ନୂଆଦିଲ୍ଲୀ ୨୮।୧୦: ଚଳିତବର୍ଷ ଧନତେରସ ୨୯ ଅକ୍ଟୋବର ମଙ୍ଗଳବାର ପାଳିତ ହେବ। ଧନତେରସର ଏହି ପର୍ବରେ ଧନର ଦେବୀ ଲକ୍ଷ୍ମୀ ଓ କୁବେରଙ୍କ ପୂଜା କରାଯାଏ। ଏହି ଉତ୍ସବରେ ସୁନା, ରୂପା ଓ ବାସନକୁସନ କିଣିବା ଶୁଭ ମନେକରାଯାଏ। ଏଣୁ ପ୍ରତ୍ୟେକ ବ୍ୟକ୍ତି ଏହି ପର୍ବରେ ମା ଲକ୍ଷ୍ମୀ ଓ କୁବେରଙ୍କୁ ପ୍ରସନ୍ନ କରିବାକୁ ଚାହିଁଥାନ୍ତି, ଯେପରି ଜୀବନରେ ଧନ ସମ୍ପର୍କିତ କୌଣସି ସମସ୍ୟା ନ ଉପୁଜେ। ଯଦି ଆପଣ ବି ଆପଣଙ୍କ ଘରେ ଧନତେରସ ପୂଜା କରୁଛନ୍ତି ତେବେ ଜାଣି ରଖନ୍ତୁ କେଉଁ ସବୁ ଦିଗରେ ପ୍ରଦୀପ ପ୍ରଜ୍ୱଳନ କଲେ ମା ଲକ୍ଷ୍ମୀ ଓ କୁବେରଙ୍କୁ ପ୍ରସନ୍ନ କରିପାରିବେ।
ଧନତେରସ ଦିନ ଆପଣଙ୍କ ଘରର ପୂର୍ବ ଦିଗରେ ରାଶି ତେଲର ଦୀପଟିଏ ଜଳାନ୍ତୁ। ଏହି ସ୍ଥାନରେ ପ୍ରଦୀପ ପ୍ରଜ୍ୱଳନ କଲେ ଘରକୁ ସକରାତ୍ମକ ଉର୍ଜାର ପ୍ରବେଶ ହୁଏ ଓ ଘରର ସଦସ୍ୟମାନେ ଧନ ସମ୍ପର୍କିତ ସମସ୍ୟାରୁ ମୁକ୍ତ ରହନ୍ତି। ରାଶି ତେଲର ଦୀପ ଘରର ବାତାବରଣକୁ ମଧ୍ୟ ଶୁଦ୍ଧ କରିଥାଏ। ଏ ବର୍ଷ ଧନତେରସ ପୂଜାରେ ଆପଣଙ୍କ ଘରର ଉତ୍ତର ଦିଗରେ ଗୋଟିଏ ଘିଅ ଦୀପ ଜଳାନ୍ତୁ। ମା ଲକ୍ଷ୍ମୀ ଖୁସି ହେବେ ଓ ଭକ୍ତଙ୍କ ଉପରେ ତାଙ୍କର ବିଶେଷ କୃପା ରହିବ।
ଧନତେରସରେ ଘରର ମଝାମଝି ସ୍ଥାନରେ ବି ଦୀପଟିଏ ଜଳାଇବା ଦରକାର। ତେବେ ଦୀପ ଜଳାଇବା ପୂର୍ବରୁ ସ୍ଥାନର ସଫା ସୁତୁରା ପ୍ରତି ମଧ୍ୟ ଯତ୍ନବାନ ହେବେ। ଏହି ସ୍ଥାନରେ ଆପଣ ନିଶ୍ଚିତ ରୂପେ ଘିଅ ଦୀପଟିଏ ଜଳାନ୍ତୁ। ଏପରି କରିବା ଦ୍ୱାରା ଘରକୁ ସୁଖ ସମୃଦ୍ଧି ଆସେ ଓ ଘରେ ଆର୍ଥିକ ସମସ୍ୟା ରହେ ନାହିଁ। ଧନତେରସ ଦିନ ଆପଣଙ୍କ ଘରର ଉତ୍ତର ପୂର୍ବ ଦିଗରେ ୫ଟି ଦୀପ ପ୍ରଜ୍ୱଳିତ କରନ୍ତୁ। ଏହି ସ୍ଥାନରେ ଦୀପ ଜଳାଇଲେ ଘରେ ଶାନ୍ତି ରହିଥାଏ। ଧନର ଦେବତା କୁବେରଙ୍କ ଆଶିର୍ବାଦ ମଧ୍ୟ ମିଳିଥାଏ।
