ବେଙ୍ଗାଲୁରୁ: କର୍ଣ୍ଣାଟକରେ ଆଉ ଚାଲିବନି ବାଇକ୍ ଟ୍ୟାକ୍ସି । ଏଗ୍ରିଗେଟର ଆପ୍ ରାପିଡୋକୁ ଅଦାଲତୀ ଝଟକା ଲାଗିଛି । ବୁଧବାର କର୍ଣ୍ଣାଟକ ହାଇକୋର୍ଟ ଏକ ଆବେଦନର ଶୁଣାଇ କରି ଏଭଳି କିଛି ରାୟ ଦେଇଛନ୍ତି । ଉଚ୍ଚ ଅଦାଲତ, ରାଜ୍ୟରେ ଚାଲୁଥିବା ସମସ୍ତ ବାଇକ୍ ଟ୍ୟାକ୍ସି ଆପ୍କୁ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି । କୋର୍ଟ କହିଛନ୍ତି, ଯେପର୍ଯ୍ୟନ୍ତ ସରକାର ମୋଟର ଯାନ ଅଧିନିୟମ, ୧୯୮୮ର ଧାରା ୩ ଆଧାରରେ ପ୍ରସଂଗିକ ନିର୍ଦ୍ଦେଶନାମା ସହିତ ଅବଶ୍ୟକ ନିୟମକୁ ଅଧିସୂଚୀତ କରିନାହାନ୍ତି, ସେପର୍ଯ୍ୟନ୍ତ ବାଇକ୍ ଟ୍ୟାକ୍ସି ଏଗ୍ରିଗେଟର ରାଜ୍ୟ କାମ କରିବ ନାହିଁ । ଏହାଛଡ଼ା ରାଜ୍ୟରେ ଚାଲୁଥିବା ସମସ୍ତ ବାଇକ୍ ଅପ୍କୁ ୬ ସପ୍ତାହ ମଧ୍ୟରେ ବନ୍ଦ କରିବା ରାଜ୍ୟ ସରକାର ଓ ପରିବହନ ବିଭାଗକୁ ନିର୍ଦ୍ଦେଶ ଦେଇଛନ୍ତି ।
ଜଷ୍ଟିସ୍ ବିଏମ୍ ଶ୍ୟାମ ପ୍ରସାଦ କହିଛନ୍ତି, ରାପିଡୋ, ଉବର, ଓଲା ଏବଂ ଅନ୍ୟ ବାଇକ୍ ଟ୍ୟାକ୍ସି ଏଗ୍ରିଗେଟର୍ସଙ୍କ ସହିତ ଆବେଦନକାରୀଙ୍କୁ ନିର୍ଦ୍ଦାରିତ ଅବଧି ଭିତରେ ପରିଚାଳନା ବନ୍ଦ କରିବାକୁ ପଡ଼ିବ । ବାଇକ୍ ଟ୍ୟାକ୍ସି ପରିଚାଳନା ପାଇଁ ନୂଆ ନିୟମ ଆଣିବାକୁ ରାଜ୍ୟ ସରକାରଙ୍କୁ ତିନି ମାସ ସମୟ ଦେଇଛନ୍ତି କର୍ଣ୍ଣାଟକ ହାଇକୋର୍ଟ । ଯେ ପର୍ଯ୍ୟନ୍ତ ରାଜ୍ୟ ସରକାର ଉଚିତ୍ ନିୟମ ଲାଗୁ କରୁନାହାନ୍ତି, ସେପର୍ଯ୍ୟନ୍ତ ପରିବହନ ବିଭାଗକୁ ମୋଟର ସାଇକେଲକୁ ପରିବହନ ସେବା ପାଇଁ ଅନୁବନ୍ଧିତ କ୍ୟାରେଜ୍ ପରିମିଟ୍ ମିଳିବ ନାହିଁ ।
ବାଇଟ୍ ଟ୍ୟାକ୍ସିକୁ ନେଇ କ’ଣ ହୋଇଥିଲା ବିବାଦ:
ରାପିଡୋର ମୂଳ କମ୍ପାନି ରୋପେନ ଟ୍ରାନ୍ସପୋର୍ଟେସନ ସର୍ଭିସେସ୍ ଲିଟିଟେଡ୍ ୨୦୧୬ରେ କର୍ଣ୍ଣାଟକରେ ବାଇକ୍ ଟ୍ୟାକ୍ସି ସେବା ଆରମ୍ଭ କରିଥିଲା । ହେଲେ ରାଜ୍ୟ ପରିବହନ ବିଭାଗ ଏହାକୁ ବେଆଇନ କହିବା ସହିତ କର୍ଣ୍ଣାଟକ ମୋଟର ଯାନ ନିୟମ ଆଧାରରେ ଧଳା ନମ୍ବର ପ୍ଲେଟ୍ ଥିବା ଘରୋଇ ଦୁଇ ଚକିଆ ଯାନକୁ ବ୍ୟବସାୟିକ ଉଦ୍ଦେଶ୍ୟରେ ବ୍ୟବହାର କରାଯାଇପାରିବ ନାହିଁ ବୋଲି କହିଥିଲା । ଏହା ଉପରେ ପରିବହନ ବିଭାଗ ମଧ୍ୟ କାର୍ଯ୍ୟାନୁଷ୍ଠାନ ନେଇଥିଲା । ୨୦୧୯ ଫେବ୍ରୁଆରୀ ମାସରେ ୨୦୦ରୁ ଅଧିକ ବାଇକ୍ ଏବଂ ୨୦୨୨ ଜାନୁଆରୀ ମାସରେ ୧୨୦ ମୋଟର ସାଇକେଲକୁ ଜବତ କରିଥିଲା ।
ଏହା ପରେ କର୍ଣ୍ଣାଟକ ଉଚ୍ଚ ନ୍ୟାୟଳୟଙ୍କ ଦ୍ବାରସ୍ତ ହୋଇଥିଲେ ରାପିଡୋ କର୍ତ୍ତୃପକ୍ଷ । ସରକାର ବାଇକ୍ ଟ୍ୟାକ୍ସି କାରବାରରେ ହସ୍ତକ୍ଷେପ ନକରିବାକୁ ଏକ ଯାଚିକା ଦାୟର କରିଥିଲେ ଏବଂ ଦୁଇ ଚକିଆ ଯାନକୁ ପରିବହନ ସେବାରେ ପଞ୍ଜୀକୃତ କରିବାକୁ ଅନୁମତି ଦେବା ପାଇଁ ଗୁହାରି କରିଥିଲେ । ହେଲେ କୋର୍ଟ ମାମଲାର ଶୁଣାଣି କରି ୬ ସପ୍ତାହ ଭିତରେ ରାଜ୍ୟରେ ଚାଲୁଥିବା ସମସ୍ତ ବାଇକ୍ ଆପ୍କୁ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି ।
