭାଗ । ଏହି ଅଦିନିଆ ବର୍ଷା ଚାଷୀ କୂଳଙ୍କ ପାଇଁ ବିପଦ । ଝାରସୁଗୁଡା ଜିଲ୍ଲାରେ ଏବେ ଅନେକ ସ୍ଥାନରେ ବିଲ, ଖଳା ଏବଂ ଗାଁ ଦାଣ୍ଡ ଚାଷୀମାନେ ଧାନ ଅମଳ କରି ରଖିଛନ୍ତି । 

ଅନେକ ଚାଷୀ ଏବେ ଧାନ ଅମଳ କରୁଛନ୍ତି । ବର୍ଷା ହେଲେ ସମସ୍ତ ଧାନ ନଷ୍ଟ ହେବାର ଆଶଙ୍କା ଦେଖାଦେଇଛି । ଚାଷୀ ଅମଳ କରି ଖଳା ଅବା ଗାଁ ଦାଣ୍ଡରେ ରଖିଥିବା ଧାନକୁ ତାରପୋଲିନରେ ଢାଙ୍କିବା ସହ ଅଖା ବସ୍ତାରେ ଭରି ସୁରକ୍ଷିତ ରଖିବାକୁ ଚେଷ୍ଟା କରୁଛି । ପ୍ରଥମେ ବର୍ଷା ଅଭାବ ଯୋଗୁଁ ମରୁଡିର ସମ୍ମୁଖୀନ ହୋଇଥିବା ଚାଷୀ ଏବେ ଅଦିନିଆ ବର୍ଷା ଯୋଗୁଁ ସର୍ବସ୍ୱ ହରାଇବାକୁ ବସିଛି l 

ଏହିପରି ପରିସ୍ଥିତିରେ ଚାଷୀ କିପରି ନିଜ ଧାନ ସୁରକ୍ଷିତ ରଖିବ ଏବଂ ଏଫକ୍ୟୁ ମାନର ଧାନ ମଣ୍ଡିରେ ବିକ୍ରି କରିବ ସେନେଇ ଚିନ୍ତାରେ ରହିଛି । ରାଜ୍ୟ ଚାଷୀକୂୂଳ ହତାଶ । ଦିନେ ଅନ୍ତରରେ ଦୁଇଥର ଅଦିନିଆ ଲଗାଣ ବର୍ଷାରେ ଉଜୁଡି ଯାଇଛି ପୁରା ଫସଲ । ଏନେଇ ଚାଷୀ ପାଣି ଜମିରେ ଉଜୁଡା ଫସଲକୁ ସାଉଣ୍ଟୁଥିବା ବେଳେ ପୁଣି ଏକ ବର୍ଷାର ଆକଳନ କରିଛି ଆଂଚଳିକ ପାଣିପାଗ ବିଭାଗ । 

ସୂଚନାଥାଉକି, ଆସନ୍ତା ୨୮ ଓ ୨୯ ତାରିଖରେ ରାଜ୍ୟର କିଛି ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ । ପଶ୍ଚିମାଝଡ ପ୍ରଭାବରେ ଏଭଳି ବର୍ଷାର ଆକଳନ କରାଯାଇଛି  । ୨୮ ଓ ୨୯ ତାରିଖରେ ଉତ୍ତର ଓ ଉତ୍ତର ପଶ୍ଚିମ ଓଡିଶାରେ ବର୍ଷା ସମ୍ଭାବନା ରହିଛି। ବର୍ଷାରେ ପୂର୍ବରୁ ଫସଲ ନଷ୍ଟ ଚାଷୀଙ୍କ ସମସ୍ୟା ବଢ଼ାଇଥିବାବେଳେ, ଆଉ ଏକ ବର୍ଷା ଆଶଙ୍କା ଚିନ୍ତା ବଢ଼ାଇ ଦେଇଛି।