ଭୁବନେଶ୍ବର ୫।୪: ରାଜ୍ୟରେ ପ୍ରାଥମିକ ବିଦ୍ୟାଳୟରେ ଶିଶୁ ବାଟିକା ଆରମ୍ଭ ହେବା ପରେ ଅଭିଭାବକ ଓ ପିଲାଙ୍କ ମନରେ ଦ୍ଵନ୍ଦ୍ବ ସୃଷ୍ଟି ହୋଇଛି । ଶିଶୁ ବାଟିକା ଆରମ୍ଭ ହେବା ପରେ ଅଙ୍ଗନବାଡ଼ି ଚାଲିବ କି ନାହିଁ ସେନେଇ ଏକ ପ୍ରକାର ଦ୍ବନ୍ଦ ଦେଖାଦେଇଛି । ଏନେଇ ବିଭାଗୀୟ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ସ୍ପଷ୍ଟୀକରଣ ଦେଇଛନ୍ତି । ମନ୍ତ୍ରୀ କହିଛନ୍ତି, ଏବେ ପାଇଁ କୌଣସି ନିର୍ଦ୍ଦିଷ୍ଟ ଗାଇଡ୍ ଲାଇନ୍ ଆସିନାହିଁ । ଏବେ ଉଭୟ ଅଙ୍ଗନବାଡ଼ି ଓ ଶିଶୁ ବାଟିକ ଚାଲିବ । ସରକାର ସେଥିପାଇଁ ପ୍ରଥମ ବର୍ଷ ଶିଶୁ ବାଟିକା ୩କୁ ନେଇଛି । ପରେ ଧୀରେ ଧୀରେ ଶିଶୁ ବଟିକା ୧ ଓ ୨ ଚାଲିବ । ପ୍ରାରମ୍ଭିକ ଅବସ୍ଥାରେ ସେମାନଙ୍କ ପାଇଁ ଏବେ ପ୍ରାଥମିକ ଶିକ୍ଷକ ପାଠ ପଢ଼ାଇବେ ବୋଲି ମନ୍ତ୍ରୀ କହିଛନ୍ତି ।
ସେପଟେ ଘରୋଇ ସ୍କୁଲର ଫି’ ବୃଦ୍ଧି ନେଇ ପ୍ରତିକ୍ରିୟା ରଖିଛନ୍ତି ଗଣଶିକ୍ଷା ମନ୍ତ୍ରୀ । ମନ୍ତ୍ରୀ କହିଛନ୍ତି, ଘରୋଇ ସ୍କୁଲ ଗୁଡିକରେ ମଧ୍ୟ କଟକଣା ରହିଛି । ସେମାନେ ଏକ ନିର୍ଦ୍ଦିଷ୍ଟ ସୀମା ପର୍ଯ୍ୟନ୍ତ ଫି’ ରଖିପାରିବେ । ତାଠୁ ଅଧିକ ହେଲେ ବିଭାଗ ନିଶ୍ଚୟ ହସ୍ତକ୍ଷେପ କରିବ ।
ଶନିବାର ଭୁବନେଶ୍ବର ସ୍ଥିତ ବିପିନ ବିହାରୀ ଚୌଧୁରୀ ଶ୍ରୁତି ବାଧିତ ବିଦ୍ୟାଳୟ ଛାତ୍ରାବାସରେ ପହଞ୍ଚିଥିଲେ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ । ଅତର୍କିତ ଭାବେ ଛାତ୍ରାବାସରେ ମନ୍ତ୍ରୀ ପହଞ୍ଚିଥିଲେ । ସେଠାରେ ଛାତ୍ରଛାତ୍ରୀଙ୍କୁ ଭେଟିବା ସହ ଛାତ୍ରାବାସର ସମସ୍ୟା ବି ବୁଝିଥିଲେ ମନ୍ତ୍ରୀ । ତେବେ ମନ୍ତ୍ରୀ ଦାୟିତ୍ୱ ନେବା ପରେ ଏହି ସ୍କୁଲକୁ ଆସିନଥିବା ବେଳେ ଶନିବାର ହଠାତ ବିଦ୍ୟାଳୟରେ ପହଞ୍ଚି ଛାତ୍ରାବାସ ପରିଦର୍ଶନ କରିଛନ୍ତି । ଏହାସହ ଛାତ୍ରଛାତ୍ରୀଙ୍କ ସହ ଆଲୋଚନା ମଧ୍ୟ କରିଛନ୍ତି । ପିଲାମାନେ ତାଙ୍କ ସାଇନ ଲାଙ୍ଗୁଏଜରେ କହୁଥିବା ବେଳେ ପ୍ରଧାନଶିକ୍ଷକ ମନ୍ତ୍ରୀଙ୍କୁ ବୁଝାଇ କହୁଥିଲେ । ବିଦ୍ୟାଳୟ ସମେତ ଛାତ୍ରାବାସରେ ଅନେକ ସମସ୍ୟା ଥିବାବେଳେ ସେସବୁର ସମାଧାନ କରାଯିବା ନେଇ ପ୍ରତିଶୃତି ଦେଇଥିଲେ ମନ୍ତ୍ରୀ ନିତ୍ୟାନନ୍ଦ ଗଣ୍ଡ । ଏପଟେ ବିଦ୍ୟାଳୟରେ ଥିବା ବିଭିନ୍ନ ସମସ୍ୟାକୁ ମଧ୍ୟ ଅବଗତ କରାଇଛନ୍ତି ସ୍କୁଲ କର୍ତ୍ତୃପକ୍ଷ ।
You Can Read:
